جەلىلىك بيزنەسكە جەگىلمە!

شاريعات تۇرعىسىنان قاراپ كورەلىك: الەمدە جەلىلىك ماركەتينگتىڭ ءتۇر-ءتۇرى بار. ارقايسىسىنىڭ وزىنشە جۇمىس ىستەۋ جوباسى مەن شارتتارى بولادى. «كىمدە-كىم ءبىزدى الداسا, ول ادام بىزدەن ەمەس» دەپ ساۋدادا الداۋدى قاتال ەسكەرتىپ, مۇسىلمانعا جات ارەكەت ەكەنىن تۇسىندىرگەن. بۇل يسلامدا – حارام. شاريعاتتا ادامعا اسەر ەتە وتىرىپ, ءبىر نارسەنى ساتۋعا تىيىم سالىنادى. ادام پسيحولوگياسىنا ىقپالى بار وسىنداي ءتۇرلى تاسىلدەر مەن ايلالاردىڭ كەسىرىنەن ۇيلەرىندەگى جالعىز سيىرىن ساتىپ جىبەرگەندەر دە, نەسيە الىپ قارىزعا باتقاندار دا جەتەرلىك. بەلگىلى ءبىر ادامداردى ۇتقىزىپ, ەندى ءبىر ادامداردى ۇتىلدىراتىن جانە ادامداردى قۇلشىلىق پەن ومىردەگى نەگىزگى ىستەرىنە سالعىرت قاراتا باستايتىن جۇيە – يسلام بويىنشا قۇمارلىققا جاتادى. ال ونىڭ حارام ەكەنى داۋسىز.

ەكونوميكالىق تۇرعىدان قاراپ كورەلىك: ەل ەكونوميكاسىنا دا اسا زياندى. نارىقتاعى شىنايى باعاسى بەلگىسىز, كوبىنە ساتىپ العان ادامدارعا ءبىرىنشى كەزەكتە قاجەت ەمەس, ءتىپتى, ولاردىڭ ءومىر ءسۇرۋ ستاندارتىنا ساي ەمەس, ۋداي قىمبات تاۋارلاردىڭ قارىمىندا ەل اقشاسىن سان ءتۇرلى ايلامەن جيىپ, شەت ەل اسىرىپ جىبەرۋدىڭ قانشالىقتى زياندى ەكەنى ايتپاسا دا تۇسىنىكتى. بۇل كومپانيالارعا تىركەلگەن ادامداردىڭ سانى 5-6 ميلليونعا جەتكەن كەزدە ۇتىلاتىن ادامدار مەن شەتەلگە شىعارىلعان اقشانىڭ مولشەرى قانداي ەكەنىن ەسەپتەۋ, ارينە, قيىن ەمەس. اسىرەسە, قازىرگى الەمدىك داعدارىس كەزىندە جەلىلىك ماركەتينگتىڭ ەل ەكونوميكاسىنا وتە زياندى ەكەنىن ءتۇسىنۋىمىز قاجەت. ميلليونداعان اقشانىڭ شەتەل اسقانىن بايقاعان شري-لانكا سەكىلدى كەيبىر مەملەكەتتەردە قۋما ساۋدانىڭ بۇل تۇرىنە رەسمي تىيىم سالىنعان كورىنەدى.

