ەلوردادا جىل باسىنان بەرى 23 جىلى ايالداما سالىندى. بۇگىنگى تاڭدا مەردىگەر ۇيىم ولاردى ەلەكتر قۋاتىنا قوسۋ بويىنشا جۇمىستار جۇرگىزۋدە.
قىسى ايازدى استانادا قوعامدىق كولىكتى كۇتۋ وڭاي ەمەس. قۇپتارلىعى سول, قازىر قالاداعى كوپ ايالدامالاردا كولىكتىڭ نەشە مينۋتتان كەيىن كەلەتىنى تۋرالى اقپارات جازىلعان تابلولار جۇمىس ىستەپ تۇر. كوپشىلىك سوعان قاراپ, وزىنە قاجەتتى اۆتوبۋستىڭ كەشتەۋ كەلەتىنىن بىلسە, ايالدامادا دىردەكتەپ تۇرماس ءۇشىن ەرتەرەك كەلگەن كولىككە وتىرىپ, بارار جەرىنە باسقا اۆتوبۋسپەن اۋىسىپ تەزىرەك جەتۋگە تىرىسۋدا.
استانا قالاسىندا 2015 جىلدان باستاپ جىلى ايالدامالار ورناتىلا باستادى. حالىق كوپ جۇرەتىن جەرلەرگە, اۋرۋحانالار مەن ءدارىحانا, مەكتەپتەردىڭ ماڭىنا سالىنعان وسى جاڭا ايالدامالار ادامداردى جازدا ىستىقتان, قىستا ايازدان قورعايدى. بۇگىنگى تاڭدا قالا بويىنشا 180-نەن استام جابىق تيپتەگى ايالداما پاۆيلونى ورناتىلدى.
اياز كۇشەيگەلى بەرى اۆتوبۋس توسقان تۇرعىندار جىلى ايالدامالاردى بوساتار ەمەس. بۇرسەڭ قاققان بالالار مەن ەرەسەكتەر سۋىق كۇندەردە توڭىپ تۇرماس ءۇشىن جابىق پاۆيلونداردى پانالاپ, جىلىنۋدا. وسىنى ەسكەرە وتىرىپ, قالا اكىمدىگى تۇرعىندارعا قوعامدىق كولىكتى كۇتۋ جايلى بولۋى ءۇشىن جىل سايىن جىلى ايالدامالار سانىن ارتتىرىپ كەلەدى.
سوڭعى جىلدارى ەل يگىلىگىنە پايدالانۋعا بەرىلىپ جاتقان بۇل ايالدامالاردا كونديتسيونەرلەر, جىلىتۋ, جارىقتاندىرۋ, بەينەباقىلاۋ جانە Wi-Fi بار.
جىل باسىنان بەرى قالالىق كولىك جانە جول-كولىك ينفراقۇرىلىمىن دامىتۋ باسقارماسى تاعى 23 ايالداما پاۆيلونىن سالدى. بۇگىنگى تاڭدا مەردىگەر ۇيىم ولاردى ەلەكتر قۋاتىنا قوسۋ بويىنشا جۇمىستار جۇرگىزىپ جاتىر.
اعىمداعى جىلدىڭ سوڭىنا دەيىن مەردىگەر وسى پاۆيلونداردىڭ بارلىعىن جىلۋمەن قامتاماسىز ەتۋگە مىندەتتەنەدى.
