فۋتبولدان قازاقستان ۇلتتىق قۇراماسى فيفا رەيتينگىندە 18-ورىندا تۇرعان, كەزىندە ەۋروپا چەمپيونى بولعان دانيا قۇراماسىن ۇتتى. ۇتقاندا 0:2 ەسەبىمەن ۇتىلىپ تۇرىپ, جەڭىستى جۇلىپ اكەتتى!
الەمدىك اقپارات كوزدەرى 2024 جىلى وتەتىن ەۋروپا چەمپيوناتىنىڭ ىرىكتەۋ كەزەڭىنىڭ ەكىنشى تۋرىندا قازاقستان فۋتبولشىلارى سەنساتسيا جاسادى دەپ جارىسا جازىپ جاتىر.
كەلەسى ءۇشىنشى تۋردىڭ ويىنىن قازاقستان قۇراماسى 16 ماۋسىمدا سىرت الاڭدا وينايدى. قارسىلاسى – سان-مارينو.
26 ناۋرىزدا كەشكىلىك «استانا ارەنا» ستاديونىنا اسىقتىق. ورتانقول كوماندا ەمەس, فيفا رەيتينگىندە 18-ورىندا تۇرعان ەۋروپا كومانداسى – دانيا قۇراماسىمەن قازاقستان ۇلتتىق قۇراماسى 2024 جىلعى ەۋروپا چەمپيوناتىنىڭ ىرىكتەۋ ساتىسىندا كەزەكتى ويىن وتكىزەدى. ادەتتەگىدەي ورتالىق الاڭعا باراتىن بارلىق كوشەلەردە كولىك كەپتەلىسى ءجۇرىسىمىزدى تەجەدى. ءبارى ستاديونعا باعىت العانى انىق.
1 ساعات 20 مينۋتتا ستاديونعا جەتىپ قۋاندىق-اۋ, الايدا وعان كىرىپ, ورنىمىزعا جايعاسامىز دەگەنشە تاعى جارتى ساعات ۋاقىت ءوتتى. نە كەرەك, بەلگىلەنگەن 19:00-دە ويىن باستالدى. 30 مىڭ ادام ەركىن سىياتىن «استانا ارەنادا» ينە شانشار ورىن جوق. جانكۇيەرلەردىڭ جالىندى قولداۋىنان جىگەرلەنگەن قازاقستان فۋتبولشىلارى ويىندى باستاپ تا كەتتى.
ءا دەگەننەن-اق دانيا شابۋىلدى ۇدەتتى. الاڭداعى جانكۇيەرلەر دەمىن ىشىنە تارتىپ, ەموتسياسىن سابىرعا باسىپ وتىر. ەندى شە, ۇلتتار ليگاسىندا كيليان مباپپە, انتۋان گريزمانن, وليۆە جيرۋ سىندى الەم فۋتبولىنىڭ جۇلدىزدارىنان قۇرالعان فرانتسيا قۇراما كومانداسىن ەكى رەت ۇتقان دانيا وسال كوماندا ەمەس. الەمنىڭ كەز كەلگەن ۇزدىك كومانداسىمەن دەڭگەيلەس, ويىنشىلارىنىڭ شەبەرلىگى شىڭدالعان. ءارى ەۋروپانىڭ ۇزدىك فۋتبول كلۋبتارىندا ونەر كورسەتەدى.
قىسقاسى, كەزدەسۋدە دانيالىق فۋتبولشىلاردىڭ باسىمدىعى بايقالىپ تۇردى. ناتيجەسىندە راسمۋس حەيلۋنن 21-مينۋتتا ءبىزدىڭ قاقپاشى داۆيد لوريانىڭ ۇستىنەن دوپتى اسىرىپ جىبەرىپ, قاقپادان ساڭىلاۋ تاپسا, 36-مينۋتتا ەسەپتەگى باسىمدىقتى ارتتىرىپ, قوس گولدىڭ اۆتورى اتاندى.
