رۋحانيات

جازدا قانداي كىتاپ وقىدىڭىز؟

جاقىندا فەيسبۋك جەلىسىندە جاسۇلان سەرىك ەسىمدى ازامات «مەن قالاي وقۋشىعا كىتاپ وقىتتىم؟» دەگەن تاقىرىپتا جازبا جاريالادى. 2014 جىلدان باستاپ مەكتەپكە مۇعالىم بولىپ ورنالاسقان ول, بالالاردى ادەبيەتكە قىزىقتىرۋ ءۇشىن ءوز قالتاسىنان اقشا شىعارىپ, بايگە جاريالاعانىن ايتقان.

 

«ەڭ ءبىرىنشى جۇمىسىم سى­نىپتىڭ دەڭگەيىنە كەلەرلىك ادەبي شىعارمالار تاڭداۋ بولدى. العاشقى ءۇش ايعا شىعارمالاردى تاڭداپ, حابارلاندىرۋ جاسادىم. ءتىپتى تاڭدالعان شىعارمانى قاي جەردەن, قاي سايتتان الۋعا بولاتىنىنا دەيىن جازىپ قويدىم. ءبىرىنشى ايعا قويىلعان شىعارما مۇح­تار اۋەزوۆتىڭ «قاراش-قاراش وقيعاسى» بولدى. كىتاپ وقۋ سايىسىنا ءوز قالتامنان قارجى تىكتىم. 1-ورىنعا – 3000 تەڭگە, 2-ورىنعا – 2000 تەڭگە, 3-ورىنعا – 1000 تەڭگە جانە 500 تەڭگەدەن 3 ىنتالاندىرۋ سىيلىعى بولدى» دەيدى ول.
وسىلاي بەلگىلەنگەن ۋاقىتتان كەيىن سايىستى باستاپ, شىعارما ىشىنەن كەيىپكەر مىنەزى, وقيعالار نەمەسە شىعارمادان ەكى-ءۇش سويلەم عانا ايتىپ ءارى قاراي ءىلىپ اكەتۋ دەگەن سەكىلدى تاپسىرمالار بەرگەن جاسۇلان ال­عاشقىدا شاراعا 10-نان اسا وقۋ­شى قاتىسقانىن جازىپتى. ەكى ساعاتقا سوزىلعان سىن ساعات وتە قىزىقتى وتكەن. ال كەلەسى ايدا قايتا باستالعان سايىسقا باسقا سىنىپتىڭ وقۋشىلارى دا ءوتىنىش ءبىلدىرىپ, قاتىسادى. «اباي جولىنان» باستاپ شەتەل ادەبيەتىنە دەيىن قامتىعان وسى شارانىڭ ىقپالىمەن مەكتەپ, اۋدان كىتاپحاناسىنا بالالار كوپتەپ بارا باستاپتى.
ءوز باسىم قازىرگى كۇنى «كىتاپ وقىمايتىندار زامانىنىڭ» كوشىنە مەكتەپ مۇعالىمدەرى دە ىلەسىپ كەتكەنىن جوققا شىعارا الماس ەدىم. ونى مۇعالىمدەردىڭ جاي عانا ءسوز قولدانىسىنان اڭعارۋعا بولادى. ادەبيەت وقىمايتىن ۇستازداردىڭ ىشكى مادەنيەتى كوركەمدىك دەڭگەيگە جەتە المايدى. ولاردىڭ سوزدىك قورى دا جۇتاڭ كەلەدى. سول سەبەپتى, ساباق ۇستىندە اۋزىنان بالاعا ۇرىسقاندا «قۋاسىڭ با؟», «باسىڭ ىستەي مە؟» دەگەن سەكىلدى دورەكى سوزدەر شىعىپ جاتۋى دا مۇمكىن.
ال ءوزى كىتاپ وقىمايتىن مۇعالىم بالالارعا كىتاپ وقى دەپ ايتا الا ما؟
شيرەك عاسىر بۇرىن مەكتەپ وقۋشىلارى ءوز ەركىمەن كىتاپحاناعا باراتىن. ءار ۇيدە مىندەتتى تۇردە ەرتەگى كىتاپتار, ودان سوڭ بالالارعا ارنالعان اڭگىمە, پوۆەستەر جيناعى تابىلۋشى ەدى. ال «ۇلان» گا­زەتى, «بالدىرعان» جۋرنالى بالا­لاردىڭ سۇيىكتى باسىلىمدارى بولاتىن.
جازدا ءۇش اي دەمالىستان كەيىن قىركۇيەكتە مەكتەپكە بارىسىمەن مۇعالىمدەر «قانە, جازدا كىم قانداي كىتاپ وقىدى؟» دەپ سۇراۋشى ەدى… بالالار وزدەرى وقىعان كىتاپتار جايلى جارىسا اڭگىمەلەپ, ءبىر-بىرىنەن ەستىگەن كىتاپتى قىزىعا وقۋعا قۇمارتاتىن. ال بۇگىن شە؟ جاسۇلان سەرىك سەكىلدى ءوز قالتاسىنان اقشا تىگىپ, سايىس جاساماسا دا, تىم بولماسا «جازدا نە وقىدىڭدار؟» دەپ سۇراۋعا جارايتىن مۇعالىمدەر بار ما؟
ءسىز بالالاردى كىتاپ وقۋعا قى­زىقتىرا بىلگەن قانداي مۇعالىمدى بىلەسىز؟

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button