قوعامعا زيانى: بۇل جەلىلىك ماركەتينگتەگى ادامداردىڭ سانى كوبەيگەن سايىن قاجەتتى ءتۇرلى ماماندىقتار تاپشى بولا باستايدى. بارا-بارا تەپە-تەڭدىك جوعالىپ, ەڭبەك كۇشى قيسىنسىز پايدالانىلعاندىقتان قوعامدا السىرەۋ جانە كەرى كەتۋ كورىنىس تابادى. سەبەبى, ادامزاتقا ءبىرىنشى كەزەكتە كەرەك ەمەس, قىمبات زاتتاردى ساتۋمەن اينالىسقان مىڭداعان ادامنىڭ قۋاتى مەن ءبىلىمىن, ۋاقىتىن ەل ەكونوميكاسىن كوتەرەتىن وندىرىسكە, باسقا دا پايدالى سالاعا جۇمىلدىرۋعا بولاتىن ەدى. بۇعان قوسا ادامدارعا بۇل جۇمىس تۇسىندىرىلگەن ۋاقىتتا: «سەن مۇعالىمسىڭ, ياكي ينجەنەرسىڭ, تابىسىڭ وتە تومەن, بۇل جۇمىسقا كىرسەڭ ارمانىڭدى جۇزەگە اسىرىپ, بايلىقتىڭ استىندا قالاسىڭ» دەپ كىسىنى ءوزى سۇيگەن ماماندىعىنان, قىزمەتىنەن, وقۋىنان سۋىتىپ, تەرىس پىكىر قالىپتاستىرادى. ياعني, بۇل جۇمىستىڭ كوپ پايدا اكەلەتىندىگىن, ال باسقا جۇمىستاردىڭ تۇككە تۇرمايتىندىعىن ناسيحاتتايدى. كوپتەگەن ستۋدەنتتەردىڭ وسى كومپانياعا تىركەلگەننەن كەيىن وقۋىنا بۇرىنعىداي كوڭىل اۋدارا الماعاندىعى, ۇيقىسىنىڭ بۇزىلعاندىعى, ءتىپتى كەيبىرەۋلەرى وقۋلارىنىڭ قاجەتسىز ەكەنىن ويلاپ, ءبىرجولاتا تاستاپ كەتپەك بولعانى بەلگىلى. ال, ەلدىڭ ءبارى وسى ماركەتينگتى قۋالاپ كەتسە, حالىققا قاجەتتى ءتۇرلى ماماندىقتاردى كىمدەر يگەرمەك. بۇل جۇيەنىڭ ىشىندە ۇلتتىق ادەبيەتكە ورىن جوقتىڭ قاسى. جەلىلىك ماركەتينگ ساربازدارى وزدەرىن “تاۋەلسىز كاسىپكەر” اتاعانىمەن, شىندىعىندا ولار – تاۋەلدى, جاي عانا تاۋەلدى ەمەس, قۋ دۇنيەنىنىڭ قۇلى.

دەموگرافيا تۇرعىسىنان قاراپ كورەلىك: جەلىلىك ماركەتينگ – وتباسىلىق بيزنەس. بۇل ىستە تابىسقا تولىق جەتۋ ءۇشىن جۇبايىڭ دا بەلسەنە اتسالىسۋى شارت. ياعني, وتباسىنىڭ ءار مۇشەسى – بەلسەندى “بىرلىك”. سول سەبەپتى, ول “بىرلىكتەردىڭ” سالعىرت بولۋى قۇپتالىنبايدى. مىسالى, “تاۋەلسىز كاسىپكەر” ايەل ادام اياعى اۋىرلاپ, بالا تاپسا – بۇل ونىڭ “كاسىبى” – جۇيەلى ماركەتينگ ءۇشىن كادىمگىدەي قاۋىپ! ءيا, ول ەندى بالاعا الاڭداپ, بۇرىنعىداي ىسكەر بولا المايدى. سوندىقتان ءارتۇرلى قۇيتۇرقى ءادىس-ءتاسىلدىڭ كومەگىمەن بالا تابۋدى كەيىنگە قالدىرۋ, سانىن شەكتەۋ – “تاۋەلسىز كاسىپكەرلەر” اراسىندا ءجيى كەزدەسەتىن قۇبىلىس. جۇيەلى ماركەتينگ ءبىزدىڭ قوعامدا كەڭ جايىلىپ كەلە جاتقاندىقتان, بۇل فاكتور – مەملەكەتتىڭ دەموگرافيا ساياساتىنا, تۇپتەپ كەلگەندە ۇلتتىق قاۋىپسىزدىگىمىزگە قاۋىپ توندىرەدى دەسەم, ارتىق ايتقاندىق بولماس.

