جاڭالىقتار

جاستاردى جۇمىسپەن قامتۋ – باستى نازاردا

ZAH_7084

جاستار ساياساتى ماسەلەلەرى جونىندەگى باسقارمانىڭ باسشىسى تالعات راحمانبەردىمەن تىلدەسۋ بارىسىندا جاستاردى كوبىنەسە جۇمىسپەن قامتىلۋ جونىندەگى سۇراقتار ەرەكشە قىزىقتىردى.

ارمان:

– استانادا جۇمىس تابا الماي ءجۇرمىن. تۇيىندەمە تالاپ ەتكەن سوڭ, «تەلەفونمەن حابارىن بەرەمىز» دەيدى دە قويادى. كومەك كورسەتە الاسىز با؟

– كەشە عانا جۇمىسپەن قامتۋ جانە الەۋمەتتىك باعدارلامالار باسقارماسى مەن ۇلتتىق كاسىپكەرلەر پالاتاسىمەن  بىرلەسە وتىرىپ, وسى ماسەلەگە قاتىستى الەۋمەتتىك جوبانى ىسكە قوستىق. ياعني, كەز كەلگەن ادام  «ورتالىق بازار», «ارتەم», «شاپاعات» جانە «اسەم» ساۋدا ورىندارىندا اشىلعان جاستاردى جەدەل جۇمىسقا ورنالاستىرۋ پۋنكتىنە جاقىنداپ, بۇيىمتايىن ايتىپ, ساۋالناماعا جاۋاپ بەرە الادى. سول كۇننەن قالدىرماي, جۇمىس ىزدەۋشىنىڭ تۇيىندەمەسىن جۇمىس بەرۋشىلەرگە جىبەرەمىز. ارى قاراي ولار اڭگىمەلەسۋگە شاقىرىلادى.

–بىراق مەنىڭ ارناۋلى جوعارى ءبىلىمىم جوق…

– سەرىكتەستەرىمىز اراسىندا جوعارى ءبىلىمدى تالاپ ەتپەيتىن 500 بوس جۇمىس ورنى بار. ماسەلەن, قۇرىلىسشى كومەكشىسى, تەحنيكالىق ماماندارعا, داياشى, بارمەن, شاشتاراز سەكىلدى قىزمەت كورسەتۋ سالاسىنىڭ قىزمەتكەرلەرىنە سۇرانىس بار.

ايمان:

وتكەن جىلى «ەحرو-2017» حالىقارالىق كورمەسىنە ۆولونتەرلەر دايىندالىپتى. سول كۋرستارعا جازىلار ەدىم. بيىل دا بولا ما؟

– «استانا جاستارى» كمم رەسۋرستىق ورتالىعى بىلتىر 200 ۆولونتەر دايىندادى. وسى جىلى تاعى 300-ءىن وقىتۋ جوسپاردا بار. ونى «استانا ەكسپو-2017» ۇلتتىق كومپانياسىمەن بىرىگىپ ىسكە اسىرساق دەپ وتىرمىز. بۇگىندە كورمەنى ءساتتى وتكىزگەن باسقا ەلدەردىڭ تاجىريبەسى زەرتتەلىپ,    ۆولونتەرلىك ورتالىق قىزمەتىنىڭ تۇجىرىمداماسى ازىرلەنۋدە. بۇل جوبا شىلدەگە قاراي باستالماق. ۆولونتەرلەر كورمە اياسىندا عانا ەمەس, قالادا وتەتىن بارلىق اۋقىمدى شارالاردى ۇيىمداستىرۋعا اتسالىساتىن بولادى.

– ۆولونتەرلەر قاتارىنا قوسىلۋ ءۇشىن قانداي تالاپ قويىلادى? وندا نە ۇيرەتىلەدى?

– تۋريستەرگە ەلىمىز بەن ەلوردا تاريحىن اعىلشىن تىلىندە بايانداي الاتىن دەڭگەيدە بولۋى ءتيىس.   ال, ءبىزدىڭ تاراپىمىزدان ولارعا ءوزىن-ءوزى ۇستاۋ ادەبىن, قارىم-قاتىناس جاساۋدىڭ قىر-سىرى ۇيرەتىلەتىن پسيحولوگيالىق ترەنينگتەر ۇيىمداستىرىلادى.

