جامبىل ءوڭىرىنىڭ ديقاندارىنىڭ بەرەكەلى قولىمەن وسىرىلگەن الما, المۇرت, ءجۇزىم, باقشا ونىمدەرى, كەپتىرىلگەن ورىك-مەيىز, جاڭعاقتار استانالىقتاردىڭ داستارحانىنا جەتتى. وبلىستىڭ اۋىلشارۋاشىلىق ونىمدەرىنىڭ جارمەڭكەسىنە جينالعان جۇرت كوپ بولدى. 60 ملن. تەڭگە شاماسىنداعى سومانى قۇرايتىن سوقتالى تاۋارلار كۇن قارايعانعا دەيىن ساتىلىپ تا كەتتى.
«جارمەڭكەگە وبلىستىڭ جەتى اۋدانى جانە تاراز قالاسىنىڭ كاسىپكەرلەرى 17 ماشينەگە تيەپ ازىق-تۇلىكتىڭ بارلىق تۇرلەرىن اكەلدىك. ونىڭ ىشىندە 145 توننا كوكونىس, 28 تونناعا جۋىق ەت, 6 توننا ەت-ءسۇت ونىمدەرى, 2 توننا بالىق, 13 توننا بال, كەپتىرىلگەن جەمىس بار» – دەدى جامبىل وبلىسى اكىمىنىڭ ورىنباسارى مۇراتباي جولداسباەۆ.
باعانى ساراپتاي كەلگەنىمىزدە, جامبىلدىقتار الىپ كەلگەن ونىمدەردىڭ باعاسى استانا بازارلارىنان 20 پايىزعا ارزان ەكەن. بۇل وتە قولايلى ءارى استانالىقتاردىڭ قىستىڭ ازىق-تۇلىك قورىن جاساپ الۋىنا زور مۇمكىندىك بەرەدى. مۇنداي جارمەڭكەنى وبلىس تاۋارلارىنىڭ جارناماسى دەۋگە دە بولادى. استانا قالالىق ءماسليحاتىنىڭ حاتشىسى سانسىزباي ەسىلوۆ جارمەڭكە كەزىندە جۋرناليستەرگە بەرگەن سۇحباتىندا, ءار وڭىردەن كەلىپ جاتقان وسىنداي جارمەڭكەلەردىڭ جاقسى داستۇرگە اينالعاندىعىن جانە ول كاسىپكەرلەرگە دە, ەلوردا تۇرعىندارىنا دا ءتيىمدى ەكەنىن اتاپ ءوتتى.
«مۇنداي جارمەڭكەلەر ءداستۇرلى تۇردە ءوتىپ كەلەدى. ەلىمىزدىڭ وبلىستارى ءوز اۋىلشارۋاشىلىعى تاۋارلارى مەن ونىمدەرىن اكەلەدى. مۇنداعى ماقسات-مىندەت تەك ساتۋ, ساۋدا جاساۋ عانا ەمەس, ءوز ونىمدەرىن اكەلۋشىلەر مەن ەلوردا تۇرعىندارى ءۇشىن ءتيىمدى شارت جاساۋ» – دەدى ءماسليحات حاتشىسى.
ايگۇل ۋايسوۆا