جەلىلىك ساۋدانى وركەندەتەتىن كىمدەر؟

سونىمەن… ءبارىمىز نە اتا-انامىز, نە تۋعان تۋىس, نە كورشى, تانىس, دوسىمىز, گرۋپپالاسىمىز ايتەۋىر بىرەۋى جەلىلىك ماركەتينگپەن (سەتەۆوي ماركەتينگ) اينالىستى, ياعني ايتەۋىر ءبىر بايلانىسى بولدى. سولاي عوي. ياعني, بارلىعىمىز تىكەلەي نەمەسە جاناما تۇردە جەلىلىك ماركەتينگتىڭ اسەرىن سەزدىك. جەلىلىك ماركەتينگتىڭ سوڭىنا تۇسكەن “تاۋەلسىز كاسىپكەر” ماتەريالدىق نارسەنى ارمان قىلا الماسا, “جەلىلىك ماركەتينگتىڭ ۇمبەتى” سانالمايدى. ويتكەنى جۇرەگىنە مىقتاپ ورنىققان سول ارمان عانا ونى قۋ دۇنيەنىڭ سوڭىنان تىنىمسىز سۇيرەمەك.
جالپى جەلىلىك ماركەتينگ – بىزگە سول جەلىلىك ماركەتينگتى ناسيحاتتاپ ۇگىت جۇرگىزگەن ادامدار ايتقانداي تابىس اكەلەتىن بيزنەس كوزى مە؟مەنىڭ جەكە كوزقاراسىم بويىنشا – جوق. نەگە؟ مەنىڭ تۋعان تۋىسقاندارىم, دوستارىم, كلاستاستارىم, گرۋپپالاستارىمنىڭ ىشىندە وسى جەلىلىك ماركەتينگپەن جەتكىلىكتى دارەجەدە اينالىسقاندار بولعان. ءتىپتى ءوزىم دە! قازىر تاستاپ كەتتىك. جەلىلىك ماركەتينگ ماماندارى ۇگىت ناسيحات جۇرگىزۋ جولىندا, بيزنەستەرىن وركەندەتۋ جولىندا كەلەسى توپتاردىڭ كومەگىنە جۇگىنەدى:
ستۋدەنتتەر. ەكونوميكالىق قارجىلىق ساۋاتى ازدار. بۇل توپتار الگى جەلىلىك ماركەتينگ ماماندارى ءۇشىن پوتەنتسيالدى ۇگىت جۇرگىزۋ وبەكتىلەرى بولىپ تابىلادى.
ستۋدەنت قوعامنىڭ بەلسەندى تۇلعالارىنىڭ ءبىرى بولعاندىقتان جەلىلىك ماركەتينگ ماماندارى ءۇشىن ناتيجەلى جىلجۋشى وبەكت. 1 نەمەسە 2 كۋرس وقيتىن ستۋدەنت الدەبىر تانىسىنىڭ ارقاسىندا جەلىلىك ماركەتينگ ناسيحاتشىسى بولىپ شىعا كەلدى دەيىك. ول نە ىستەيدى؟ ەرتەڭ ءبارى جاقسى بولىپ كەتەتىنىنە, بولاشاقتا ءوزىن باي ادام رەتىندە ەلەستەتكەندىكتەن, سوعان سەنگەندىكتەن بارىن سالادى. جاتپاي تۇرماي ارى بەرى جۇگىرىپ جۇمىس ىستەيدى. ارينە بەلگىلى ءبىر دارەجەدە پايدا دا تابادى. بىراق ول پايداسى ونىڭ ارى بەرى, قالا ىشىندە ءجۇرىپ – تۇرۋى ءۇشىن جول شىعىندارىمەن, قاجەتسىز, قايتالانا بەرەتىن سەمينارلارعا قاتىسۋمەن, ۇگىت جۇرگىزۋ ءۇشىن كەرەكتى قۇرال – جابدىقتاردى ساتىپ الۋمەن كەتىپ قالادى. ياعني نە پليۋس ەمەس, نە مينۋس ەمەس. نولدىك دەڭگەي. وسىلايشا بۇدان پايدا جوق ەكەندىگىن, جاي ۋاقىت ءولتىرىپ جۇرگەنىن تۇسىنەم دەگەنشە 1-2 جىل ۋاقىت ءوتىپ كەتەدى. ءسويتىپ ودان باس تارتادى. الگىلەردىڭ جوعالتاتىن ەشتەمەسى جوق, كەتكەن ادامنىڭ ورنىنا جاڭادان وقۋعا كەلىپ جاتقان 1-2 كۋرس ستۋدەنتتەرى دايىن تۇر. ءدال وسى قۇرباندىقتىڭ ءبىرى ءوزىم بولدىم.
ءبارىن ايتتا ءبىرىن ايت: جاستارمەن قوسا ەگدە تارتقان انالارىمىز دا قۇر الاقان ەمەس. ايتايىن دەگەنىم – قاي زاماندا دا جاسى ۇلعايعان جان بويىنا تاجىريبە, ءبىلىم, دانالىق جيناقتاپ, سول بايلىعىن كەلەسى بۋىنعا بەرەتىن, ءبىر سوزبەن ايتقاندا تاربيەمەن اينالىساتىن ەدى. مىسالى, اجە مەن ەنە جاس كەلىندى باۋليدى, نەمەرەسىن باعادى, ەرتەگى ايتادى, دومبىرا ۇيرەتەدى دەگەندەي. ەگەر قوعامنىڭ قازىناسى بولۋى ءتيىس قارتتار ءوزىنىڭ نەگىزگى ميسسياسىن, پارىزىن وتەمەي, تانىس-تامىرىن ارالاپ, “بيزنەس-پلان” وقىپ جۇرسە, ءبىر-ەكى ۇرپاقتان كەيىن ماڭگۇرتكە اينالىپ شىعا كەلمەيمىز بە؟
مەنى قاتتى الاڭداتاتىن ءبىر نارسە: وسى “بيزنەستىڭ” سوڭىنا ءبىرجولا ءتۇسىپ, العاشقى ناتيجەگە قول جەتكىزە باستاعان جاندار – قاتارداعى قاراپايىم, تەگىن ادامدار ەمەس! ولار – وتە ىسكەر, العىر, ويى ۇشقىر, كوپشىلىكپەن ءتىل تابىسقىش, اقىلدى جاندار ەكەنىندە ءسوز جوق! بۇلاردىڭ جۇرت قىزىعار ماماندىعى, قالتاسىندا بىرنەشە ديپلومى بولۋى دا مۇمكىن. مىسالى, ءوزىم بىلەتىن ءبىر ادام جالاقىسى وتە جوعارى مۇناي سالاسىندا لاۋازىمدى قىزمەتتە جۇمىس ىستەيتىن. ماركەتينگتىڭ ءدامىن العان سوڭ مەملەكەت قىزمەتىنىڭ ءبارىن جىلى جاۋىپ قويدى. ەندى ونىڭ بۇكىل قابىلەت-قارىمى جەكە باسىنا, سوسىن ءتۇپ-تامىرى شەتەلدە جاتقان ماركەتينگتىك جۇيەگە قىزمەت ەتۋدە!

