جاستار ساياساتى ماسەلەلەرى باسقارماسىنىڭ ۇيىتقى بولۋىمەن ەلورداداعى كارىستەر ەتنومادەني قاۋىمداستىعى «مەن – قازاقستاندىقپىن» اتتى فورۋم ۇيىمداستىردى.
اسەرلى شارانى «سامۋلنوري» بارابان ءانسامبلى اشقان سوڭ قوعامدىق بىرلەستىك توراعاسىنىڭ ورىنباسارى روزا پاك جينالعانداردى قازاقستان حالقى اسسامبلەياسىنىڭ 20 جىلدىق مەرەيتويىمەن قۇتتىقتادى. بۇدان كەيىن كوپشىلىك نازارىنا ەل تاريحىنان, مادەنيەتى مەن سپورتىنان, ۇلتتار دوستاستىعىنان حابار بەرەتىن شاعىن بەينەروليك ۇسىنىلدى.
فيلوسوفيا عىلىمىنىڭ دوكتورى, «نۇر وتان» حدپ استانا قالالىق فيليالى الەۋمەتتىك باستامالاردى تالداۋ جانە بولجاۋ ورتالىعىنىڭ جەتەكشىسى قازبەك مايلىبايۇلى «ءححى عاسىرداعى قازاقستان جاستارى» بايانداماسىندا كەيىنگى تولقىن وكىلدەرىن ەڭبەككە ىنتالاندىرۋ, زامان تالابىنا ساي ءبىلىم الۋ, ءتىل ۇيرەنۋ, باسەكەگە قابىلەتتى بولۋ, پاتريوتتىق سەزىمدى ارتتىرۋ سياقتى قاسيەتتەردى ارتتىرۋ كەرەكتىگىن باسا ايتتى.
قازاق مەملەكەتتىك زاڭ ۋنيۆەرسيتەتىنىڭ دوتسەنتى, فيلوسوفيا عىلىمىنىڭ كانديداتى ايمان راحيموۆ «مەنىڭ جۇرەگىمدەگى پاتريوتتىق سەزىم» تاقىرىبىندا تولعاندى. ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى اينۇر راحماتاليەۆا «مەن – قازاقستاندىقپىن» اتتى بايانداماسىندا ەل دامۋىنداعى جاستار ۇلەسىنە توقتالدى.
جيىننىڭ ەكىنشى ءبولىمى جاستاردى بەلسەندىلىك پەن قوزعالىسقا شاقىرعان ءىس-شارالارعا تولى بولدى. ارنايى قوناق – ەكى دۇركىن وليمپيادا, ءتورت دۇركىن الەم چەمپيونى يليا ءيليننىڭ اڭگىمەلەرى جينالعاندارعا ەرەكشە اسەرگە بولەدى. «مەن قازاقستاندىق ەكەنىمە ماقتانامىن. اركىم قولىنان كەلگەنشە ءوز ەلىن الەمگە تانىتۋعا تىرىسۋى كەرەك. سىزدەرگە ايتارىم, سپورتپەن شۇعىلدانىپ, جاقسى وقىپ, تەك العا ۇمتىلىڭىزدار. اڭساعان ارمانعا جەتۋ ءۇشىن ماقسات قويا بىلىڭدەر! ەلباسىنىڭ يدەياسىن قولداپ, ءارى قاراي دامىتىپ, قاشان دا بىرلىكتە ءومىر سۇرەيىك!» دەدى ول.
فورۋمدى ۇيىمداستىرۋشىلاردىڭ ءبىرى, تاەكۆاندودان سپورت شەبەرى, حالىقارالىق فيتنەس باعدارلامالارىن ۇسىنۋشى, ازيادا – 2011 قىسقى ويىندارىنىڭ ەستافەتاسىندا الاۋ ۇستاعان ۆاديم تسحە جەكە جاتتىعۋلارىن كورسەتىپ, پايدالى كەڭەستەرىمەن ءبولىستى. «ميسسون»
بي ءانسامبلى مەن حالىقارالىق «شابىت» فەستيۆالىنىڭ لاۋرەاتى ەۆگەني كۋگاي ونەر كورسەتتى.
ناربيىك ءماسليحاتتىڭ ورىنداۋىنداعى «اتامەكەن» ءانى شىرقالىپ, قاتىسۋشىلار العىس حاتتارمەن ماراپاتتالدى.
گۇلنار جۇپاربەك,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
