قالالىق اكىمدىكتىڭ «استانا جاستارى» كوممۋنالدىق مەملەكەتتىك مەكەمەسىنىڭ ۇيىمداستىرۋىمەن كەشە ساۋدا جانە ەكونوميكا سالاسىنداعى بوس جۇمىس ورىندار جارمەڭكەسى ءوتتى.
40-تان اسا جۇمىس بەرۋشى جوعارى وقۋ ورنىن بىتىرگەن تۇلەكتەرگە 120-عا جۋىق ۆاكانسيا ۇسىندى. ولاردىڭ قاتارىندا ەكونوميست, ەسەپشى, ساتۋشى, ساۋدا جونىندەگى مەنەدجەر, ماركەتولوگ سىندى قىزمەتتەر بار. سونداي-اق, اسپاز, كونديتەر, داياشىلارعا دا سۇرانىس جوعارى. جۇمىس بەرۋشىنىڭ تالاپتارى كوپ ەمەس. ماماندىعى بويىنشا ديپلومى بارلاردىڭ ەڭبەك ءوتىلىنسىز دە جۇمىس تابۋعا مۇمكىندىگى بار. جۇمىس بەرۋشىلەردىڭ ايتۋىنشا, بۇل – جاس مامانعا دەگەن تاپتىرماس كومەك. ولارعا كوبىنە ايلىعى جۇرەتىن تاعىلىمداما قاراستىرىلعان. باستىسى, سىناق مەرزىمىنەن سۇرىنبەي وتسە بولعانى.
«بيىلدىققا بۇل – ءۇشىنشى جارمەڭكەمىز. تەحنيكالىق جانە گۋمانيتارلىق باعىتتاعى الدىڭعى ەكى جارمەڭكەنىڭ ءناتيجەسىندە 100-گە تارتا جاس مامان تۇراقتى جۇمىسقا ورنالاستى. جالپى, ءبىزدىڭ ۇيىم جىلىنا شامامەن 500 تۇلەكتى ەڭبەكپەن قامتيدى. 29 جاسقا دەيىنگى ازاماتتار ەلەكتروندى پوشتامىزعا تۇيىندەمەلەرىن جولدايدى. ءارى قاراي ولاردى تىكەلەي جۇمىس بەرۋشى كومپانيالارعا جىبەرەمىز. مامىر ايىندا ەلوردانىڭ جەتەكشى 40 كاسىپورنىمەن سەرىكتەستىك جايلى مەموراندۋمعا قول قويدىق. ەندى ولار ءبىز باعىتتاعان لايىقتى كادرلاردى جۇمىسقا الادى» دەيدى «استانا جاستارى» كمم جۇمىسپەن قامتۋ جانە كاسىبي باعدار بەرۋ ءبولىمىنىڭ باسشىسى ايدانا مۇساتاەۆا.
بۇدان بولەك, ەلورداداعى جاستار ساياساتىن جۇزەگە اسىرۋ ءۇشىن قۇرىلعان «استانا جاستارى» ورتالىعى كەلۋشىلەرگە تەگىن قۇقىقتىق كومەك كورسەتەدى, ەرىكتىلەر قوزعالىسىن جۇرگىزىپ, اۋلا كلۋبتارى قىزمەتىن رەتتەيدى.
ءمادينا جاقىپ