«ەحرو-2017» ءۇش كۇن ەمەس, ءۇش ايعا سوزىلاتىندىقتان, ەسەپتەۋىمىزگە سايكەس 10 مىڭداي ۆولونتەر دايىنداۋىمىز كەرەك. نەگىزگى باسىمدىق جوعارى جانە ارنايى ورتا وقۋ ورىندارىنىڭ ءبىرىنشى, ەكىنشى كۋرس ستۋدەنتتەرىنە بەرىلەدى.

لاريسا يۆانوۆا:

– بالالارىمىزدىڭ بوس ۋاقىتىنىڭ ءتيىمدى جۇمسالۋىن قالايمىز. جەلەزنودوروجنىي كەنتىندەگى قىرقىنشى ستانتسيادا اۋلا كلۋبى قاشان اشىلادى؟

– قازىرگى كۇنى باس-اياعى 15 اۋلا كلۋبىنىڭ تاربيەلەنۋشىلەرى ءۇش مىڭنان اسادى. ال جازدا ولاردىڭ سانى جەتى مىڭعا دەيىن جەتەدى. «جەلەزنودوروجنىي» تۇرعىن الابىنداعى اۋلا كلۋبى وسى جىلدىڭ ىشىندە اشىلادى. بۇدان بولەك, الماتى اۋدانىندا تاعى بىرەۋىن اشۋدى كوزدەپ وتىرمىز.

ماقسات:

–  «جاسىل ەل» جاستار ەڭبەك جاساقتارىنىڭ قاتارىنا قابىلدانعىم كەلەدى. جالاقىسى دا جامان ەمەس دەپ ەستىدىم…

– بۇل تالپىنىسىڭىز قۇپتارلىق ەكەن. «جاسىل ەل» قوزعالىسىنا بىلتىر ون جىل تولدى. ونىڭ جاس­تار اراسىندا تانىمالدىلىعىنىڭ ارتقانى قۋانتادى. ستۋدەنت كەزىمدە مەن دە وسى جاساقتىڭ ەرىكتىسى بولدىم. سونىڭ ارقاسىندا جاقسى جاندارمەن جولىقتىم, جولداستارىم كوبەيدى.

وسى جىلى جاساق جۇمىسشىلارىن ەكسپو-قالاشىقتىڭ قۇرىلىسىنا تارتامىز. مامىردىڭ سوڭىنا قاراي 500 جاس ەڭبەككەردى سول اۋماقتا جۇمىسپەن قامتۋ ويدا بار. جالاقى مولشەرى جاسالعان جۇمىستىڭ كولەمىنە بايلانىستى ەسەپتەلەدى. نەگىزىنەن 40 مىڭ تەڭگەدەن جوعارى. قۇرىلىس جۇمىستارى كەزىندە جالاقى ايىنا 160 مىڭ تەڭگەگە دەيىن جەتەدى.

ءوتىنىمدى قالاي بەرەيىن؟

– ءوتىنىمدى ستۋدەنتتىك قۇرىلىس جانە «جاسىل ەل» جاستار ەڭبەك جاساقتارى شتابىنا جىبەرۋىڭىزگە, نە بولماسا جەكە مالىمەتتەرىڭىزدى ءبىزدىڭ باسقارماعا اكەلسەڭىز بولادى.

ۆالەنتينا يۆانوۆنا:

ۇلى وتان سوعىسى ارداگەر­لەرىنە قانداي قامقورلىق جاسالادى؟

–جەڭىستىڭ 70 جىلدىعىنا وراي «ارداگەر» جوباسىن باستادىق. بەلسەندى جاستار كۇنىنە 2-3 ارداگەردىڭ ۇيىنە بارىپ, اۋلانىڭ تازالىعىن رەتكە كەلتىرۋگە كومەكتەسەدى. تاماق ءپىسىرىپ, كيىم ۇتىكتەۋ سەكىلدى ءۇي شارۋالارىن بىتىرۋگە سەپتەسەدى. پوشتاعا كەلگەن حاتتاردى اكەلىپ بەرەدى. الاياقتىققا ساقتىق رەتىندە ءبىز سول ۇيگە كەلىپ جۇرگەن ستۋدەنتتىڭ فوتوسى جاپسىرىلىپ, اتى-ءجونى مەن بايلانىس تەلەفونى جازىلعان تاقتانى ءىلىپ ءجۇرمىز.  قاريالار اۋرۋحاناعا ءتۇسىپ قالسا, حال-جاعدايىن بىلۋگە بارامىز. ولار جاستاردىڭ قامقورلىعىن, مەيىرىمىن سەزىپ, ءماز-مەيرام بولىپ قالادى. بۇل جوبا جىل بويى جۇرگىزىلەتىن بولادى.

