ءماسليحاتەكونوميكا

جاس كاسىپكەرلەرگە جاردەم كورسەتىلەدى

mergersacquisitions

كەز كەلگەن ەل ەكونوميكاسىنىڭ نەگىزى شاعىن جانە ورتا كاسىپكەرلىكپەن تىكەلەي بايلانىستى. قالالىق ءماسليحاتتىڭ ءماجىلىس زالىندا وتكەن «دەپۋتات كۇنى» اياسىندا ەلوردالىق حالىق قالاۋلىلارى ءدال وسى ماسەلە توڭىرەگىندە پىكىر ءبولىسىپ, استاناداعى شاعىن جانە ورتا بيزنەستىڭ احۋالىمەن تانىستى.

دامىعان ەلدەردىڭ تاجىريبەسىنە سۇيەنسەك, شاعىن جانە ورتا كاسىپكەرلىكتى قالىپتاستىرۋ مەن دامىتۋ ەلدىڭ ەكونوميكاسىن كوتەرۋدە ماڭىزدى ورىنعا يە. وسى جونىندە اڭگىمەلەگەن قالالىق كاسىپكەرلىك جانە ونەركاسىپ باسقارماسىنىڭ باسشىسى ماليكا بەكتۇروۆا سوڭعى كەزدە قالادا شاعىن جانە ورتا بيزنەسپەن بەلسەندى تۇردە اينالىسىپ كەلە جاتقان ازاماتتار قاتارىنىڭ ارتىپ وتىرعانىن العا تارتتى. سونىڭ ناتيجەسىندە قالا بيۋدجەتىنە تۇسەتىن سالىق مولشەرى دە ۇلعايۋدا.

باسقارما باسشىسىنىڭ ايتۋىنشا, تەك 2014 جىلى شاعىن جانە ورتا كاسىپكەرلىك سۋبەكتىلەرىنەن عانا قالا بيۋدجەتىنە 212 ملرد تەڭگە قارجى تۇسكەن. شاعىن جانە ورتا كاسىپكەرلىكپەن اينالىسۋشىلار 22 جوبانى جۇزەگە اسىرىپ, 3 مىڭعا جۋىق جاڭا جۇمىس ورىندارىنىڭ اشىلۋىنا ىقپال ەتتى. 2015 جىلدىڭ سوڭىنا دەيىن تاعى التى جوبانىڭ جۇزەگە اسىرىلاتىنىن, اتاپ ايتساق, ءساۋىر ايىندا تىگىن فابريكاسىنىڭ اشىلاتىنىن ايتا كەلە, باسقارما باسشىسى ەلوردادا شاعىن كاسىپكەرلىكپەن اينالىسقىسى كەلەتىن ازاماتتارعا بارلىق جاعىنان قولداۋ كورسەتىلىپ, بۇل باعىتتا مول مۇمكىندىكتەر قاراستىرىلىپ وتىرعانىن جەتكىزدى.

–  قالادا شاعىن جانە ورتا كاسىپكەرلىكپەن اينالىسۋشىلار بەلسەندىلىك تانىتىپ كەلەدى. ولار ءونىم ءوندىرۋ مەن قىزمەت كورسەتۋ كولەمىن 43,6 پايىزعا ۇلعايتتى, – دەدى م.بەكتۇروۆا.

سونىمەن بىرگە الداعى ۋاقىتتا استانا اۋماعىندا جاڭا ەكى جوبا جۇزەگە اسىرىلماقشى. ولاردىڭ العاشقىسى جاس كاسىپكەرلەردى قولداۋعا باعىتتالعان. «استانا جاستار» دەپ اتالعان بۇل باعدارلاماعا 29 جاسقا دەيىنگى جاس ازاماتتار قاتىسا الادى. بۇل باعدارلامانى  جۇزەگە اسىرۋ ءۇشىن بيۋدجەتتەن 300 ميلليون تەڭگە قاراستىرىلعان. سونداي-اق, «دامۋ» كاسىپكەرلىكتى دامىتۋ قورى وعان قوسىمشا 600 ميلليون قارجى ءبولىپ وتىر. اتالمىش باعدارلاما بويىنشا ءوز ءىسىن باستاعىسى كەلگەن جاس كاسىپكەرلەرگە العاشقىدا 20 ميلليون تەڭگە نەسيە بەرىلمەكشى.

قالالىق ءماسليحاتتىڭ دەپۋتاتتارى بۇل ماسەلەگە وراي ءوز پىكىرلەرىن ورتاعا سالىپ, جاس كاسىپكەرلەردىڭ ەلوردا بيزنەسىنە وڭ ىقپال ەتۋىن قاراستىرۋدى ۇسىندى. وتىرىس­تى قورىتىندىلاي كەلە, قالالىق ءماسليحاتتىڭ حاتشىسى سانسىزباي ەسىلوۆ شاعىن جانە ورتا بيزنەستى دامىتۋ ماقساتىندا مەملەكەت تاراپىنان قولداۋ كورسەتىلىپ, قولايلى جاعدايلار تۋعىزىلىپ وتىرعانىن, دەگەنمەن, وسى سالادا ەڭبەك ەتىپ جۇرگەن ازاماتتاردىڭ سانىن ناقتىلاۋ قاجەتتىگىن اتاپ ءوتتى.

تاعىدا

ۇقساس جاڭالىقتار

پىكىر ۇستەۋ

Back to top button