استانا قالاسى ءماسليحاتىنىڭ كەزەكتەن تىس سەسسياسىندا ەلوردانىڭ ەكونوميكالىق, الەۋمەتتىك تىنىسىنا قاتىستى بىرقاتار ماڭىزدى قۇجاتتار بەكىتىلدى. قالا اكىمىنىڭ ورىنباسارى ەرلان بەكمىرزاەۆتىڭ قاتىسۋىمەن وتكەن جيىندا الدىمەن باس قالانىڭ 2022-2024 جىلدارعا ارنالعان بيۋدجەتى ناقتىلاندى.
قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆتىڭ بايانداۋىنشا, قارجىنى قايتا ءبولۋ ناتيجەسىندە بىرقاتار باسقارماعا قوسىمشا قارجى ءبولىندى. اتاپ ايتقاندا, ءبىلىم باسقارماسىنا كۇلتەگىن كوشەسى, 17/1 مەكەنجايىنداعى بالاباقشا عيماراتىن ساتىپ الۋعا 200 ملن تەڭگە, دەنە شىنىقتىرۋ جانە سپورت باسقارماسىنا كوركەم گيمناستيكا مەن مانەرلەپ سىرعاناۋ شارالارىن وتكىزۋگە 30 ملن تەڭگە بولىنگەن. اكتيۆتەر جانە مەملەكەتتىك ساتىپ الۋ باسقارماسىنا اسكەري كوميتەت عيماراتىن ساتىپ الۋعا قوسىمشا 420 ملن تەڭگە ءبولىنىپ, بۇل جوبانى قارجىلاندىرۋ 520 ملن تەڭگەگە دەيىن جەتكىزىلدى.
قۇرىلىس باسقارماسىنا «Ramada Plaza» عيماراتىن ستاتسيونارعا اينالدىرۋ ءۇشىن جوبالاۋ مەن قايتا جاڭارتۋدى باستاۋعا قاراجات قاراستىرىلعان. كولىك جانە جول-كولىك ينفراقۇرىلىمىن دامىتۋ باسقارماسىنا تاسىمالداۋشىنىڭ شىعىستارىن سۋبسيديالاۋعا قوسىمشا 200 ملن تەڭگە ءبولىنىپ, جالپى سوماسىن 4,2 ملرد تەڭگەگە جەتكىزۋ قاراستىرىلعان.
– وسىلايشا, ەنگىزىلەتىن وزگەرىستەردى ەسكەرە وتىرىپ, استانانىڭ 2022 جىلعا ارنالعان ناقتىلانعان بيۋدجەتىنىڭ جالپى كولەمى 911 ملرد 190 ملن تەڭگەنى قۇرايدى. ونىڭ ىشىندە ءوز تابىسى بويىنشا ءتۇسىم 579,2 ملرد تەڭگەنى, رەسپۋبليكالىق بيۋدجەت پەن ترانسفەرتتەر ءتۇسىمى 236,5 ملرد تەڭگە, سونداي-اق قارىزدار ءتۇسىمى 32,1 ملرد تەڭگە بولىپ بەلگىلەندى, – دەدى باسقارما باسشىسى.
ءماسليحات دەپۋتاتى سالتانات جەنالاەۆا كۇلتەگىن جانە اسان قايعى كوشەلەرىندەگى ەسكى ۇيلەردى ىسىرۋعا قارجى ءبولىندى مە دەپ سۇرادى. وعان بايانداماشى قوس كوشەگە جالپى 1,3 ملرد تەڭگە بولىنگەنىن, ونىڭ 800 ملن-ى اسان قايعىعا, 500 ملن-ى كۇلتەگىنگە تيەسىلى بولاتىنىن جەتكىزدى. ءماسليحات دەپۋتاتتارى قالانى تسيفرلاندىرۋ, مەكتەپتەر, ستۋدەنتتىك جاتاقحانالار قۇرىلىسى بويىنشا ساۋال قويدى.
بيىل استانا قالاسى ونوماستيكا كوميسسياسىندا, قالالىق ءماسليحاتتىڭ كوپشىلىك تىڭداۋىندا, قالالىق قوعامدىق كەڭەستە, رەسپۋبليكالىق ونوماستيكا كوميسسياسىندا ەلوردانىڭ كەيبىر قۇرامداس بولىكتەرىنە اتاۋ بەرۋ جانە قايتا اتاۋ تۋرالى ۇسىنىستار قارالىپ, قولداۋ تاپتى. بۇل ۇسىنىستارمەن تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ تانىستىردى. بۇل اتاۋلاردى سەسسيادا دەپۋتاتتار ءبىراۋىزدان ماقۇلدادى. ەندى ولار ادىلەت ورگاندارىنا رەسمي تىركەۋ ءۇشىن جىبەرىلەدى. سونداي-اق اتالمىش باسقارما باسشىسى باس قالانىڭ قايتا اتالۋىمەن بايلانىستى شاھار رامىزىندەگى وزگەرىس تۋرالى ايتتى. ناقتى ەلوردانىڭ ەلتاڭباسى مەن تۋىنداعى تەك «Nur-Sultan» دەگەن ءسوز «Astana» دەگەن سوزبەن اۋىستىرىلدى.
جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب قالالىق باعدارلاردىڭ جولاۋشىلار كولىگىندە جولاقىدان بوساتىلعاندار ساناتىنا جەلتوقسان وقيعاسى كەزىندە زارداپ شەككەندەر, بارلىعى 51 ادام قوسىلعانىن جەتكىزدى.
بۇدان بۇرىن ساناتورلىق-كۋرورتتىق ەمگە باراتىن مۇمكىندىگى شەكتەۋلى جاننىڭ قاسىنا ەرەتىن ادامعا اكىمدىك 35 ايلىق ەسەپتىك كورسەتكىش (اەك) كولەمىندە شىعىنىن وتەيتىن. ەڭبەك جانە حالىقتى الەۋمەتتىك قورعاۋ مينيسترلىگى ءتيىستى قۇجاتقا وزگەرىس ەنگىزگەننەن كەيىن ونىڭ كولەمى 70 اەك-كە كوتەرىلدى. بايانداماشى بۇل تۋرالى دا ايتتى.
قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىسى ءاليا قوجاباەۆا, ەكولوگيا كودەكسىنە سايكەس, يەسىز قالدىقتارعا قاتىستى ەرەجەلەردى دايىنداۋشى بولىپ ەكولوگيا, گەولوگيا جانە تابيعي رەسۋرستار مينيسترلىگى بەكىتىلگەنىن ايتىپ, اتالمىش باسقارما ازىرلەگەن ءتيىستى ەرەجەنىڭ كۇشى جويىلاتىنىن جەتكىزدى.
تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى ءانۋار سايپوۆ 549 ملن تەڭگە سوماسىنداعى جالپى اۋدانى 2 گەكتاردى قۇرايتىن 13 نىسان بويىنشا 47 جەر تەلىمىن ساتىپ الۋ شارتىمەن تانىستىردى.