رەسمي تاريحىنا -75 جىل

MLM – multi level marketing, ياعني, “كوپدەڭگەيلى ماركەتينگ” دەگەن ۇعىمدى بىلدىرەتىن تىكەلەي ساۋدانىڭ رەسمي تاريحىنا – 75 جىل. حح عاسىردىڭ 30-جىلدارى اقش-تا دۇنيەگە كەلگەن بۇل كاسىپتىڭ يدەياسى دا كەرەمەت – تاۋاردىڭ وندىرۋشىدەن تۇتىنۋشىعا دەيىنگى جولىن قىسقارتۋ. كوپ كىسىلەر, ءبىرىنشى كەزەكتە, باسشىلىقتىڭ بۇيرىعىن ورىنداۋدى ەمەس, قول استىنداعىلارعا ۇكىم جۇرگىزگەندى قالايدى. ءدال وسىنداي «تارتىپپەن» جۇمىس ىستەيتىن جەلىلىك ماركەتينگكە ۇمتىلۋشىلاردىڭ دا كوپتىگى سوندىقتان. بىلاي قاراساڭ, كوكەيگە قونارلىق ءىس: تاۋاردى سات تا, سەنىڭ كاپيتالىڭا قىزمەت ەتەتىن «باعىنىشتىلار توبىن» قۇر. بۇل جاعدايدا ءونىم شىعارۋشى كومپانيا دا تاۋاردىڭ ساپالى بولۋىن قامتاماسىز ەتە الادى. وسىنداي تاسىلمەن, تۇتىنۋشى, ساتۋشى جانە ءوندىرۋشى, ياعني, ءۇش تاراپتىڭ دا مۇددەسى قاناعاتتاندىرىلماق. قازاقشالاپ ايتساق, «قۇدا دا تىنىش, قۇداعي دا تىنىش». شىركىن-اي, ءبارى وسىلاي جاقسى بولسا عوي…
وكىنىشكە قاراي, ادال ساۋدانىڭ اتىن جامىلىپ, ساتۋشىسىن دا, تۇتىنۋشىسىن دا تاقىرعا وتىرعىزىپ كەتەتىن كەيبىر كومپانيالار بار ءبىزدىڭ ەلدە. «ازدىراتىن, تولدىراتىن, دەنىڭىزدى ساۋ ەتەتىن, بايلىعىڭىزدى تاۋ ەتەتىن, ءبارىن قاتىراتىن, اقشاعا باتىراتىن» الاياق فيرمالاردان اۋزى كۇيمەگەندەرى كەمدە-كەم شىعار. تىكەلەي ساۋدا مەملەكەت ەكونوميكاسىنا ءتيىمدى اسەر ەتەدى» دەپ تاقىلداعانىمىزبەن, وسى ماسەلە ءىس جۇزىندە ەندى عانا قولعا الىنۋدا. بۇل باعىتتاعى العاشقى قادامداردىڭ ءبىرى دەپ بىلتىر قۇرىلعان تىكەلەي ساۋدا قاۋىمداستىعىن ايتۋعا بولادى. اۋەلگىدە قۇرامىنا ءتورت قانا كومپانيا («ءOrىflame», «Mary Kay», «ءFaberlىc», «Avon») كىرگەن بۇل قاۋىمداستىق ەندىگى جەردە تۇتىنۋشى-ساتۋشى-ءوندىرۋشى «ۇشتىگىنىڭ» باسىن قوسىپ, قۇقىعىن قورعايتىن بىردەن-ءبىر ورتاعا اينالاتىنىن ايتقان ەدى ۇيىم پرەزيدەنتى كونستانتين كۋلينيچ. سەنگىمىز-اق كەلەدى…
حوش, نە نارسە بولسا دا, ادالىنان بولسىن دەپ تىلەيىك. جوعارىداعى ۇيىمنىڭ باستى پرينتسيپتەرى دە سول عوي: ادال باسەكەلەستىك جۇرگىزىپ, ساۋدا جاساۋدا سولاقاي ادىستەرگە جول بەرمەۋ. ەڭ قۋانارلىعى, تۇتىنۋشىعا جەتەتىن تاۋاردا قازاقستان تىكەلەي ساۋدا قاۋىمداستىعىنىڭ لوگوتيپى كورسەتىلەتىن بولادى. ال قاۋىمداستىققا تەك مەملەكەتتىك ستاندارتتاۋ جانە سەرتيفيكاتتاۋ كوميتەتىنەن ارنايى ليتسەنزيا العان كومپانيالار عانا ەنەتىنىن ەسكەرسەك, بۇل – تۇتىنۋشىنىڭ ءوز العان تاۋارىنا سەنىمى ارتاتىن بولادى دەگەن ءسوز.

