ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وتكەن ءىس-شارادا جاستارعا پسيحوبەلسەندى زاتتار مەن ەلەكتروندى تەمەكىنىڭ زيانى, ەسىرتكىنىڭ زاردابى ءتۇسىندىرىلدى.
جاستار ساياساتى باسقارماسى, قوعامدىق دەنساۋلىق ساقتاۋ باسقارماسى, سالاۋاتتى قالىپتاستىرۋ ورتالىعى ۇيىمداستىرعان اكتسياعا جاستار كوپتەپ قاتىستى.
اكتسيا اياسىندا №3 قالالىق ەمحانانىڭ ۋرولوگ, پسيحولوگ, گينەكولوگ دارىگەرلەرى ستۋدەنت جاستارعا اقىل-كەڭەس بەرسە, سپيد ورتالىعىنىڭ ماماندارى ۆيچ-تەست الدى. سونداي-اق ءتۇرلى تاقىرىپتا ۆيدەوروليك كورسەتىپ, ۆيكتورينالىق سۇراقتار قويىپ, جاستارعا سالاۋاتتى ءومىر سالتىنىڭ ماڭىزىن ءتۇسىندىردى.
جاستار ساياساتى باسقارماسىنىڭ مەكتەپ جانە ستۋدەنت جاستارمەن جۇمىس ءبولىمىنىڭ باسشىسى باعدات اتىمتاي «ەسىرتكىگە جول جوق!» اكتسياسى اياسىندا اتقارىلىپ جاتقان جۇمىستارعا توقتالدى.
استانا قالاسى پوليتسيا دەپارتامەنتى ەسىرتكى بيزنەسىنە قارسى ءىس-قيمىل باسقارماسىنىڭ ءبولىم باستىعى سەرگەي يلينوۆ سينتەتيكالىق زاتتاردى ساتۋ, جارنامالاۋ جانە تاركىلەۋ فاكتىسىن اشۋعا باعىتتالعان شارالار تۋرالى ايتتى.
قازىرگى قوعامنىڭ باستى ماسەلەسى – ينتەرنەتكە تاۋەلدىلىك. اسىرەسە جاسوسپىرىمدەر مەن جاستار اراسىندا سمارتفون مەن كومپيۋتەرگە تاۋەلدىلىك كوبەيىپ كەلەدى. تاۋەلدىلىكتىڭ بۇل تۇرىنەن جاستاردى ايىقتىرۋ – ۇزاق پروتسەستى الاتىن پسيحولوگيالىق جۇمىس. بۇل تاقىرىپتا «Restart» رەسپۋبليكالىق جوباسىنىڭ ۇيلەستىرۋشىسى ديار ىدىرىس-بەلبايلى ءسوز ەتتى. سپيد ورتالىعىنىڭ مامانى اجار تۇرىموۆا عاسىر ىندەتىنە بالانعان سپيد-ءتى جۇقتىرىپ, ءومىرى ءۇزىلىپ جاتقاندار تۋرالى ايتىپ, ودان ساقتانۋ جولدارى تۋرالى باياندادى.
ال سالاۋاتتى قالىپتاستىرۋ ورتالىعىنىڭ ديرەكتورى قانات قامزين:
– ناشاقورلىقتىڭ الدىن الۋ ماسەلەسىن اشىق تالقىلاپ, سالاۋاتتى ءومىر سالتىن ۇستانۋدى ناسيحاتتاۋ – نەگىزگى مىندەتىمىز. ءوز سالاسىنىڭ كاسىبي ماماندارىن شاقىرىپ, جاستارعا پسيحوبەلسەندى زاتتار مەن ەلەكتروندى تەمەكىنىڭ جانە ەسىرتكىنىڭ ادام ومىرىنە زالال-زاردابىن تۇسىندىردىك, – دەدى.
