قادىرلى وقىرمان قاۋىم, بۇگىن قولدارىڭىزعا ءتيىپ وتىرعان «استانا اقشامى» گازەتى ءۇش مىڭىنشى نومىرمەن شىقتى. ياعني, بۇرىنعى اقمولا, قازىرگى استانا قالاسىنىڭ رەسمي ءباسپاسوز ورگانى رەتىندە ەل مەن ەلوردامىزدىڭ تىنىس-تىرشىلىگىن ءۇش مىڭ مارتە جارىققا شىعارىپ, تاريحتىڭ پاراعىنا قاتتاعان ەكەن.
گازەتىمىزدىڭ ەڭ العاشقى اقجولتاي شىعارىلىمى سوناۋ 1990 جىلدىڭ 13 قازان كۇنى وقىرمان قولىنا تيگەن بولاتىن. بۇل كەزدە قالانىڭ اتاۋى ءالى تسەلينوگراد ەدى. دەگەنمەن, سول كەزدەگى قالا باسشىلىعىنىڭ قولداۋىمەن, «ءتىل جانە مادەنيەت» قوعامدىق ۇيىمى قاتارىنداعى ۇلتجاندى ازاماتتاردىڭ تەگەۋرىندى تالابىمەن, گازەتكە رەداكتور بولىپ تاعايىندالعان جاس جۋرناليست كەنجە جۇماعۇلوۆتىڭ تاباندىلىعىمەن «اقمولا اقيقاتى» بولىپ جارىق كوردى. سودان بەرى قالا تىرشىلىگىمەن بىتە قايناسىپ, الەۋمەت پەن ۇلتتىڭ مۇددەسىن جاقتاعان ۇستانىمى ارقىلى وقىرمان جۇرەگىنە جول تاپقان باسىلىمعا اينالدى.
قالانىڭ ەلوردا مارتەبەسىن العان ساتىنەن باستاپ گازەتتىڭ ەكىنشى تىنىسى اشىلا ءتۇستى. ۋاقىت ۇردىسىمەن «استانا اقشامى» اتاندى. گازەت باسشىلىعىنا تالاپ كۇشەيدى. اپتالىق شىعارىلىمى دا, جالپى تارالىمى دا ۇلعايدى. ەلباسىنىڭ ەرەن ەرلىگى مەن كورەگەندىگى ارقاسىندا ەسىلدىڭ جاعاسىنان بوي كوتەرە باستاعان جاڭا استانانىڭ العاشقى قاداسى قالاي قاعىلعانى, كىرپىشى قالاي قالانعانى تۋرالى اقجولتاي اقپاراتتار, قۇرىش بىلەك قۇرىلىسشىلاردىڭ جۇمىس الاڭىنان, ساياسي-مادەني شارالار ساحنالارىنان رەپورتاجدار ۇزدىكسىز بەرىلە باستادى. استانا اتانعان عاجايىپ قۇرىلىستىڭ قايناعان تىرلىگىن جان-جاقتى كورسەتۋ ءۇشىن بىلىكتى جۋرناليستەردىڭ قاجەت بولعانى دا انىق. وسى ورايدا «استانا اقشامى» گازەتىنە رەسپۋبليكامىزدىڭ بارلىق ايماقتارىنان قارىمدى قالامگەرلەردىڭ كەلىپ ەڭبەك ەتكەنىن ماقتانىشپەن ايتۋعا بولادى. ءار جىلداردا گازەت باسشىسى قىزمەتىن اتقارعان جۇماگۇل ساۋحات, ماعجان سادىحانۇلى, نۇرتورە ءجۇسىپ, امانتاي ءشارىپ سىندى قالامگەرلەر استانالىق باسىلىمدا ايشىقتى ىزدەرىن قالدىردى. بۇگىندە ارىپتەستەر اراسىندا «استانا اقشامى» شاڭىراعىنان شىققان دەگەن ءسوز ءداستۇرى دە قالىپتاسقان. قانشاما جاس جۋرناليستەر وسى گازەتتە ەڭبەك جولىن باستاپ, بۇگىندە ءتۇرلى ءباسپاسوز قۇرالدارىندا جەمىستى جۇمىس ىستەپ ءجۇر. ال وسى گازەتكە ءار جىلداردا شىعارماشىلىق جاردەم كورسەتۋ ءۇشىن كەلگەن مايتالمان قالامگەرلەر جانبولات اۋپباەۆ, ديداحمەت ءاشىمحانۇلى, باۋىرجان ومارۇلىنىڭ «استانا اقشامىندا» قىزمەت ىستەگەن كەزدەرىن ىستىق ىلتيپاتپەن ەسكە الىپ جۇرەتىندەرىنە مارقايىپ قويامىز.
بۇل دا گازەتتە ۇرپاقتار ساباقتاستىعى ءداستۇرى قالىپتاسقانىن كورسەتسە كەرەك.
سونىمەن, جيىرما جىلدان اسقان تاريحى بار استانالىق گازەتتىڭ ءۇش مىڭىنشى سانى دا جارىققا شىقتى. ولاي بولسا, باس قالامىزدىڭ اقپاراتتىق بارومەترى, قاجەت دەسەڭىز, ەنتسيكلوپەدياسىنا اينالىپ وتىرعان «استانا اقشامىنىڭ» بۇگىنگى شىعارماشىلىق ۇجىمىنىڭ ايتارى: گازەتتىڭ وقىرمانمەن جۇزدەسۋى ەشقاشان ۇزىلمەسىن!
عالىم قوجابەكوۆ
Kozhabek63@mail.ru