ءمولدىر سابيتقىزى, ستۋدەنت:

–كەزىندە جەلىلىك ماركەتينگپەن اينالىساتىن كومپانيالاردىڭ بىرىندە جۇمىس ىستەگەنمىن. 150-دەن استام ادام جيناپ, جۇيەلى جەلى دە قۇردىم. ۇلكەن باسپالداقتاردىڭ ءبىرى – ديرەكتورلىققا دا جەتتىم. بىراق قازىر ءبارىن تاستاپ, وقۋىمدى جالعاستىرىپ جاتىرمىن. قازىردىڭ وزىندە ءتۇرلى كومپانياعا شاقىرۋشى قىز-جىگىتتەردى كوپ كەزدەستىرەمىن. ولارعا قاراپ, ءوزىمنىڭ كەشەگى كۇنىم ەسىمە تۇسەدى. ءبىر كۇنى ولاردىڭ دا مۇنى قوياتىنىنا سەنىمدىمىن. ماركەتينگ مەكتەبىنىڭ تالايىن كورگەن كاسىبي «سەتەۆيك» رەتىندە مۇنداي جارنامالاۋ مەن جيىنداردىڭ تالايىن كوردىم دەپ ايتا الامىن. ول جەرگە جينالعان كەزدە تەك ءبىر عانا ماسەلە ايتىلادى. ول – اقشا. ءار تاۋاردىڭ بونۋستىق بالىنا بايلانىستى نەعۇرلىم كوپ بالل جيناساڭ, سوعۇرلىم اقشاڭ دا كوبەيەدى. «شەنىڭ» دە وسەدى. پايىزدان پايىزعا جەتكەن سايىن كەلەسىسىنە جەتۋگە ۇمتىلاسىڭ. ول ءۇشىن كۇن دەمەي, ءتۇن دەمەي جۇمىس ىستەيسىڭ. مۇنداي قيىندىققا كەز-كەلگەن ادام پسيحولوگيالىق تۇرعىدا شىداي المايدى. سەبەبى, ەشقاشان ميىڭا, ساناڭا تىنىشتىق جوق. ءبىر بيىكتى باعىندىرساڭ, كەلەسىگە قالاي جەتەم دەپ تىنىم تاپپايسىڭ. ساباقتا وتىرساڭ دا ويىڭ سول جاقتا وتىرادى. مۇنداعى ۋاقىتىڭ تەككە ءوتىپ جاتقانداي بولادى. تاۋار الۋعا قارجىنى قايدان الام دەپ تاعى باس قاتىراسىڭ. ويتپەسەڭ تاعى بولمايدى. ءبىزدىڭ تۇتىنۋشىلار قولما قول ەسەپ ايىرىسۋعا داعدىلانباعان. ونىڭ ۇستىنە تاۋار ساتۋشىلار وتكىزۋ ءۇشىن قارىزعا بەرىپ ۇيرەتىپ تاستاعان. سوسىن سەن دە تاۋەكەل ەتەسىڭ. قازىر جۇمساعان قارجىمدى پايىزىم وسسە بىرنەشە ەسە ەتىپ قايتارامىن عوي دەپ ۇمىتتەنەسىڭ.كومپانيالار سىياقى تولەسە, جارناما جاساعانىڭ, ادام شاقىرعانىڭ, تاۋارىن وتكىزگەنىڭ ءۇشىن تولەيدى. ال تاۋارىن تەگىن بەرىپ, اقشاسىن وڭدى-سولدى تاراتا بەرەتىن ولار اقىماق ەمەس قوي.
سوندىقتان ادامداردى جازدىرتۋعا كوندىرۋ ءۇشىن اي سايىن الاتىن جالاقىڭ جايلى وتىرىك ايتۋعا تۋرا كەلەدى. «وسى ايدا 100 مىڭ الدىم» دەسەڭ, ستۋدەنتتەردىڭ كوزى جانىپ كەتەدى. بار كۇش جىگەرىن كومپانيانىڭ تاۋارىن ساتۋعا جۇمساپ, ارامتەر بولىپ جۇرگەنى بايعۇستاردىڭ. بىراق ولار تەك كومپانيانىڭ يگىلىگىنە جۇمىس جاساپ جاتقاندارىن ىستەرىنەن تۇك شىعارا الماعاندا عانا تۇسىنەدى. ولار مۇنى ءتۇسىنىپ, بارىنەن باز كەشىپ وتىرعاندا, ءدال سولار سياقتى قارماققا ىلىككەندەر تاعى كەلەدى. «كەڭسەدەگى جۇمىس» دەگەن جارنامانىڭ قۇرىعىنا ءالى تالاي ستۋدەنتتەردىڭ تۇسەتىنى ايان. ولاردىڭ ءبىرى شارشاعاندا, ەكىنشىسى ورنىنا دايىن تۇراتىنى ومىرلىك زاڭدىلىق. ال, الپاۋىت كومپانيالار مەن الاياق «تابىسكەرلەر» ءوز جۇمىستارىن وسىلايشا جالعاستىرا بەرمەك.

