ۇزدىكتەر ۇپاي ءبولىستى

فۋتبولدان قازاقستان چەمپيوناتىنىڭ پرەمەر-ليگاسىندا ون جەتىنشى تۋردىڭ ويىندارى ءوتتى.

بۇل تۋردىڭ ورتالىق ماتچىندا «استانا» مەن «ەرتىس» كەزدەستى. تۋرنير كەستەسىندە سايكەسىنشە ءبىرىنشى جانە ەكىنشى ورىندا كەلە جاتقان قوس كوماندانىڭ ويىنى كوپشىلىك كۇتكەندەي وتە تارتىستى جاعدايدا ءوربىدى. قورعانىسقا اسا ءمان بەرىپ ويناعاندىقتان, ءبىرىنشى تايمدا ەسەپ اشىلمادى. دەگەنمەن, استانالىقتار بىرنەشە قاۋىپتى شابۋىل ۇيىمداستىرا الدى. الايدا, قوناقتار قاقپاشىسى شەبەرلىگىمەن كوزگە ءتۇستى.
ويىننىڭ ەكىنشى كەزەڭىن الاڭ يەلەرى جويقىن شابۋىلمەن باستادى. دۇركىن-دۇركىن ۇمتىلىستار ناتيجەسىن بەرمەي قويمادى. ويىننىڭ 51-ءىنشى مينۋتىندا تاڭات نوسەرباەۆ ەسەپ اشتى. «استانا» كاپيتانى ارىپتەسى دميتري شومكونىڭ الىستان بەرگەن پاسىن ادەمى قابىلداپ, الا دوپتى داۆيد لوريا قورعاعان قاقپاعا تۋلاتىپ ءتۇسىردى. الايدا, كوپ ۇزاماي «ەرتىس» فۋتبولشىلارى دا وتە ءساتتى شابۋىل ۇيىمداستىرا ءبىلدى. قوناقتاردىڭ قورعاۋشىسى كەرلا ەسەپتى تەڭەستىرىپ كەتتى.
وسىلايشا, كوش باسىنداعى مىقتىلار تەڭ ءتۇسىپ, ۇپاي ءبولىستى.
تۋردىڭ باسقا ويىندارىندا مىناداي ناتيجەلەر تىركەلدى: «اقتوبە» – «قايرات» 2:6, «شاحتەر» – «اقجايىق» 3:1, «اتىراۋ» – «تاراز» 1:0, «ورداباسى» – «وقجەتپەس» 2:2, «جەتىسۋ» – «توبىل» 0.1.
«استانا» كەلەسى ويىندى 23 ماۋسىمدا الماتىدا «قايرات» كومانداسىمەن وتكىزەدى.