استانا قالاسىنىڭ اكىمدىگىندە قازاقستان رەسپۋبليكاسى سپورت جانە دەنە شىنىقتىرۋ ىستەرى اگەنتتىگى, «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى جانە استانا قالاسىنىڭ اكىمدىگى اراسىندا ۆەلوجول ينفراقۇرىلىمىن دامىتۋ سالاسىندا ءوزارا ارەكەت ەتۋ تۋرالى مەموراندۋمعا قول قويىلدى.
ەلباسى نۇرسۇلتان نازارباەۆ ۆەلوسيپەد سىندى ەكولوگيالىق كولىك ماسەلەسىن ۇنەمى كوتەرىپ كەلەدى. وسىعان بايلانىستى قازاقستان رەسپۋبليكاسى سپورت جانە دەنە شىنىقتىرۋ ىستەرى اگەنتتىگى وتكەن جىلى پرەمەر-مينيسترگە استانا قالاسىندا «ەكسپو-2017» حالىقارالىق كورمەسىنە دايىندىق بارىسىندا ۆەلوينفراقۇرىلىمىن دامىتۋ تۋرالى ۇسىنىس جاساعانىن ايتا كەلە, «سامۇرىق-قازىنا» ۇلتتىق ءال-اۋقات قورىنىڭ باس ديرەكتورى ەرلان داريموۆ بۇل ۇسىنىس «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى مەن استانا قالاسى اكىمدىگى تاراپىنان تولىقتاي قولداۋ تاپقانىن جەتكىزدى. ونىڭ ايتۋىنشا, ءۇش كەزەڭنەن تۇراتىن بۇل جوبا شىلدە ايىنىڭ باسىندا ىسكە اسىرىلا باستايدى. 2015 جىلى ەسىل وزەنىنىڭ سول جاعالاۋى مەن وڭ جاعالاۋ تولىقتاي قامتىلماقشى. ال, ەڭ سوڭعى كەزەڭ – «ەكسپو-2017» قالاشىعىنىڭ اۋماعىندا ورنالاسادى.
جالپى العاندا, قالا بويىنشا 40 ۆەلوبەكەت بولادى جانە ونىڭ بارلىعى سول جاعالاۋداعى مينيسترلىكتەر ۇيىنەن باستاپ ءىرى-ءىرى ساۋدا ويىن-ساۋىق كەشەندەرىنىڭ الدارىنا قويىلادى. 2017 جىلعا قاراي ۆەلوبەكەتتەر قاتارى 100-گە جانە ۆەلوسيپەدتەر سانى 1000-عا جەتەدى دەپ كۇتىلۋدە.
بۇگىنگى تاڭدا الەمدە قالا جاعدايىندا كولىكتىڭ وسى تۇرىنە ويىسۋ ءۇردىسى بايقالادى. قىتايدا ءبىر اۆتوموبيلگە 250 ۆەلوسيپەدتەن كەلسە, دانيا, گەرمانيا, نيدەرلاند سياقتى دامىعان مەملەكەتتەردە ساپاردىڭ 30 پايىزى ۆەلوسيپەد ارقىلى جۇزەگە اسىرىلادى.
جاپونيادا جۇمىسباستى حالىقتىڭ 15 پايىزى قىزمەتىنە وسى ترانسپورت ارقىلى قاتىنايدى. بولاشاقتا ءبىزدىڭ ەلىمىز دە وسىعان اققۇلا كوشەتىنىنە سەنىم بار. سونىمەن قاتار, ۆەلوجولدار ينفراقۇرىلىمىن دامىتۋ قوسىمشا جۇمىس ورىندارىن اشىپ قانا قويمايدى, ەلىمىزدىڭ ءىرى قالالارىنداعى ەكولوگيالىق جاعدايدى جاقسارتىپ, جولداعى كەپتەلەكتىڭ دە ازايۋىنا اسەرىن تيگىزەدى.
گۇلبارشىن وكەشقىزى
