كەشە استانا قالاسىنىڭ اكىمى يمانعالي تاسماعامبەتوۆ بۋداپەشت مەرى يشتۆان تارلوش باستاعان ۆەنگريالىق دەلەگاتسيانى قابىلدادى.
قازاقتى ەجەلدەن تۋىس دەپ تانىپ, جاقىن تارتىپ جۇرەتىن ۆەنگرلەر وسى جولى دا دوستىق قارىم-قاتىناسىن نىعايتا ءتۇسۋ نيەتىمەن استاناعا ات باسىن بۇرىپتى. بۋداپەشت مەرى يشتۆان تارلوش باستاعان دەلەگاتسيانى قابىلداعان ەلوردا اكىمى يمانعالي تاسماعامبەتوۆ قازاق ەلى مەن ۆەنگريا اراسىندا بارلىق سالا بويىنشا بايلانىستار تۇزىلگەنىن, ىنتىماقتاستىق كوكجيەگى كەڭەس زامانىندا-اق ورنىققانىن اڭگىمەسىنە ارقاۋ ەتتى.
– سول كەزدىڭ وزىندە مۇناي-گاز سالاسى بويىنشا ءوزارا كەلىسىمدەر قۇجاتىنا قول قويىلىپ, ءبىراز جۇمىستار يگەرىلگەنى ەسىمىزدە. تەك اتىراۋ وڭىرىنە 10 مىڭعا جۋىق قانداستارىڭىز كەلىپ جۇمىس ىستەدى. ولاردىڭ اراسىندا قازاق قىزدارىنا ۇيلەنگەندەرى دە بارشىلىق. وسىنىڭ ءوزى-اق قازاق-ۆەنگردىڭ اراسىندا ارىپتەستىك قانا ەمەس, تامىرى تەرەڭگە جايىلعان ادامي, تاريحي بايلانىستار جاتقانىن اڭعارۋعا بولادى, – دەدى يمانعالي نۇرعاليۇلى.
سونداي-اق, استانا اكىمى جاقىندا قالالىق ونوماستيكا كوميسسياسى مەن ءماسليحاتتىڭ شەشىمىمەن استانا كوشەلەرىنىڭ بىرىنە بۋداپەشت اتاۋى بەرىلگەنىن جەتكىزدى.
بۇدان كەيىن ول مارتەبەلى مەيماندارعا استانا تۋرالى اڭگىمەلەپ, جاس شاھاردىڭ ءوسۋ-وركەندەۋ تاريحىنا از-كەم توقتالدى. ەلوردا تۇرعىندارىنىڭ سانى بۇگىندە 800 مىڭعا جۋىقتاعانىن, سوڭعى بەس-التى جىلدا تۇرعىن – ءۇي قۇرىلىسى 1,5 ميلليون شارشى مەترگە جەتكەنىن, بۇل كورسەتكىشتىڭ ءوزى جاس قالانىڭ قارقىندى دامىپ كەلە جاتقانىن ايعاقتايدى, – دەدى اكىم. بۋداپەشت سىندى الەمدەگى ادەمى شاھارمەن قويىن-قولتىق ارالاسىپ, تاجىريبە الماسۋ – استانا ءۇشىن ماڭىزدى ەكەندىگىن ايتقان يمانعالي نۇرعاليۇلى:
– ءبىزدىڭ ەل مەن ۆەنگريا اراسىنداعى ساۋدا اينالىمى اۋىز تولتىرارلىقتاي ەمەس. بۇل ماسەلەدە باستاپقى كەزەڭدە تۇرمىز دەۋگە بولادى. قازاقستاندا بىردە-ءبىر ۆەنگر مەكەمەسى تىركەلمەگەن ەكەن. كەزىندە ۆەنگريانىڭ ءوندىرىسى ساپالىلىعىمەن ەرەكشەلەنگەنىن بىلەمىز. بىزگە قاجەتتىسى دە وسى يننوۆاتسيالىق تەحنولوگيا. سوندىقتان بۋداپەشتىڭ بيزنەس وكىلدەرىمەن استانادا كەزدەسىپ, بىرلەسكەن كاسىپورىندار قۇرۋدى ويلاستىرساق, – دەگەن پىكىرىن ءبىلدىردى.
بۇل ۇسىنىستى قۇپ كورگەن بۋداپەشت مەرى وزدەرىن ماديارلار سانايتىن ۆەنگرلەر قازاقتاردى قاشان دا جاقىن تارتاتىنىن, تاريح كوشىندەگى ءوزارا كەلىسىم مەن دوستىق ءۇردىسى بۇگىنگى كۇنى دە كەرەگەسىن كەڭگە جايعانىن قالايتىندارىن جەتكىزدى. ەكى بىردەي قارجىلىق داعدارىستى باستان وتكەرگەن ۆەنگر جۇرتشىلىعىنىڭ قازىرگى احۋالىنا توقتالعان يشتۆان تارلوش مىرزا بۋداپەشتتىڭ دامۋ تاريحىنا دا شولۋ جاسادى. ەندى وسى ءبىر اسەم شاھاردىڭ ءبىر كوشەسى نەمەسە الاڭى استانا دەپ اتالاتىنىن دا قۇلاققاعىس ەتتى.
استانا اكىمىنە قوس استانا اراسىنداعى ارىپتەستىك تۋرالى كەلىسىمنىڭ جوباسىن ۇسىنعان ول:
– ءوز باسىم مادەنيەت جانە سپورت سالاسىنداعى بايلانىسىمىز ەرەكشە ەكپىن السا دەيمىن. ءبىزدىڭ مۋزىكا الەمىنە, انسامبلدەر مەن ۇجىمدار اراسىنداعى تاجىريبە الماسۋعا الاڭىمىز اشىق. ەندىگى كەزەكتە وقۋ ورىندارىنىڭ ءوزارا ارىپتەستىگى دە ارتا تۇسكەنى دۇرىس. بۋداپەشت – جوعارى ءبىلىم وردالاردىڭ قالاسى. جاقىندا عانا عىلىم اكادەميامىز بەدەلدى ۋنيۆەرسيتەتتەرمەن سەرىكتەستىك تۋرالى كەلىسىمىن اياقتادى. سىزدەرمەن دە وسى سالادا بىرلەسە جۇمىس ىستەسەك دەگەن ويىمىز بار, – دەدى.
مادەني-گۋمانيتارلىق, كولىك, كوممۋنيكاتسيا, قۇرىلىس سىندى سان سالالار بويىنشا تىعىز بايلانىس جاساۋ توڭىرەگىندە بايلام جاساسقان قوس شاھار باسشىسى بۇل جۇزدەسۋ دوستىق قارىم-قاتىناسقا جاڭا سەرپىن بەرەتىنىنە سەنىم ءبىلدىرىپ تارقاستى.
قىمبات توقتامۇرات
