قالالىق ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسياسىنىڭ وتىرىسىندا ەلورداداعى بىرقاتار باسقارمالاردىڭ الداعى 2015-2017 جىلدارعا ارنالعان بيۋدجەت جوباسى تالقىلاندى.
نەگىزگى ءبولىم بويىنشا ءسوز العان استانا قالاسىنىڭ ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى گۇلنار ءجۇسىپوۆا دەپۋتاتتاردىڭ قاراۋىنا 2015-2017 جىلدارعا ارنالعان بيۋدجەتتىڭ جوباسىن ۇسىندى. وسىعان وراي, باس قالاداعى ءبىلىم, ىشكى ساياسات, جاستار ماسەلەلەرى جونىندەگى باسقارمالار مەن تۋريزم, دەنە تاربيەسى جانە سپورت باسقارمالارىنىڭ باسشىلارى بايانداما جاسادى.
قاي سالاعا بولسىن قوسىمشا قاراجات قاجەت. ماسەلەن, ءبىلىم باسقارماسى باسشىسىنىڭ مىندەتىن اتقارۋشى باعلان سماتاەۆانىڭ ايتۋىنشا, بۇل سالادا 1-4 سىنىپ وقۋشىلارىن تاماقتاندىرۋ, كەيبىر مەكتەپتەردەگى ەسكىرگەن كومپيۋتەرلەردىڭ ورنىنا جاڭاسىن ساتىپ الۋ جانە ءبىرنەشە ءبىلىم بەرۋ مەكەمەسىنە كۇردەلى جوندەۋ جۇمىسىن جۇرگىزۋ ءۇشىن قوسىمشا قارجى كەرەك ەكەن.
الداعى ءۇش جىلعا جوسپارلانعان شارالاردى جۇزەگە اسىرۋ ءۇشىن جاستار ساياساتى ماسەلەلەرى جونىندەگى باسقارماعا 1 819,5 ملن تەڭگە, سونىڭ ىشىندە 2015 جىلعا 707,2 ملن تەڭگە قاجەت. وسى جونىندە مالىمدەگەن اتالمىش باسقارمانىڭ باسشىسى تالعات راحمانبەردى كەلەسى جىلى قازاق حاندىعىنىڭ 550 جىلدىعىنا, سونىمەن قاتار, ۇلى جەڭىستىڭ 70 جىلدىعى مەن 2015 جىلدىڭ قازاقستان حالقى اسسامبلەياسىنىڭ جىلى دەپ جاريالانۋىنا بايلانىستى جانە استانا قالاسىنىڭ بەيبىتشىلىك پەن كەلىسىم قالاسى بولىپ اتالۋىنا وراي جاستاردىڭ اراسىندا كەڭ اۋقىمدى يدەولوگيالىق ءىس-شارالار وتكىزىلەتىنىن ايتتى.
ىشكى ساياسات باسقارماسىنا قوسىمشا 40 ملن تەڭگە قاجەت بولسا, قالالىق تۋريزم, دەنە تاربيەسى جانە سپورت باسقارماسىنىڭ الداعى ءۇش جىلدىق شىعىندارىنا 18 513,7 ملن تەڭگە, سونىڭ ىشىندە 2015 جىلعا – 5 879,8 ملن تەڭگە كەرەك كورىنەدى. باسقارما باسشىسىنىڭ مىندەتىن اتقارۋشى سامات قابدۋلين بۇل رەتتە قالانىڭ قۇراما كوماندالارى مۇشەلەرىن رەسپۋبليكالىق, حالىقارالىق جارىستارعا
دايىنداپ قاتىستىرۋعا, رەسپۋبليكالىق ماڭىزداعى سپورتتىق ءىس-شارالاردى وتكىزۋگە, سونداي-اق, بالالار مەن جاسوسپىرىمدەرگە سپورتتىق ءبىلىم بەرۋگە قوسىمشا قاراجات قاجەتتىگىن العا تارتتى.
حالىق قالاۋلىلارى دا ءۇنسىز قالمادى. دەپۋتات ا.كۇرىشباەۆ كەيبىر ستۋدەنتتەر ءۇشىن قوعامدىق كولىكتەردەگى جول ءجۇرۋ اقىسىن تولەۋدىڭ ەداۋىر قيىندىق تۋعىزىپ وتىرعانىنا الاڭداۋشىلىق ءبىلدىردى. ونىڭ ايتۋىنشا, اي سايىن ستۋدەنتتەر ۋنيۆەرسيتەتكە كەلىپ-كەتۋگە عانا شامامەن 9-10 مىڭ تەڭگە جۇمسايدى ەكەن. ال, الماتىدا كوپ بالالى, از قامتىلعان وتباسىلاردان شىققان ستۋدەنتتەر ءۇشىن جولاقى بيلەتتەرىنىڭ قۇنى ارزان.
– استانادا نەبارى 5 جوعارى وقۋ ورنى بار. وزدەرىڭىز بىلەسىزدەر, ءبىزدىڭ اگروتەحنيكالىق ۋنيۆەرسيتەتتە وقيتىنداردىڭ كوبى – اۋىلدان كەلگەن بالالار. ولاردىڭ جاعدايى كەرەمەت دەپ ايتا المايمىز. ءويتكەنى, اۋىلدا جۇمىس جوق. سوعان بايلانىستى الەۋمەتتىك جاعىنان قورعالماعان وتباسىلاردان شىققان وسىنداي ستۋدەنتتەر ءۇشىن ايلىق جولاقى بيلەتىنە 50 پايىز جەڭىلدىك قاراستىرىلۋىن سۇرايمىن. بۇل ماسەلە استانادا دا وڭ شەشىمىن تابۋى كەرەك, – دەدى ا.كۇرىشباەۆ.
ودان ءارى دەپۋتات قالا مەكتەپتەرىندەگى ءۇش اۋىسىمدىق وقىتۋدىڭ جايىن سۇرادى. وسىعان وراي, گ.ءجۇسىپوۆا جاڭادان اشىلىپ جاتقان مەكتەپتەر سانىنىڭ جىل وتكەن سايىن ارتا تۇسۋىنە بايلانىستى بۇگىنگى تاڭدا ءبىزدىڭ قالادا بۇل ماسەلە اسا وزەكتى ەمەس ەكەنىن ەسكەرتتى. دەپۋتات ب.سولسانوۆ قالاداعى №20 مەكتەپ وقۋشىلارىنىڭ ءۇش اۋىسىمدا وقيتىنىن, اتالمىش ءبىلىم بەرۋ مەكەمەسىنىڭ عيماراتى قۇلاۋدىڭ از-اق الدىندا تۇرعانىن جەتكىزدى.
كۇن تارتىبىندەگى ەكىنشى ماسەلەگە وراي بايانداما جاساعان قالالىق تۋريزم, دەنە تاربيەسى جانە سپورت باسقارماسى باسشىسىنىڭ مىندەتىن اتقارۋشى سامات قابدۋلين باس قالادا تۋريزم باسقارماسىن قۇرۋ كەرەك دەگەن پىكىر ءبىلدىردى. ءماسليحاتتىڭ تۇراقتى كوميسسياسىنىڭ مۇشەلەرى بۇل ۇسىنىستى ءبىراۋىزدان ماقۇلدادى.
گۇلبارشىن وكەشقىزى
