استانادا كوپبالالى وتباسىنان شىققان جانە ەرەكشە بالالارعا ارنالعان جەڭىلدىكپەن قوسىمشا ءبىلىم بەرەتىن «جاقسىلىق اريفمەتيكاسى» وقۋ ورتالىعى اشىلدى.
ورتالىقتىڭ اشىلۋ راسىمىنە استانا قالاسى اكىمىنىڭ ورىنباسارى ەسەت بايكەن, قالالىق ىشكى ساياسات باسقارماسىنىڭ باستىعى داۋرەن بابامۇراتوۆ قاتىستى. جاڭا ورتالىق ديرەكتورى ۇلجان مىرزاگەلديەۆا مەكەمەنى اشۋدا جانە جۇمىسىن جانداندىرۋدا ۇلكەن قولداۋ كورسەتكەن استانا قالاسى اكىمدىگىنە ريزاشىلىعىن ءبىلدىردى.
– بۇل ورتالىقتىڭ ماقساتى – كوپبالالى جانە از قامتىلعان وتباسىلاردىڭ بالالارىن تەگىن جانە 50 پايىز جەڭىلدىكپەن وقىتۋ. العاشقى وقۋ ورتالىعىن ەلوردادا 187 كوشە, 20/4 ۇيدەن اشقانبىز, وندا 102 كوپبالالى وتباسىنان شىققان 197 بالا مەكتەپكە دايارلاۋ توبى, ۇزارتىلعان كۇن توبى, اعىلشىن ءتىلى, شەشەندىك ونەر, قىزىقتى ماتەماتيكا, دومبىرا, گيتارا, شاحمات, كوركەمونەر بويىنشا تەگىن ءبىلىم الۋدا. ولارعا 18 مۇعالىم ءبىلىم بەرەدى. ال مىنا ە.سەركەباەۆ كوشەسىنەن اشىلىپ جاتقان ەكىنشى وقۋ ورتالىعىندا 250-300 بالاعا دەيىن وقىتۋعا مۇمكىندىك بار. 10 ءتۇرلى ءپان بويىنشا ساباق بەرەمىز. مۇعالىمدەر جەتكىلىكتى. قالا اكىمدىگىنىڭ قولداۋىمەن جۇمىسپەن قامتۋ ورتالىعى ارقىلى ەڭبەك باعدارلاماسىمەن 10 قىزمەتكەردى جۇمىسقا قابىلدادىق. «جاستار پراكتيكاسى» جوباسىمەن 4 جاس ماماننىڭ تاجىريبە جيناۋىنا كومەك بەرىپ وتىرمىز. وعان قوسا جاڭا ورتالىقتىڭ 156/7 شارشى مەترلىك عيماراتىن قالا اكىمدىگىنىڭ قولداۋىمەن وتە تومەن باعاعا 5 جىلعا جالعا الدىق. بۇل دا – ۇلكەن كومەك. ونىڭ ءىشىن جوندەۋگە دە اكىمدىك تاراپىنان كومەك كورسەتىلدى, – دەيدى ۇ.مىرزاگەلديەۆا.
ورتالىق قوعامدىق قور نەگىزىندە جۇمىس ىستەيتىندىكتەن تەك ءبىلىم بەرۋمەن شەكتەلمەي, قايىرىمدىلىق ءىس-شارالار وتكىزۋمەن دە اينالىسادى. وتكەن جىلى وسى ورتالىقتىڭ 20 بالاسى, بىلتىر 70 شاكىرتى رەسپۋبليكالىق «بالداۋرەن» لاگەرىندە دەمالدى. اشىلۋ سالتاناتىندا ءسوز العان قالا اكىمىنىڭ ورىنباسارى ەسەت بايكەن ەل ەرتەڭى – جاس ۇرپاقتى مىقتى ەتىپ تاربيەلەۋدە وسىنداي قوسىمشا ءبىلىم بەرۋ ۇيىمدارىنىڭ كوپتەپ اشىلۋى قاجەت ەكەنىن جەتكىزدى.
– قالامىزدا 150-دەن استام قوسىمشا ءبىلىم بەرۋ ورتالىقتارى بار, سوندا 98 مىڭ بالا ءبىلىم الادى. دەگەنمەن استانانىڭ كەيبىر اۋداندارىندا ولار ءالى دە جەتىسپەيدى. اسىرەسە, وسى ورتالىق اشىلىپ جاتقان سارىارقا اۋدانىنىڭ تۇرعىندارى تاراپىنان قوسىمشا ءبىلىم بەرۋ ۇيىمدارىن اشۋ تۋرالى وتىنىشتەر كوپ ءتۇستى. بالالاردى جان-جاقتى ونەر مەن بىلىمگە باۋليتىن ورتالىقتاردى اشۋ بار دا, ونىڭ جۇمىسىن ءارى قاراي ۇلكەن جاۋاپكەرشىلىكپەن دوڭگەلەتىپ الىپ كەتۋ – بولەك اڭگىمە. ول قاجىرلى ەڭبەكتى, شىدامدىلىقتى تالاپ ەتەدى, مۇنى باستاعان كاسىپكەردىڭ بىردەن كۇمپ ەتىپ كوپ اقشاعا كەنەلە قويۋى دا نەعايبىل, سوندىقتان بۇل ءىستى ءوز كاسىبىن جاقسى كورەتىن, جانكەشتى ادامدار عانا قولعا الادى. وسى تۇرعىدا ۇلجان حانىمنىڭ جۇمىسى جوعارى دەڭگەيدە ەكەنىنە كوز جەتىپ كەلەدى, – دەدى ە.بايكەن.
ورتالىقتىڭ شاكىرتتەرى مەن ۇستازدارى كەلگەن قوناقتارعا كونتسەرتتىك باعدارلاماسىن ۇسىندى. ۇ.مىرزاگەلديەۆانىڭ ايتۋىنشا, بۇل – الەۋمەتتىك كاسىپكەرلىك نەگىزىندە «جاقسىلىق اريفمەتيكاسى NS» قوعامدىق قورى اشىپ جاتقان ەكىنشى وقۋ ورتالىعى. كوپ ۇزاتپاي وسىنداي ءۇشىنشى ورتالىقتى الماتى اۋدانى, ابىلايحان كوشەسى, 56 ءۇي مەكەنجايىنان اشۋ كوزدەلىپ وتىر.
