ماحامبەت وتەمىسۇلى اتىنداعى وقۋشىلار سارايىندا وتكەن «جۇلدىزدى شاشۋ» ءىح قالالىق پەداگوگيكالىق فەستيۆالى اياسىندا ۇزدىك التى ۇستاز ەسىمى «استانا قالاسى ءبىلىم سالاسىنىڭ التىن قورى» كىتابىنا ەندى.
مەرەكەلىك باعدارلاما تەاترلاندىرىلعان كورىنىسپەن اشىلدى. قىسقا دا نۇسقا قويىلىمداعى وقۋشىلار جەتكىزگەن نەگىزگى وي: ۇستازدار قاراڭعىلىق كوگىن بىلىممەن ءساۋلەلەندىرگەن – اسىل شام. كەش بارىسىندا جۇگىنىسوۆتەر تريوسى, مەيىر باينەش, شاندوس جۇماعاليەۆا استانا جايلى ءان شىرقاپ, مۇعالىمدەر قوشەمەتىنە بولەندى. سونداي-اق, «سوزۆەزديە» بي ءانسابلى ۆالس پەن «چا-چا-چا» بيلەرىن ورىندادى.
فەستيۆالدىڭ باستى ماقساتى – كونتسەرت قانا ەمەس. شاقىرىلعان استانالىق مۇعالىمدەردى ءبىلىم باسقارماسى باسشىسىنىڭ ورىنباسارى قاسىمحان سەنعازيەۆ قۇتتىقتاپ, قر ءبىلىم جانە عىلىم مينيسترلىگىنىڭ, استانا قالاسى ءبىلىم باسقارماسىنىڭ العىس حاتتارىن تاپسىردى جانە وسى كەشتە 2013-2014 وقۋ جىلىنداعى سپارتاكيادا مەن «ديدارلى جاز» سپورت الاڭدارىنىڭ قورىتىندىلارى شىعارىلدى. ال, ارداقتى ۇستازدار الفيا گيلمۋللينا, گۇلنارا عالياسقاروۆا, سۆەتلانا يبراەۆا, ليۋبوۆ ۋرۋسوۆا, كاميلا بايسقاقوۆا مەن نايلا كۋكانوۆا ەسىمدەرى سالتاناتتى تۇردە «استانا قالاسى ءبىلىم سالاسىنىڭ التىن قورى» كىتابىنا ەنگىزىلدى.
