تۇڭعىش پرەزيدەنت مۋزەيىندە بالالار كوركەمسۋرەت مەكتەبى – يۋنەسكو كلۋبى جانە استانا قالاسى ءبىلىم باسقارماسىنىڭ ۇيىمداستىرۋىمەن جىل سايىن تاۋەلسىزدىك مەرەكەسى قارساڭىندا وتكىزىلىپ وتىراتىن «تۋعان جەرىم» اتتى بالالار شىعارماشىلىعىنىڭ سايىسى قورىتىندىلاندى.
ەلىمىزدىڭ ءار وڭىرىنەن كەلگەن تالاپكەرلەردىڭ قولونەر بۇيىمدارى كورمەگە قويىلدى. توعىز جىلدان بەرى وتكىزىلىپ كەلە جاتقان بۇل جوبا بيىل حالىقارالىق مارتەبەگە يە بولىپ وتىر. كونكۋرس جۇمىسىنا الىس, جاقىن شەتەلدەردەن بالالار قاتىستى. شاراعا ارنايى كەلگەن ونەرپازدارعا ەلىمىزدىڭ بىلىكتى ماماندارى شەبەرلىك سىنىبىن وتكىزدى. مۋزەي ديرەكتورىنىڭ ورىنباسارى كۇلايشا اقتاەۆا جوبانىڭ وزەكتىلىگى تۋرالى «ەلىمىزدىڭ وركەندەۋى تەحنولوگيامەن عانا ولشەنبەيدى, ءداستۇرلى مادەنيەتىمىزدى دامىتۋمەن دە تىكەلەي بايلانىستى. جاس دارىنداردىڭ ەڭبەكتەرىنە قاراپ سۇيسىنەدى ەكەنسىڭ. وسىنداي يگى ىستەردى ءاردايىم قولداپ, ۇيىمداستىرىپ تۇرامىز دەگەن ويدامىن. كورمە ءبىر اي بويى جالعاسادى. كورەم دەۋشىلەرگە ەسىگىمىز اشىق» دەيدى .
بايقاۋ قورىتىندىسى بويىنشا بىرنەشە قاتىسۋشىلارعا باعالى سىيلىقتار مەن ماقتاۋ قاعازدارى تابىستالدى. 13 جاسقا دەيىنگى بالالاردىڭ اراسىندا گران-ءپريدى رۋدنىي قالاسىنان كەلگەن ەكاتەرينا نەحاەنكا يەلەندى. 16 جاسقا دەيىنگى ونەرپازداردىڭ ىشىنەن شىمكەنت قالاسىنان كەلگەن ماريا كيم جەڭىمپاز اتاندى.
باعلان ورازالى
