استانادا الا دوپقا قۇمارتىپ, الاوكپە بولىپ جۇگىرگەن بالالار كوبەيىپ كەلەدى. بيىل وسىنداي اۋلا اياسىندا عانا دوپ تەۋىپ جۇرگەن جەتكىنشەكتەردىڭ باسىن قوسىپ, كوماندالار جاساقتاپ, «اۋلالىق يۋنيورلار ليگاسى» ۇيىمداستىرىلدى. ماۋسىم ايىنان باستالعان بۇل تۋرنير وتكەن اپتانىڭ سوڭىندا مارەسىنە جەتتى.
بۇل تۋرنير بالالاردىڭ جازعى دەمالىسىن ءتيىمدى وتكىزۋگە سەپتىگىن تيگىزدى. اۋلا ىشىندە توپ-توپقا ءبولىنىپ, فۋتبول ويناعان كىشكەنتايلاردىڭ ءبارى بىرىگىپ, ءبىر توپ بولىپ, وسى تۋرنيردە ءوز اۋلالارىنىڭ ابىرويىن اسىرۋعا بارىن سالدى. فۋتبول دەسە ىشەر اسىن جەرگە قوياتىن 200-دەن اسا ءبۇلدىرشىن وسى دودادا 12 كوماندانىڭ قۇرامىندا دوپ تەپتى. وسىناۋ دۋماندى سايىستى ۇيىمداستىرۋعا «اسىل بالا» رەسپۋبليكالىق قاۋىمداستىعى مەن «وليمپيونيك» الەۋمەتتىك قورى مۇرىندىق بولدى.
ءتۋرنيردىڭ شەشۋشى ماتچتارى «استانا-ارەنا» ستاديونىندا
ءوتتى. وسى كۇنگە دەيىن ىرىكتەلىپ شىققان «زامانداس», «7 كونتينەنت», «جاس قىراندار», «وتانداستار» كوماندالارى الدىمەن جارتىلاي فينالدا كەزدەستى.
– بۇل اۋلالار اراسىندا وتكەن دوپ دوداسى بالالار تۇگىل اتا-انالاردى دا قاتتى قىزىقتىردى. بۇرىن ءۇي الدىنداعى الاڭدا شاشىراپ, ءوز-وزدەرىمەن دوپ تەۋىپ جۇرگەن بالالاردىڭ ءبارى جينالىپ, ءبىر كوماندا قۇرىپ, ءبىر-بىرىمەن تانىسىپ, دوستاسىپ كەتتى. سوندىقتان باستى ماقسات – جەڭىس ەمەس, بالالاردىڭ بىرلىگى. ءبىزدىڭ بالامىز ميراس قايراتوۆ – كوماندامىزدىڭ قاقپاشىسى. اۋلامىزدان وسى تۋرنيرگە 12 بالا قاتىستى. تۋرنيردە ءتورتىنشى ورىنعا تۇراقتادىق. كادىمگى فۋتبول تۋرنيرلەرىندەگىدەي «ۇيدە-قوناقتا» سەكىلدى كوماندالار ءبىر-بىرلەرىنىڭ اۋلالارىنا بارىپ وينادى. وسى ءتۋرنيردىڭ ارقاسىندا بالالارىمنىڭ كومپيۋتەر ويناۋعا مۇلدەم قۇلىقتارى بولمادى, – دەيدى رۋسلان قاراتاەۆ.
سونىمەن, «اۋلالىق يۋنيورلار ليگاسىنىڭ» جەڭىمپازى
«7 كونتينەنت» كومانداسى بولدى. ودان كەيىنگى ورىن «وتانداستار» كومانداسىنا بۇيىردى. تۋرنير قورىتىندىسى بويىنشا «ۇزدىك شابۋىلشى» بولىپ ايان سەيىتجاپپاروۆ اتاندى. ال «ۇزدىك قورعاۋشى» ءامىرحان ەسەنوۆ بولسا, «ۇزدىك قاقپاشى» اتالىمىن ميراس قايراتوۆ يەلەندى.
ەندى بۇل ەكى كوماندا مەن ۇزدىك ويىنشىلار «ميلان» يتاليالىق فۋتبول كلۋبىنان شاقىرىلعان جاتتىقتىرۋشىلاردىڭ شەبەرلىك ساباعىنا قاتىسادى. اتالمىش كلۋبتىڭ بالالار اكادەمياسىنان كەلەتىن وكىلدەرى 23 تامىزدا استاناعا تابان تىرەيدى.
شارا سوڭىنا قاراي ءىزباسارلارىنا قولداۋ كورسەتۋ ءۇشىن «استانا» فۋتبول كلۋبىنىڭ ويىنشىلارى نەناد ەريچ, روحەر كانياس, نەمانيا ماكسيموۆيچ, ازات نۇرعاليەۆ جانە يۋري لوگۆينەنكو كەلدى. ولار ماراپاتتاۋ راسىمىنە قاتىسىپ, جاس فۋتبولشىلارمەن سۋرەتكە ءتۇسىپ, تىلەكتەرىن جەتكىزدى.
ورىنبەك وتەمۇرات