باقىتجان:

– استانادا وقۋ ورىندارىنىڭ بەلسەندى جاستارىنان قۇرالعان ورتا قالىپتاسقان با؟

– ءارتۇرلى شارا بارىسىندا ءبىز ۇنەمى استانالىق وقۋ ورىندارى بەلسەندىلەرىنىڭ باسىن قوسۋعا تىرىسامىز. ماسەلەن, وتكەن اپتادا ءبىزدىڭ باستامامىزبەن جاستار سايا­ساتىن  قولداۋ مەملەكەتتىك قورى «ستۋدەنت جاستارمەن جۇمىستى ۇيىمداستىرۋ» تاقىرىبىندا ەكى كۇندىك سەمينار-ترەنينگ  وتكىزدى. ترەنينگتى جۇرگىزۋگە «جاستار» عىلىمي-زەرتتەۋ ورتالىعىنىڭ رەداكتسيالىق باسپا  باسقارماسىنىڭ باس ساراپشىسى ليۋدميلا بۋرلاچەنكو شاقىرىلىپ,  «ستۋدەنتتىك ءوزىن-ءوزى باسقارۋ – جۇيەلىك ءتىل تابۋ. جاستار ءىسى جونىندەگى كوميتەتتىڭ نەگىزگى قىزمەتتەرى» تاقىرىبىندا ينتەراكتيۆتى ءدارىس وقىعان بولاتىن. ەلوردالىق جوعارى وقۋ ورىندارىنىڭ ستۋدەنتتەرى ءار تاپسىرمانى ەرەكشە قىزىعۋشىلىقپەن ورىنداپ قانا قويماي, ءوز ۋنيۆەرسيتەتتەرىندەگى ستۋدەنتتىك ۇيىمداردىڭ قىزمەتىن بايانداۋ ارقىلى ءوزارا تاجىريبە الماسۋعا تىرىستى. سول شارادا بايقاعانىمىزداي, ءار وقۋ ورنى جاستار ساياساتىن ارقالاي تۇسىنەدى. ويتكەنى, قالىپتاسقان ءوز قۇرىلىمى مەن قاعيدالارى بار. بىرەۋلەرى جان-جاقتى شىعارماشىل ونەرپازداردى تاربيەلەۋدى ماقسات ەتسە, ەكىنشىلەرى وقىپ جۇرگەن سالالارىنا بايلانىس­تى ستۋدەنتتەردىڭ كاسىبيلىگى مەن كاسىپكەرلىك قابىلەتىنە ەرەكشە كوڭىل بولەدى. كەزدەسۋگە جينالعان جاستار جاڭا يدەيالارىن ورتاعا سالىپ, ۇسىنىلعان جوبالاردى تالقىلادى. قازىرگى زامانعى ستۋدەنتتىڭ ءيميدجى قانداي بولۋ كەرەك, وقۋ ورنى برەندىن قالىپتاستىرۋ جولدارى سەكىلدى تاقىرىپتار بويىنشا جاتتىعۋلار جاسادى. سەمينار سوڭىندا قاتىسۋشىلارعا ارنايى سەرتيفيكاتتار تابىستالدى. سونداي-اق, سول جاستار جاڭا تانىستىققا قۋانعاندارىن ايتىپ, ءوز ەرىكتەرىمەن بىرىگىپ جوبا جاساۋ ءۇشىن كەلەسى كەزدەسۋ ۋاقىتىن بەلگىلەدى. بۇيىرسا, سول جاستاردان قىزىقتى ۇسىنىستارىن اسىعا كۇتەمىز.  ولاردىڭ قوعامعا پايدالى كرەاتيۆتى يدەيالارىن قولداۋعا ارقاشان دايىنبىز.

 

ءمادينا جاقىپ

تاعىدا

ۇقساس جاڭالىقتار

ءبىر پىكىر

  1. مەن قىزىلوردا قالاسىنداعى قازاق گۋمانيتارلىق زاڭ جانە تەحنيكالىق كوللەدجىندە يۋريست ماماندىعىن 3 جىل وقىپ ءبىتىردىم.استانا قالاسىنا ماماندىعىم بويىنشا جۇمىسقا تۇرعىم كەلەدى.كومەكتەسە الاسىزدارما؟

پىكىر ۇستەۋ

Back to top button