ۆولونتەردىڭ بىرىڭعاي ديسكونت كارتاسى

الداعى «ۆولونتەرلەر جىلىندا» ەرىكتىلەرگە ارنالعان بىرىڭعاي ديسكونت-كارتا ەنگىزىلۋى مۇمكىن. سونىڭ كومەگىمەن ۆولونتەرلەر مادەنيەت جانە سپورت نىساندارىنا جەڭىلدىكپەن كىرە الادى. بۇل تۋرالى كەشە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قالالىق اكىمدىك پەن قازاقستان حالقى اسسامبلەياسىنىڭ مۇرىندىق بولۋىمەن وتكەن «FROM KZ» حالىقارالىق جاستار فورۋمىندا ءمالىم بولدى.جيىندا ءسوز العان نۇر-سۇلتان قالاسى اكىمىنىڭ ورىنباسارى باقتيار ماكەن جاستار جىلىنا وراي جاس ەلوردالىق­تاردىڭ ءبىلىم الۋىنا, جۇمىسپەن قامتى­لۋىنا, سونداي-اق ءوز-وزدەرىن دامىتۋىنا باعىتتالعان بىرقاتار جوبانىڭ جۇزەگە اسقانىن جەتكىزدى.
– «بيزنەستىڭ جول كارتاسى-2020» باعدارلاماسى اياسىندا بيىل 25 جاس كاسىپكەرگە – 75 ملن تەڭگە, ال «جاس كاسىپكەر» ساناتى بويىنشا 110 ملن تەڭگە ءبولىندى. باس-اياعى 220 ادام وزدەرىنىڭ بيزنەس-يدەيالارىن جۇزەگە اسىرۋعا مۇمكىندىك الدى. بۇدان بولەك, الەۋمەتتىك قورعاۋ شارالارىمەن 5086 جاس قامتىلدى. كوپبالالى وتباسىدان شىققان 263 بالاعا نۇر-سۇلتان مەن ەلىمىزدىڭ وزگە وڭىرلەرىندەگى جوعارى وقۋ ورىندارىندا وقۋعا ءبىلىم گرانتى تاپسىرىلدى. سول سياقتى بيىل جۇمىس ىستەيتىن جاستارعا ارناپ العاش رەت 1050 پاتەر 5 جىلعا ساتىپ الۋ قۇقىعىنسىز جالعا بەرىلەدى. بۇل باعدارلاما الداعى ءۇش جىلعا جالعاسادى, – دەدى ول.
مۇنىمەن قوسا قالا اكىمىنىڭ ورىنباسارى مەملەكەت باسشىسىنىڭ 2020 جىلدى «ۆولونتەرلەر جىلى» دەپ جاريا­لاعانىن تىلگە تيەك ەتە كەلە:
– استاناداعى 245 جاستىڭ 82 مىڭى ستۋدەنتتەر بولىپ سانالادى. بيىل جوو-لاردا ۆولونتەرلىكپەن اينالىساتىن 800-دەن استام ستۋدەنتكە قوسىمشا 20 مىڭ تەڭگە سىياقى قاراستىرىلىپ وتىر. كەلەسى جىلى بۇل كۆوتا 50 مىڭ تەڭگەگە دەيىن كوتەرىلەدى, – دەدى.
ەرىكتىلەرگە قاتىستى جاڭا مۇمكىندىكتەر جايلى قحا توراعاسىنىڭ ورىنباسارى جانسەيىت تۇيمەباەۆ تا توقتالدى:
– جۋىردا وتكەن «Social Assembly» رەسپۋبليكالىق فورۋمىندا بەلسەندى جاستار الداعى جىلعا بايلانىستى ءوز ۇسىنىستارىن ايتتى. سولاردىڭ ءبىرى – ءار وڭىرلەردەگى دوستىق ءۇيى بازاسىندا ۆولونتەرلىك قوزعالىس ورتالىقتارىن قۇرۋ. سونداي-اق قحا سايتىندا «Qadam» اتتى تانىمدىق ءبولىم اشىپ, وندا ۆولونتەرلىك قىزمەت ءۇشىن پايدالى بولاتىن كونتەنتتى ورنالاستىرۋ دا الدىمىزعا قويىلعان ماقسات بولىپ وتىر. بۇدان باسقا, الەۋمەتتىك جۇمىس­تاردى اتقارۋ ءۇشىن جاس الەۋمەتتىك كاسىپكەرلەر مەكتەبىن قۇرۋ يدەياسى ۇسىنىلدى. ال ەڭ ماڭىزدىسى رەتىندە ۆولونتەرلەرگە ارنالعان بىرىڭعاي ديسكونت-كارتانى ەنگىزۋ باستاماسىن ايتقىم كەلەدى. سول ارقىلى ەرىكتىلەر ەلىمىزدەگى سپورت جانە مادەني نىساندارعا جەڭىلدىكپەن كىرۋ مۇمكىندىگىن الار ەدى, – دەدى ج.تۇيمەباەۆ.