15-16 قاراشادا «جىبەك جولى» حالىقارالىق فەستيۆالى اياسىندا «استانا وپەرا» ساحناسىندا ل.مينكۋستىڭ «دون كيحوت» سپەكتاكلى زور جەتىستىكپەن ءوتتى. حورەوگرافيالىق رەداكتسيا «استانا وپەرا» بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆانىكى.
ارتىستەردىڭ ەكى قۇرامى دا كەرەمەت ونەر كورسەتتى. 15 قاراشادا كيتريدىڭ بەينەسىن «استانا وپەرانىڭ» جەتەكشى ءسوليسى ءمادينا باسباەۆا سومداسا, ءبازيلدىڭ پارتياسىن الەمدىك بالەت جۇلدىزى باقتيار ادامجان ورىندادى.
– «دون كيحوت» – تەحنيكالىق تۇرعىدا كەرەمەت جابدىقتالعان, جارقىن ساتتەرگە تولى كلاسسيكالىق بالەت. مۇنداعى ءبازيلدىڭ ءرولى تابيعاتىما وتە جاقىن دەپ ايتار ەدىم, سەبەبى مەن دە شىنايى ومىردە قالجىڭداسقاندى جاقسى كورەمىن, ۇنەمى ءپوزيتيۆتى ويدا جۇرەمىن. ساحنادا جاس جىگىت بازيل شاشتارازدىڭ كيتريگە دەگەن ىستىق ماحابباتىن, ولاردىڭ اراسىنداعى ءازىلدى كورسەتۋگە تىرىستىم. قازىرگىدەي سالقىن اۋا رايىندا بارسەلونانىڭ جىلۋى مەن كۇن شۋاعىن توككەن بۇل سپەكتاكل كورەرمەندەر ءۇشىن ناعىز سىي بولعانى انىق, – دەدى «استانا وپەرانىڭ» جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى باقتيار ادامجان.
16-قاراشادا باستى پارتيالاردى تانىستىرعان بەلارۋس ۇلكەن تەاترى ساحناسىنىڭ شەبەرلەرى دە ءوز پىكىرلەرىمەن ءبولىستى.
– «استانا وپەرادان» كەرەمەت اسەر الدىم. مۇندا ءوزىمدى ونەردىڭ ورداسىنا كەلگەندەي سەزىنەمىن. ۇجىمداعى ىشكى اتموسفەرانىڭ ءوزى بىزگە ازداپ ۇيرەنشىكتى ەمەس, ويتكەنى بارلىعىنىڭ كۇش-قۋاتى تاسىپ تۇر, بالكىم, بۇل ارتىستەردىڭ ءوز كاسىبىنە دەگەن ماحابباتىنان شىعار. سوعان قاراپ, ءبىز دە تاۋ قوپارىپ, ءوزىمىزدى كورسەتكىمىز كەلەدى. سپەكتاكل الدىندا قوبالجۋ بار, كورەرمەنمەن بارىمىزدى ءبولىسۋدى قالايمىز, – دەدى ساحناعا شىعار الدىندا ليۋدميلا حيتروۆا.
– قازاقستاندا كوپتەگەن فەستيۆالدەر وتەدى, مۇندا مادەني ءومىر قايناپ جاتىر, بۇل ءارتىستەردىڭ دامۋىنا, تاجىريبە الماسۋعا وتە جاقسى. سونىمەن قاتار, بۇل كورەرمەندەر ءۇشىن مەرەكە, ولاردىڭ ءتۇرلى ەلدەردەن ورىنداۋشىلاردى كورۋگە مۇمكىندىگى بار, – دەپ پىكىرىن قوستى دميتري ۋكسۋسنيكوۆ.