ماگومەد اديەۆ, قازاقستان ۇلتتىق
قۇراماسىنىڭ باس باپكەرى:
– ويىنشىلارمەن اڭگىمەلەسىپ, جاۋاپكەرشىلىكتى ءوز موينىما الاتىنىمدى, جىگىتتەرگە تەك ويناۋ كەرەگىن ءتۇسىندىردىم. دانيامەن كەزدەسۋدە ءبىرىنشى كەزەڭ ءبىز ويلاعانداي بولعان جوق. ەكى گولدىڭ سوعىلۋى قاتەلىك سالدارىنان بولدى. ەكىنشى كەزەڭدە ويىنشىلاردىڭ ءبىر-ءبىرىن ءتۇسىنۋى قالىپقا كەلە باستادى. ونى وڭتايلى پايدالانا الدىق.
ەكىنشى كەزەڭدە قازاقستان فۋتبولشىلارى بەلسەندىلىك بايقاتىپ, شيراق قوزعالىپ, ۇرىمتال ساتتەردى ۇتىمدى پايدالانۋعا تىرىستى. ءسويتىپ قارسىلاس كوماندانىڭ قاقپاسى ماڭىندا ءجيى بوي كورسەتتى. ويىننىڭ 73-مينۋتىندا دانيالىق فۋتبولشىلار ءوزىنىڭ ايىپ الاڭىندا ەرەجە بۇزدى. ون ءبىر مەترلىك پەنالتيدى باكتيەر زاينۋتدينوۆ ساۋاتتى ورىنداپ, ەسەپ ايىرماسىن قىسقارتتى.
ال 86-مينۋتتا اسحات تاعىبەرگەننىڭ الىستان شىرەنە تەپكەن دوبى قاقپا تورىنان تابىلىپ, ەسەپ تەڭەستى. وسى ساتتە جاڭادان بەرى ەموتسياسىن ىشىنە ساقتاپ وتىرعان قازاقستاندىق جانكۇيەرلەردىڭ داۋىسى الاڭدا جاڭعىرىپ, قۇلاقتى جارىپ جىبەرەردەي اسەر ەتتى. تەڭىزدىڭ تولقىنىنداي تۋلاعان جانكۇيەرلەر ءبىر وتىرىپ, ءبىر تۇرىپ, ستاديوندا مەرەكەلىك كوڭىل كۇي ورناتتى. قىزىقتىڭ كوكەسى الدا ەكەن. ارادا ءۇش مينۋت وتكەندە, ياعني 89-مينۋتتا اۋەلەپ كەلگەن دوپتى ابات ايىمبەتوۆ باسپەن قاقپاعا ەنگىزدى. «استانا ارەناعا» جينالعان كورەرمەندەردىڭ قۋانىشىندا شەك جوق. ءبىرى جىلاپ, ەكىنشىسى قۋانىپ جاتىر. بۇل ەموتسيانى سوزبەن ايتىپ جەتكىزۋ قيىن…
وسىلايشا, قازاقستان قارسىلاسىنان 3:2 ەسەبىمەن باسىم ءتۇسىپ, سەنساتسيا جاسادى. ەكى كوماندا بۇعان دەيىن ءتورت مارتە كەزدەسكەن-ءدى. ونىڭ بارلىعىندا دانيالىق فۋتبولشىلار جەڭىسكە جەتتى. بۇل جولى قازاقستاندىق قۇراما سول كەتكەن ەسەنى قايتاردى.
ەندى قازاقستان الداعى ويىنىن 16 ماۋسىمدا سىرت الاڭدا سان-مارينوعا قارسى وتكىزەدى.
ايتا كەتەيىك, قازاقستان قۇراما كومانداسى «ن» توبىندا سان-مارينو, سولتۇستىك يرلانديا, فينليانديا, سلوۆەنيا قۇراماسىمەن وينايدى.
