قازاق «ەل ءىشى – ونەر كەنىشى» دەپ تەگىننەن-تەگىن ايتپاعان. رەسپۋبليكانىڭ تۇكپىر-تۇكپىرىندە تانىلماي جاتقان كۇمىس كومەي, تالانتتى انشىلەر قانشاما؟! سولاردى حالىققا تانىتۋ ماقساتىندا كوپتەگەن جۇمىستار اتقارىلۋدا. مىنە, سول يگىلىكتى ءىستىڭ ءبىرى – بيىل جەتىنشى رەت ۇيىمداستىرىلىپ وتىرعان سوتسياليستىك ەڭبەك ەرى, كسرو حالىق ءارتىسى, كسرو جانە قازاقستان مەملەكەتتىك سىيلىعىنىڭ لاۋرەاتى بيبىگۇل تولەگەنوۆانىڭ حالىقارالىق ۆوكاليستەر بايقاۋى.
بايقاۋ كەشە «قازاقستان» ورتالىق كونتسەرت زالىندا سالتاناتتى تۇردە شىمىلدىق ءتۇردى. وندا قازاقستاننان, تاياۋ جانە قيىر شەتەل مەملەكەتتەرىنەن كەلگەن الپىس ءتورت ءانشى ءتورت كۇن بويى ءوزارا باق سىناسادى, شەبەرلىك بايقاسادى. ال, 26 قىركۇيەكتە ۇزدىك ورىنداۋشىلاردى ماراپاتتاۋ ءراسىمى ءوتىپ, وتكەن جىلداردىڭ لاۋرەاتتارىنىڭ قاتىسۋىمەن گالا-كونتسەرت وتەدى.
قاتىسۋشىلارعا بيبىگۇل احمەتقىزى باستاپ, فرانتسيا, بولگاريا, ليتۆا, مولدوۆا, رەسەي, ارمەنيانىڭ وپەرا ونەرىنىڭ مەترلەرىنەن قۇرالعان قازىلار القاسى ءوز باعاسىن بەرەدى.
يگى ءداستۇردىڭ جالعاسىن تابۋىنىڭ ءوزى جاس دارىندى ورىنداۋشىلاردىڭ شەبەرلىك شىڭداۋىنا, قازاقتىڭ كلاسسيكالىق ونەرىنىڭ بەدەلىن ارتتىرۋعا, جاستاردىڭ رۋحاني دامۋىنا وڭ ىقپالىن تيگىزبەك.
جاقسى ساتۇلى
