«جاس قانات» جەڭىمپازدارى
استانانىڭ 15 جىلدىق مەرەيتويى قارساڭىندا ءوزارا سىنعا تۇسكەن «جاس قانات» بايقاۋىنىڭ 15 ۇمىتكەرى بەيبىتشىلىك جانە كەلىسىم سارايىن اۋەلەگەن اسەم انگە بولەدى. سوڭعى سىنعا دەيىن كورەرمەن كوزايىمىنا اينالعان جاس ونەرپازداردىڭ ءجونى تىپتەن بولەك!
«جاسقاناتتىقتار» الدىمەن استانا قالاسى اكىمىنىڭ ورىنباسارى ايدا بالاەۆامەن كەزدەسكەن ەدى.
«بۇگىندە 22-ءشى مارتە جاستاردىڭ باق سىناۋىنا مۇمكىندىك بەرگەن «جاس قانات» بايقاۋى – ەلىمىزدىڭ ءبىر برەندىنە اينالعان جوبا. وعان قاتىسۋدىڭ ءوزى جەڭىل-جەلپى شارۋا ەمەس. بايقاۋ كوپتەگەن شارتتار مەن قيىندىقتاردان تۇراتىندىقتان, سول ۇلكەن سىناقتان سۇرىنبەي وتۋلەرىڭىزگە تىلەكتەسپىن» دەگەن ايدا عالىمقىزى ولارعا ارنايى سىيلىقتار تابىستادى. ال, ۇمىتكەرلەر اكىم ورىنباسارىنا جىلى شىراي تانىتقانى ءۇشىن العىس ءبىلدىرىپ, مۋزىكالىق تارتۋ رەتىندە ابايدىڭ «جەلسىز تۇندە جارىق اي» ءانىن شىرقاپ بەردى.
…بايقاۋدىڭ العاشقى كەزەڭىندە كەنەتتەن توتەنشە جاعداي ورىن الىپ, كونتسەرتتى تاماشالاپ وتىرعان ادامدار مەن قاتىسۋشىلاردى قاۋىپسىز جەرگە شىعارۋعا تۋرا كەلدى. ءۇمىتكەرلەردىڭ ءبىرى ءوز ونەرىن كورسەتىپ جاتقان ساتتە زالداعى جارىق ءبىرنەشە رەت ءوشىپ-جانىپ, ودان كەيىن ءتۇتىن شىعا باستاعان-دى. ابىروي بولعاندا, كوپ ۇزاماي جارىق قايتا قالپىنا كەلتىرىلىپ, جاعداي تۇراقتالدى. سول كەزدە ساحناعا شىعا الماي قالعان كەيبىر ونەرپازدار كەلەسى كۇنى كونتسەرتتىڭ شىمىلدىعىن اشۋعا مۇمكىندىك الدى.
باس جۇلدە ءۇشىن سايىسۋعا ىرىكتەلىپ الىنعان 7 ۇمىتكەردىڭ ءىشىنەن «ءجۇزدەن – جۇيرىك, مىڭنان – تۇلپار» ونەرپازداردى تاڭداۋدىڭ وڭاي سوقپاعانى انىق. ءبارى – ءبىرىنەن ءبىرى ءوتكەن مىقتى. داۋىس ىرعاقتارى تاماشا. ساحنادا وزدەرىن ۇستاۋ مانەرلەرىندە دە ءمىن جوق. بىراق, سايىستىڭ اتى – سايىس! جانكۇيەرلەردىڭ شىدامىن سارقىپ, قازىلار القاسىن دا قيناعان سوڭعى سىن اياقتالدى.
«قاتىسۋشىلاردىڭ بارلىعى – ءار ءتۇرلى جانرداعى جاس انشىلەر. كوبىسى جوعارى دەڭگەيدە ونەر كورسەتتى. سوعان قاراماستان, ءبىز ءادىل باعا بەرۋگە تىرىستىق…» دەيدى قازىلار القاسىنىڭ ءتورايىمى نۇرجامال ۇسەنباەۆا.
سونىمەن, ۋايىم, قورقىنىش, قوبالجۋدىڭ بارلىعى ارتتا قالىپ, بارلىق سىننان سۇرىنبەي وتكەن ءۇش «قاناتتىڭ» يەگەرلەرى انىقتالدى. اتاپ ايتقاندا, «التىن قاناتتى» اقتاۋلىق ايدا بايگەلوۆا, «كۇمىس قاناتتى» سەمەيلىك كەلبەت وتىنباەۆا, «قولا قاناتتى» پەتروپاۆلدىق مۇحيت احمەتوۆ يەلەندى. ءۇش جەڭىمپازدىڭ دا قۋانىشتارىندا شەك جوق. العا قويعان ماقساتتارىنا جەتىپ, ارماندارىنىڭ ورىندالعانىنا رازى.
ەركەعالي بەيسەنوۆ