مۇعالىمدەر كۇنى قارساڭىندا ەلىمىزدە «ۇزدىك پەداگوگ» بايقاۋى باستالدى. جەڭىمپازدارعا 3 ملن تەڭگە كولەمىندە سىياقى بەرىلەدى. بىلتىر ەلىمىزدىڭ ءار وڭىرىنەن 64 مۇعالىم 3 ملن تەڭگەدەن العان بولاتىن. بيىل بايقاۋ ون ءبىرىنشى رەت وتكىزىلگەلى وتىر.
كونكۋرسقا مەكتەپكە دەيىنگى, ورتا, تەحنيكالىق جانە كاسىپتىك ءبىلىم بەرۋ ۇيىمدارىنىڭ شتاتتاعى پەداگوگتەرى قاتىسا الادى. بيىل تسيفرلاندىرۋ باعىتىندا ۇلكەن جۇمىس اتقارىلدى. بايقاۋدىڭ بارلىق كەزەڭى, ناقتىراق ايتقاندا, قاتىسۋشىلاردى تىركەۋدەن باستاپ رەسپۋبليكالىق كەزەڭنىڭ قورىتىندىسىن شىعارۋعا دەيىن تولىعىمەن تسيفرلاندىرىلعان.
قۇجاتتاردى قابىلداۋ 12 قىركۇيەكتە باستالىپ, 2022 جىلعى 22-قىركۇيەككە دەيىن جالعاسادى. بايقاۋ تۋرالى اقپارات ەلىمىزدىڭ بارلىق 380 مىڭ مۇعالىمى پايدالاناتىن kundelik.kz جۇيەسىندە ورنالاستىرىلادى.
سونداي-اق بايقاۋ تاريحىندا العاش رەت بارلىق كەزەڭ, ياعني قاتىسۋعا وتىنىمدەردى قابىلداۋ, تىركەۋ, كونكۋرس قۇجاتتارىن تاپسىرۋ, باعالاۋ https://teachercontest.iac.kz/ ۆەب-پورتالىندا جۇزەگە اسىرىلادى.
«بۇل بايقاۋدىڭ ماڭىزى زور, ويتكەنى ول ۇزدىكتەردىڭ ىشىندەگى ونداعان ۇزدىك پەداگوگتىڭ ەڭبەگىن تانۋعا مۇمكىندىك بەرەدى. جۇلدە قورىن ۇلعايتتىق جانە بۇل مىقتى مامانداردىڭ ماماندىققا كەلۋىنە تۇرتكى بولىپ, وسى كاسىپتە ونداعان جىلدار بويى ەڭبەك ەتىپ كەلە جاتقان ماماندارعا كورسەتىلگەن قۇرمەت بولادى دەپ سەنەمىز. «ۇزدىك پەداگوگ» اتاعىنا ءبىلىم بەرۋ ۇيىمدارىندا جۇمىس ىستەيتىن جانە قۇجاتتاردى تاپسىرۋ كەزىندە كەمىندە بەس جىل ۇزدىكسىز پەداگوگيكالىق ءوتىلى بار پەداگوگتەر ۇمىتكەر بولا الادى. بۇل – بالاباقشا, مەكتەپ, كوللەدج مۇعالىمدەرى. بايقاۋ اياسىندا مۇعالىمنىڭ ءبىلىم سالاسىن دامىتۋعا قوسقان ۇلەسى, ۇستاز قىزمەتىنىڭ تيىمدىلىگى مەن ونىڭ كاسىبي شەبەرلىگى ەسكەرىلەدى. ءبىر ايتا كەتەرلىگى, جىلدان جىلعا ۇمىتكەرلەر سانى عانا ەمەس, ولاردىڭ دايىندىق دەڭگەيى دە ارتىپ كەلەدى. بۇل جالپى ءبىلىم ساپاسى مەن پەداگوگ مارتەبەسىنىڭ ارتقانىن كورسەتەدى. بيىل بايقاۋعا قاتىساتىن ءاربىر پەداگوگ ساۋالنامانى تولتىرعاننان كەيىن كونكۋرستىڭ ودان ارعى ديناميكاسىن باقىلاي الادى, مىسالى, قاتىسۋشىلار قاي كەزەڭدە تۇر, ولارعا ساراپشىلار قانداي ۇپاي قويدى» دەپ ءتۇسىندىردى قر وقۋ-اعارتۋ مينيسترلىگىنىڭ ورتا ءبىلىم بەرۋ كوميتەتى توراعاسى گۇلميرا كارىموۆا.
بايقاۋ ءۇش كەزەڭنەن تۇرادى:
– I كەزەڭ – اۋداندىق, قالالىق دەڭگەي;
– II كەزەڭ – وبلىستىق دەڭگەي;
– III كەزەڭ – رەسپۋبليكالىق دەڭگەي.
ەكى بايقاۋدىڭ قورىتىندىسى بويىنشا ەڭ جوعارى بالل جيناعان مۇعالىمدەر رەسپۋبليكالىق دەڭگەيگە وتەدى.
رەسپۋبليكالىق «ۇزدىك پەداگوگ» بايقاۋى 2012 جىلدان بەرى وتكىزىلىپ كەلەدى. وسى ۋاقىت ارالىعىندا بايقاۋ اياسىندا مەكتەپكە دەيىنگى جانە ورتا, تەحنيكالىق جانە كاسىپتىك ءبىلىم بەرۋ ۇيىمدارىنىڭ 600-گە جۋىق ۇزدىك پەداگوگى انىقتالدى.
«ۇزدىك پەداگوگ» اتاعىنىڭ يەگەرلەرىنە 3 ملن تەڭگە كولەمىندەگى اقشالاي سىياقى عانا ەمەس, توسبەلگىلەر دە بەرىلەدى.
