كەشە ۇلتتىق سۋرەت گالەرەياسىندا ءوز سالاسىندا جوعارى جەتىستىكتەرگە جەتكەن كاسىپكەرلەر ماراپاتتالدى.
«شاعىن جانە ورتا كاسىپكەرلىكتى دامىتۋ سالاسىنداعى جەتىستىگى ءۇشىن» بايقاۋى 2006 جىلدان بەرى ءداستۇرلى ءتۇردە وتكىزىلىپ كەلەدى. بۇل ءمارتەبەلى شارا عانا ەمەس, بيزنەس جەتىستىگىن تانىستىرۋعا, تاجىريبە الماسۋعا, سەرىكتەس ىزدەۋگە جانە جاڭا شارتتار جاساسۋعا ارنالعان بىردەن-ءبىر الاڭ بولىپ تابىلادى. سونىمەن بىرگە, بۇل – كاسىبىن ءناسىپ ەتكەن جانداردى ىنتالاندىراتىن سايىس. وسى بايقاۋ ارقىلى جەڭىمپازدار ءوزىنىڭ ماقساتتى اۋديتورياسىن كەڭەيتىپ, ساراپشىلار كەڭەسىن الىپ, جاڭا مۇمكىندىكتەرگە قول جەتكىزە الادى.
سونىمەن بيىل دا ءۇش نوميناتسيا بويىنشا ءوتكەن بايقاۋدىڭ «قىزمەت كورسەتۋ سالاسىنداعى ۇزدىك كاسىپكەر» اتالىمى بويىنشا «التىن ادام» مەيرامحاناسى جەڭىمپاز بولدى. «جىلدىڭ ۇزدىك كاسىپكەرى» رەتىندە «استانا نانى» جشس تانىلسا, «ءوندىرىس سالاسىنداعى ءۇزدىك كاسىپكەر» اتالىمىندا «الكون+» جشس ءبىرىنشى ورىندى يەلەندى.
قىمبات نۇرعالي
