15 قازاندا «استانا وپەرا» تەاترىندا قازاقستان جانە تاتارستان رەسپۋبليكالارىنىڭ حالىق ءارتىسى نۇرجامال ۇسەنباەۆانىڭ مەرەيتويلىق كونتسەرتى وتەدى. بەلگىلى وپەرا ءانشىسى ساحنادا جۇرگەنىنە 30 جىل تولۋىنا وراي, ءوز كورەرمەندەرىنە «ونەرىم – ءومىرىم» اتتى كونتسەرتتىك باعدارلاماسىن ۇسىنباق.
كەشكە ۋكراينانىڭ حالىق ءارتىسى يگور بوركو (تەنور), چەح باريتونى – فيليپپ باندجاك كەلەدى. سونىمەن قاتار «استانا وپەرا» تەاترىنىڭ سوليستەرى دينا حامزينا, مەدەت شوتاباەۆ, مەيىر باينەشوۆ ونەر كورسەتەدى. ديريجەرلىق تىزگىندى تاتارستاننىڭ حالىق ءارتىسى – ماەسترو رەنات سالاۋاتوۆ ۇستايدى. كونتسەرت «استانا وپەرا» سيمفونيالىق وركەسترى, حورى جانە بالەتىنىڭ قاتىسۋىمەن وتەدى.
نۇرجامال ۇسەنباەۆا اتالمىش كونتسەرتتىڭ وپەرا ونەرىن سۇيەتىن جانە باعالايتىن قاۋىم الدىندا تاپسىراتىن ەمتيحان بولاتىنىن ايتادى. «مەن وسى باعدارلامامەن قازاقستاننىڭ وزگە قالالارىندا كونتسەرت بەردىم. الايدا, «استانا وپەرا» تەاترىنىڭ اسەم ساحناسىندا ءان سالۋ – مەن ءۇشىن ۇلكەن جاۋاپكەرشىلىك ءارى قۇرمەت» دەيدى ول.
بۇل كەشتە كورەرمەن قازاق جانە ەۋروپا كومپوزيتورلارىنىڭ وپەرالارىنان ۇزىندىلەر تىڭداي الادى. نۇرجامال ۇسەنباەۆا يگور بوركومەن «مارجان ىزدەۋشىلەر» وپەراسىنان لەيلا مەن ءنادىر دۋەتىن, فيليپپ باندجاكپەن «سايقىمازاقتار» وپەراسىنان سيلۆيو مەن نەددا دۋەتىن شىرقاماق. «مەن ءۇشىن ساحناداعى بارلىق كەيىپكەرلەرىم قىمبات. نەگە دەسەڭىز, سول بەينەلەردى سومداۋ بارىسىندا بويىڭداعى بارلىق قاسيەتىڭدى شىعارىپ, جانىڭدى بەرەسىڭ. ءاربىر كەيىپكەر وزىنشە ەرەكشە. ءار ورىنداعان سايىن مەن ول بەينەنى بۇرىنعىدان وزگەشە, جاڭاشا وينايمىن. وسىلايشا, ءرولدى جانە ءوزىمدى جاڭا قىرىنان تانيمىن» دەيدى ءانشى.