ليمانا قويشيەۆا, پسيحولوگ:

بۇل جەكە ءبىر ادامدار باراتىن, وزدەرىنىڭ زاڭدارى بار, بەلگىلى ءبىر يەرارحيانى ۇستاناتىن جابىق قۇرىلىم. ولاردىڭ كوكەيكەستى نارسەسى ول – اقشا نەمەسە ابسوليۋتتى باقىت.
قىزمەتكەرلەردى تاڭداۋ ارتىق اقپاراتتار قاعيداتتارى بويىنشا جۇرگىزىلەدى. ادامداردى يدەولوگياعا تولى اقپاراتتارمەن ساناسىن ۋلاپ ءولتىرۋ قاۋىپتەرى تۇر. ولار ءبىزدىڭ تاۋار ەڭ كۇشتى, مەن ونى ساتۋمەن اينالىسامىن, ءسىز وسى جۇمىستار ارقىلى كوپ اقشا تابۋ مۇمكىندىگىنە يە بولاسىز, ءسويتىپ ارمانىڭىزعا قول جەتكىزەسىز دەپ ايتادى. يدەولوگيالىق فاكتوردا قۇرىلىمدىق ۇيىمنىڭ اجىراماس بولىگى بولىپ تابىلادى. يدەيا ول توپتاستىرۋدىڭ تاپتىرماس كۇشى. «بارىنەن كوڭىلى قالىپ» جانە «بيزنەستەن» كەتكىسى كەلگەن ادامدارعا ولار يدەياعا دەگەن ادالدىق تۋرالى ەسكەرتەدى.
«جەلىلىك كومپانيالارداعى» «كادرلىق رەزەرۆتەر» ول – ءوزىنىڭ مۇمكىندىگىن تولىق اشا الماعان نەمەسە امبيتسياسى تۇككە تۇرمايتىن, ياعني ءوز-وزىنە كوڭىلى تولمايتىن, قىزمەتتىك مانسابىنا, ماتەريالدىق جاعدايىنا قاناعاتتانبايتىن ادامدار. ولاردىڭ نەگىزگى كادرلارىن الەۋمەتتىك جاعىنان از قامتىلعان جانە الەۋمەتتىك قورعالماعان توپتاعى ادامدار, ناقتى اتاپ ايتساق ءۇي شارۋاسىنداعىلار, ستۋدەنتتەر, زەينەتكەرلەر قۇرايدى.

گۇلجاز قىدىقبەكوۆا