ەلىمىزدە 1 قىركۇيەكتەن باستاپ «قازاقستان رەسپۋبليكاسىنىڭ ازاماتتارىنا, ورالماندارعا جانە قازاقستان رەسپۋبليكاسىندا تۇرۋعا ىقتيارحاتى بار ادامدارعا ولاردىڭ مۇلىكتى جاريا ەتۋىنە بايلانىستى راقىمشىلىق جاساۋ تۋرالى» زاڭعا سايكەس مۇلىكتەردى جاريا ەتۋ بويىنشا قۇجاتتاردى قابىلداۋ جۇرگىزىلىپ جاتقانى ءمالىم. بۇگىنگە دەيىن استانادا مۇلىكتى جاريا ەتۋ جونىندەگى اۋداندىق اكىمدىكتەر جانىنداعى كوميسسيالارعا 3201 ادام ءوتىنىش ءبىلدىردى دەپ حابارلايدى قالالىق اكىمدىكتىڭ ءباسپاسوز قىزمەتى.
ونىڭ ىشىندە الماتى اۋدانىندا – 1153, ەسىل اۋدانىندا – 443, سارىارقا اۋدانىندا 1 605 ادام ءوتىنىش تاپسىرعان. كوپشىلىگى كوميسسياعا جىلجىمايتىن مۇلىككە قاتىستى ماسەلەمەن كەلەدى ەكەن. «ناقتىلاي ايتساق, وتىنىشتەردىڭ جالپى سانىنىڭ 2941-ءى جىلجىمايتىن مۇلىكتى زاڭداستىرۋعا, قۇجاتتارىن تۋرالاۋعا بايلانىستى» دەيدى ماماندار.
ەسكە سالا كەتەيىك, ازاماتتارعا ىڭعايلى بولۋى ءۇشىن استانا قالاسىنىڭ بارلىق اۋداندىق اكىمدىكتەرى جانىنان ارناۋلى كوميسسيالار قۇرىلعان ەدى. ازاماتتاردان قۇجاتتاردى قابىلداۋ اكىمدىكتەردىڭ عيماراتتارىندا جۇزەگە اسىرىلۋدا:
– الماتى اۋدانى – تاۋەلسىزدىك كوشەسى, 7-ءۇي (انىقتاما تەل.: 36-39-19);
– ەسىل اۋدانى – قابانباي باتىر داڭعىلى, 33 (انىقتاما تەل.: 57-45-63);
– سارىارقا اۋدانى – سارىارقا داڭعىلى, 13 (انىقتاما تەل.: 55-66-28, 55-66-21, 55-64-97).
ازاماتتار مۇلكىن جاريا ەتۋ ءۇشىن ءوتىنىش, جەكە كۋالىكتىڭ كوشىرمەسىن ء(وتىنىشتى بەرگەن كەزدە تۇپنۇسقاسىن قوسا ۇسىنۋ كەرەك), نىساننىڭ قۇرىلىس نورمالارىنا جانە ەرەجەلەرىنە سايكەستىگى تۋرالى اتتەستاتتالعان ساراپشىنىڭ قورىتىندىسىن, سونداي-اق, جىلجىمايتىن مۇلىكتىڭ تەحنيكالىق قۇجاتىن اكەلۋى ءتيىس.
