استانا قالاسى اكىمدىگىندە سىبايلاس جەمقورلىققا قارسى كۇرەستى كۇشەيتۋ جونىندەگى ۆەدومستۆوارالىق كوميسسيانىڭ وتىرىسى ءوتتى. جيىندا استانا قالاسىنىڭ اكىمى اسەت يسەكەشەۆ اكىمدىكتىڭ بارلىق قۇرىلىمدىق بولىمشەلەرىنىڭ, ۆەدومستۆوعا قاراستى ۇيىمدار مەن مەكەمەلەردىڭ باسشىلارىنا ءتيىستى تاپسىرمالار بەردى.
قالا اكىمى ءوز سوزىندە باسقارما باسشىلارىنىڭ سىبايلاس جەمقورلىققا قارسى كۇرەس ساياساتىن جۇزەگە اسىرۋعا نەمقۇرايلى قارايتىنىن اتاپ ءوتىپ, وسى باعىتتا پارمەندى شارالار قابىلداۋدى تاپسىردى. ەڭ ءبىرىنشى ولار اكىمشىلىك توسقاۋىلداردى قىسقارتۋ باعىتىنداعى جۇمىستاردى جالعاستىرىپ, اكىمدىكتە كورسەتىلەتىن بارلىق مەملەكەتتىك قىزمەتتەردىڭ ايقىندىلىعى مەن جاريالىلىعىن قامتاماسىز ەتىپ, تالداۋ جۇرگىزۋى ءتيىس. سونىمەن قاتار, جەر ۋچاسكەلەرىن بەرۋ جانە قۇرىلىس بارىسىندا تەندەرلەر وتكىزۋ, ورىندالعان جۇمىس اكتىلەرىنە قول قويۋ كەزىندە سىبايلاس جەمقورلىق تاۋەكەلدەرىن ازايتۋعا باعىتتالعان بىرقاتار باعىتتاردى ايقىنداپ بەردى.
جەمقورلىقتىڭ الدىن الۋ ءۇشىن ەلوردا اكىمدىگى مەن ۆەدومستۆوعا قاراستى قۇرىلىمداردىڭ عيماراتتارىنىڭ ءبىرىنشى قاباتتارىندا بەينەباقىلاۋ كامەرالارى جانە دىبىس جازاتىن قۇرالدارمەن جابدىقتالعان ارنايى ورىنجايلار ۇيىمداستىرىلماق. بۇل ورىنجايلاردا كاسىپكەرلەرمەن كەزدەسۋلەر وتكىزىلەتىن بولادى, ول جانە كوميسسيالاردىڭ قاتىسۋىمەن جۇزەگە اسىرىلادى. سوندا باسشىلاردىڭ كاسىپكەرلەرمەن جەكە بايلانىسقا شىعۋىنا جول بەرىلمەيدى. اكىمدىكتىڭ بارلىق قۇرىلىمدىق بولىمشەلەرىنىڭ باسشىلارىنا قۇجاتقا قول قويۋ ءۇشىن كاسىپكەرلىك سۋبەكتىلەرىن ءوز كابينەتتەرىندە قابىلداۋعا ەندى تىيىم سالىنادى. سونداي-اق, جۇمىستان تىس ۋاقىتتا دا تەندەر جەڭىمپازدارىمەن كەزدەسۋگە بولمايدى.
وسىلايشا, ەلوردا اكىمدىگىنىڭ قۇرىلىمدىق بولىمشەلەرىنىڭ باسشىلارى ءۇشىن بيزنەس وكىلدەرىمەن جۇمىستى ۇيىمداستىرۋ جونىندەگى جاڭا تالاپتار بەلگىلەندى.
– قوعامنىڭ مەملەكەتتىك قىزمەتشىلەرگە قويعان مورالدىق-ادامگەرشىلىك تالاپتارى جوعارى. مەملەكەتتىك قىزمەتشىلەر جۇمىستان تىس ۋاقىتتا جالپىعا بەلگىلەنگەن مورالدىق-ەتيكالىق نورمالاردى ۇستانۋى كەرەك, قوعامعا قارسى ءجۇرىس-تۇرىس جاعدايلارىنا جول بەرىلمەۋى ءتيىس, – دەپ تياناقتادى مۇنى ءا.يسەكەشەۆ.
قالا باسشىسى مەملەكەتتىك قىزمەتكەرلەردىڭ ادەپ كودەكسىنە سايكەس ءتارتىپ ستاندارتتارىن ساقتاۋعا باسا نازار اۋدارىپ, قىزمەتتىك كولىكتەردى جۇمىستان تىس ۋاقىتتا جانە جەكە ماقساتتا پايدالانۋدىڭ زاڭعا قايشى ارەكەت ەكەندىگىن دە ەسكە سالدى.
استانا اكىمى «استانا سۋ ارناسى», «كوممۋنالدىق مەنشىك قورى», «قالالىق جىلجىمايتىن مۇلىك» مەملەكەتتىك كوممۋنالدىق كاسىپورىندارى مەن «استاناەنەرگوسەرۆيس», «استاناتەپلوترانزيت», «استانا-رەك» اق جانە تاعى باسقا كاسىپورىنداردىڭ باسشىلارىنا دا سىبايلاس جەمقورلىققا قارسى كۇرەس جۇمىستارىن كۇشەيتۋدى تاپسىردى.
– سىبايلاس جەمقورلىققا قارسى كۇرەس زاڭناماسىن بۇزۋ فاكتىلەرى تىركەلگەن جاعدايدا, ءبىرىنشى باسشىلار وزدەرى جەتەكشىلىك ەتەتىن مەملەكەتتىك ورگان ءۇشىن جەكە جاۋاپ بەرەتىن بولادى, – دەپ ەسكەرتتى قالا اكىمى.
ءا.يسەكەشوۆ بۇدان ءارى انىقتالعان كەز كەلگەن جاعداي قوعام الدىندا تۇتاستاي اكىمدىكتىڭ بەدەلىن ءتۇسىرىپ, ازاماتتاردىڭ مەملەكەتتىك ورگاندارعا دەگەن سەنىمىن جوعالتاتىنىن باسا ايتىپ ءوتتى. قولعا الىنعان شارالاردىڭ بارلىعى لاۋازىمدى تۇلعالاردىڭ دا, مەملەكەتتىك ورگان قىزمەتىنىڭ دە ايقىندىلىعىن قامتاماسىز ەتۋگە سەپتەسەرى ءسوزسىز.
