جارقىن ءومىردىڭ جارشىسى
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ باس عيماراتى اتريۋمىندا «جاس وتان» جاستار قاناتى ستۋدەنتتەر اليانسى, جاستار كونگرەسى, اۋىل جاستارى وداعى, جۇمىسشى جاستار وداعى, «جاسىل ەل» جاستار ەڭبەك جاساعى جانە ۋنيۆەرسيتەت ستۋدەنتتەرىمەن كەزدەسۋ وتكىزىپ, ۇندەۋ جاريالادى.
جيىنعا باس قوسقان جاستاردى ۇيىمداستىرۋشىلار شاعىن كونتسەرتتىك باعدارلامامەن قارسى الدى. كتك ونەرپازدارى قويىلىم كورسەتىپ, «سامۇرىق» بي توبى جۇرتشىلىق قوشەمەتىنە بولەندى.
كەزدەسۋدىڭ رەسمي بولىمىندە «جاس وتان» جاستار قاناتىنىڭ ۇندەۋى جاريالاندى. ۇندەۋدە جاستارعا بەرىلگەن زور ءمۇمكىندىكتەر مەن «قازاقستان – 2030» باعدارلاماسىنىڭ جەتىستىكتەرى ايتىلىپ ءوتتى.
سوڭعى جىلدارى ەلىمىزدە جەتى جارىم مىڭعا جۋىق مەكتەپ پايدانالۋعا بەرىلگەن. رەسپۋبليكا بويىنشا 140 جوو مەن 896 تجكب ۇيىمدارى جۇمىس جاسايدى ەكەن.
جىل سايىن 34 مىڭنان استام ءبىلىم گرانتتارى بولىنەدى.
«بولاشاق» باعدارلاماسى ارقىلى 8000 استام جاستار شەت ەلدەردە ءبىلىم الىپ كەلگەن. سونىمەن قاتار, 20 مىڭنان استام جاس «ديپلوممەن – اۋىلعا!» جوباسى اياسىندا اۋىلدىق ەلدى-مەكەندەردە جۇمىس ىستەۋدە. سوڭعى ءۇش جىلدا ەلۋ مىڭنان استام تۇلەك تۇراقتى جۇمىسقا ورنالاستىرىلدى.
اتالمىش جەتىستىكتەردى تىزە كەلە, «جاس وتان» جاستار قاناتىنىڭ كوشباسشىسى نۇرلان سىدىقوۆ «ءبىز ەندىگى كەزەكتە ەڭبەك قوعامىن قۇرۋعا باعىت الدىق. جاستاردىڭ ەڭبەكسۇيگىش توبى – جالپىعا ورتاق ەڭبەك قوعامىنىڭ نەگىزى. سوندىقتان ءبىز, جاستار, وزىمىزگە قاتىستى باعدارلامانى ورىنداۋدا نەگىزگى ورىنداۋشى جانە باقىلاۋشى بولۋىمىز قاجەت» دەدى.
جيىن سوڭىندا قازاقستاندىقتاردىڭ ەلباسىنىڭ ستراتەگيالىق باعدارلامالارىن قولداپ, العا قويعان جوسپارلاردى ورىنداۋعا دايىن ەكەندىگى ايتىلدى جانە جاستاردى اۋقىمدى ءمىندەتتەردى ءبىرگە اتقارۋعا شاقىرعان ۇندەۋ جاريالاندى.
ەربول جانات