قالا تىرشىلىگى

جاس جۇبايلار شەرۋى

استانانىڭ 15 جىلدىعىندا توي تويعا ۇلاستى. ناقتى ايتقاندا, «اتامەكەن» ەتنو-مەموريالدىق كەشەنى الاڭىندا قالا كۇنى مەرەكەسىنە ارنالعان سالتاناتتى نەكە قيۋ ءراسىمى ءوتىپ, ءار جاستاعى 37 جۇپقا ارنالعان اق نيەتتەر اعىلدى. 

استانا قالاسى ادىلەت دەپارتا­مەنتى ازاماتتىق حال اكتىلەرىن ءتىر­كەۋ ءبولىمىنىڭ مەڭگەرۋشىسى گۇلنار ساعىندىقوۆا تاعدىرلارىن باس بايراقتىڭ تۇبىندە توعىستىرعان جاس جۇبايلارعا نەكە قيعانى تۋرالى كۋالىكتى تابىس ەتىپ, جىلى لەبىزىن ءبىلدىردى. سودان سوڭ, ۇلكەن مەرەكەلىك تورت كەسىلىپ, قۋانىش يەلەرى ودان اۋىز ءتيدى. اۋەگە يگى تىلەكتەر جازىل­عان شارلار ۇشىرىلىپ, كەلەشەك جارقىن ومىرگە قادام باسۋدى استانا كۇنىنە جوسپارلاعان جاستارعا ەسكەرتكىش سىيلىقتار تابىس ەتىلدى. بۇل تارتۋ-تارالعىلار وسال ەمەس, ارينە. قالا اكىمدىگى جاساعان باعالى سىيلىقتاردىڭ ىشىندە تۇرمىستىق تەحنيكادان باستاپ, بۋرابايعا, ءتىپتى, تۇركياعا دا تەگىن دەمالىس ساپارى بار.
بۇدان تۋرا التى جىل بۇرىن, ياعني, العاش رەت استانا كۇنى قارساڭىندا ماقسۇت پەن سۆەتلانا مولدىبەكوۆتەر شاڭىراق كوتەرگەن ەكەن.
«ءبىز دە كەزىندە ەلوردا تويى كۇنىندە وتاۋ قۇرعان ەدىك. قازىر ەكى پەرزەنت ءسۇيىپ وتىرعان باقىتتى وتباسىمىز. ەندى, مىنە, بۇگىن ءسىڭىلىم تۇرمىسقا شىعىپ جاتىر» دەيدى سۆەتلانا مولدىبەكوۆا.

شارا بارىسىندا استانالىق تسيركتىڭ ءانشىسى ۆلاديمير ليگاي جاڭادان شاڭىراق كوتەرىپ, وتاۋ تىككەن قۋانىش يەلەرىنە ارناپ مۋزىكالىق سالەم جولدادى.

جۇلدىز بولاتقىزى

تاعىدا

ۇقساس جاڭالىقتار

پىكىر ۇستەۋ

Back to top button