سەنبى كۇنى, 2013 جىلدىڭ 1 ماۋسىمىندا ارىپتەسىمىز, ارقا وڭىرىنە تانىمال جۋرناليست ناتاليا زەلەنيا 42 جاسقا قاراعان شاعىندا مەزگىلسىز دۇنيەدەن ءوتتى. وتە سىپايى, سەزىمتال, ادامگەرشىلىگى مول جاننان قاپىدا كوز جازىپ قالعانىمىز قابىرعامىزدى قاتتى قايىستىردى.
ناتاشا – اينالاسىنان ۇدايى جاقسىلىق, ىزگىلىك يەلەرىن ىزدەيتىن, ءاردايىم يگى جاقسىلارعا جۋىق جۇرەتىن. سودان دا بولار, كەڭدىك, ادالدىق, باۋىرمالدىق دەيتىن تولىپ جاتقان جايساڭ مىنەزدىڭ جاقسى بەلگىلەرى ناتاشانىڭ ءبىر ءوزىنىڭ بويىنان تابىلاتىن. ۇلتى ورىس بولسا دا, قازاقى ورتادا تاربيەلەنگەندىكتەن بە ەكەن, مەملەكەتتىك تىلدە ەركىن سويلەگەندە مەيىرلەنىپ قالاتىنىمىزدى قالاي جاسىرايىق؟! ءبىز وعان ۇزاق جىل «ۆەچەرنيايا استانا» گازەتىندە ەڭبەك ەتكەن جىلداردا كۋا بولدىق. كەيىن ول قالالىق, رەسپۋبليكالىق دەڭگەيدەگى ءتۇرلى باسىلىمداردا ءتىلشى قىزمەتىن اتقارا ءجۇرىپ, ويلى ماقالالارىمەن وقىرماندارىنىڭ جۇرەگىنەن جول تاپتى. ءوزى ەڭبەك ەتكەن ورتاعا عانا ەمەس, جالپى كوپشىلىككە قادىرلى ازامات ەدى…
بوتاداي كوزدەرىنەن شۋاق, كۇلىمدەگەن جۇزىنەن مەيىرىم توگىلىپ تۇراتىن. ءوز ىسىنە جاۋاپتى ءارى ۇقىپتى ول اينالاسىنداعىلارعا قاشاندا قامقورلىق تانىتىپ, قولىنان كەلگەنىنشە كومەك قولىن سوزىپ جۇرەتىن. قامشىنىڭ سابىنداي قىسقا عۇمىر كەشكەن ناتاشا ءاۋ باستان ءوزى ءۇشىن ەمەس, وزگەلەر ءۇشىن ءومىر سۇرگەندەي. ول جانى شۋاقتى, جۇرەگى شىراقتى كىسىلەرمەن پىكىرلەسۋگە, ارالاسۋعا اسا قۇشتار-تىن. ال, دوس-ارىپتەس دەگەندە شىعارعا جانى بولەك ەدى… وسىنداي ادامنان ايرىلۋ – ءبىز ءۇشىن وتە اۋىر جاعداي. سوندىقتان, سەنىڭ ورنىڭ ويسىراپ تۇر.
ءبىز سەنى ساعىنامىز, قايعىرامىز, جوقتايمىز… ءبىزدىڭ كوڭىلىمىزدەگى ادال دوستىقتىڭ ۇلگىسى – سەن عانا. از عۇمىرىندا ادامدىقتىڭ ۇلگىسىن كورسەتىپ, جۇرەك قالاۋىمەن تاڭداپ العان قيىن دا قىزىقتى, اۋىر دا ابىرويلى ماماندىقتىڭ ءمارتەبەسىن كوتەرە بىلگەن ونىڭ جارقىن بەينەسى, جانىنداعىلارعا سىڭىرگەن ونەگەلى ىستەرى ارقاشان دا ءبىزدىڭ جادىمىزدا ماڭگى ساقتالادى. ورتامىزدا جوق بولساڭ دا, ماڭگىلىك جۇرەگىمىزدەسىڭ, ناتاشا!!!
«استانا اقشامى» گازەتىندەگى
ءبىر توپ ارىپتەستەرى
