2050 جىلعا قاراي ەلدەگى بالامالى جانە جاڭارتىلاتىن ەنەرگيا ۇلەسى 50 پايىزعا جەتەدى دەپ جوسپارلانىپ وتىر. بۇل تۋرالى كەشە قر پرەزيدەنتى جانىنداعى وكق ۇيىمداستىرعان بريفينگتە قر قورشاعان ورتانى قورعاۋ ءمينيسترى نۇرلان قاپپاروۆ مالىمدەدى.
30 مامىر كۇنى ەلباسى ن.نازارباەۆ «قازاقستان رەسپۋبليكاسىنىڭ «جاسىل ەكونوميكاعا» كوشۋى جونىندەگى تۇجىرىمداما تۋرالى» جارلىققا قول قويعان بولاتىن. «جاسىل ەكونوميكا» ەلىمىزدىڭ ورنىقتى دامۋىن قامتاماسىز ەتۋدىڭ ماڭىزدى قۇرالدارىنىڭ ءبىرى بولىپ سانالادى. اتالعان تۇجىرىمداما اياسىندا 2050 جىلعا قاراي ءجىو 3 پايىزعا ارتىپ, 500 مىڭنان استام جاڭا جۇمىس ورنى اشىلادى دەپ جوسپارلانىپ وتىر. مينيستردىڭ ايتۋىنشا, «جاسىل ەكونوميكاعا» كوشۋ ءۇشىن قاجەتتى ينۆەستيتسيالار كولەمى جىل سايىن ءجىو-ءنىڭ شامامەن 1 پايىزىن قۇرايدى. بۇل 3-4 ملرد اقش دوللارىنا تەڭ.
– ەنەرگەتيكادا ءبىز بالامالى جانە جاڭارتىلاتىن ەنەرگيانىڭ ۇلەسىن 2030 جىلعا قاراي – 30, ال 2050 جىلعا قاراي 50 پايىزعا جەتكىزۋ ماقساتىن قويىپ وتىرمىز. ەنەرگيا تيىمدىلىگىن جوعارىلاتۋعا باعىتتالعان شارالاردى جۇرگىزۋ ناتيجەسىندە ەلەكتر قۋاتىن ءوندىرۋ قاجەتتىلىگى 2030 جىلعا قاراي – 13, ال 2050 جىلعا قاراي 10 پايىزعا ازاياتىن بولادى, – دەدى مينيستر.
سونداي-اق, سالا باسشىسى تۇجىرىمداما كوزدەگەن بىرقاتار مىندەتتەردى جىكتەپ بەردى. بىرىنشىدەن, «جاسىل ەكونوميكاعا» كوشۋ 2050 جىلعا قاراي 500 مىڭ جۇمىس ورنىن اشۋعا ءمۇمكىندىك بەرەدى. ەكىنشىدەن, اتالعان تۇجىرىمداما قازاقستان الەمنىڭ دامىعان 30 ەلىنىڭ قاتارىنا كىرۋ ءجونىندەگى ماقساتىنا قول جەتكىزۋىن قامتاماسىز ەتەدى. ۇشىنشىدەن, 2030 جىلعا قاراي قازاقستاندىقتاردىڭ ەلەكتر ەنەرگياسىنىڭ 11 پايىزىن جەل مەن كۇننەن, ال 8 پايىزىن اتومنان الۋعا مۇمكىندىك بەرەدى. ودان بولەك, ەلىمىزدە بىرقاتار جىلۋ ەلەكتر ستانسالارى كومىردەن گازعا كوشىرىلەتىنى دە بەلگىلى بولدى. بۇگىندە ەلىمىزدە 3,8 ترلن تەكشە مەتر گاز قورى بار ەكەندىگى دالەلدەنگەن. ونى مينيسترلىك «كومىر مەن جاڭاراتىن ەنەرگيا كوزدەرى اراسىنداعى كوپىر سىندى» ترانزيتتىك قور رەتىندە قاراستىرادى.
اينۇر سانابەك
