حالىقتىڭ اسىلدىعىن, ۇلتتىڭ نامىسىن, ەلدىڭ مەرەيىن ايقىندايتىن سالانىڭ ءبىرى – سپورت. بۇل ورايدا ەلباسىمىز نۇرسۇلتان نازارباەۆ «قازاقستان-2050» ستراتەگياسىندا حالىقتىڭ 30 پايىزىن بۇقارالىق سپورتقا تارتۋ مەجەسىن ايقىنداپ, مەملەكەتتىڭ وركەنيەتتى بولۋى الدىمەن حالقىنىڭ دەنساۋلىعىنا بايلانىستى بولاتىنىن ايتقان بولاتىن. وسى رەتتە ەلىمىز بويىنشا سالاۋاتتى ءومىر سالتىن قالىپتاستىرۋدىڭ جانە جوعارى شەبەرلىكتى سپورتتى دامىتۋدىڭ مەملەكەتتىك باعدارلاماسى دا جۇزەگە اسىرىلىپ وتىر.
مەملەكەت باسشىسىنىڭ العا قويعان مىندەتىن اتقارۋ بارىسىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى دە قازاقستاندىق سپورتتىڭ دامۋىنا ايتارلىقتاي ۇلەس قوسىپ وتىرعانىن ايتۋعا بولادى. ەلباسىنىڭ باستاماسىمەن قۇرىلىپ, بيىل 20 جىلدىعىن اتاپ ءوتىپ وتىرعان وقۋ ورداسى وليمپيادالىق, ۇلتتىق جانە بۇقارالىق سپورتتىڭ وركەندەۋىنە, جاس سپورتشىلاردى قولداۋدا, ماماندار دايارلاۋدا وراسان باي تاجىريبە جيناقتادى.
ۋنيۆەرسيتەتتە جاستاردىڭ سپورتپەن شۇعىلدانۋىنا تولىق مۇمكىندىك جاسالعان. ءاربىر وقۋ كورپۋستارىندا سپورتتىق زالدار, سپورت الاڭدارى, جاتتىقتىرۋ زالدارى, بوكس رينگى, ويىن زالدارى جۇمىس ىستەيدى. جالپى ءبىلىم ورداسى تاراپىنان سپورتتىق ينفراقۇرىلىمدارعا كوپ كوڭىل بولىنۋدە. جاڭا وبەكتىلەر پايدالانۋعا بەرىلدى. بۇگىندە ۋنيۆەرسيتەتتە سپورت تۇرلەرىنە بەيىم ستۋدەنتتەر ءۇشىن ءارتۇرلى سپورتتىق سەكتسيالار جۇمىس ىستەيدى.
«دەنە شىنىقتىرۋ جانە سپورت» كافەدراسىنىڭ مەڭگەرۋشىسى, پەداگوگيكا عىلىمدارىنىڭ كانديداتى, دوتسەنت ۇلبولسىن مارشىباەۆانىڭ باسشىلىعىمەن ماماندىق بويىنشا ماگيستراتۋرا ءبولىمى اشىلدى. سونىمەن قاتار, كافەدرا ءوزىنىڭ شىعارماشىلىق, عىلىمي-زەرتتەۋ جۇمىستارى بويىنشا ق.مۇڭايتپاسوۆ اتىنداعى رەسپۋبليكالىق سپورت مەكتەپ-ينتەرناتىمەن, قازاقستان بوكس فەدەراتسياسىمەن, «شىعىس» عىلىمي-ادىستەمەلىك ورتالىعىمەن جانە فيتنەس كلۋبتارمەن بايلانىس ورناتىپ, سپورتتىڭ دامۋىنا, سونىمەن قاتار كاسىبي سپورتشىلاردى دايىنداۋعا ايرىقشا ءمان بەرۋدە. ستۋدەنتتەردىڭ تولىققاندى ءبىلىم الۋىن قامتاماسىز ەتۋ ماقساتىندا كافەدرا جانىنان مەديكو-بيولوگيالىق زەرتتەۋ لابوراتورياسى دا اشىلدى.
ل.گۋميلەۆ اتىنداعى ۋنيۆەرسيتەتتە قازاقستاننىڭ ابىرويىن ءساتتى قورعاپ جۇرگەن داڭقتى سپورتشىلار ءبىلىم الدى. بوكستان الەم چەمپيونى, وليمپيادا ويىندارىنىڭ كۇمىس جۇلدەگەرى, كاسىپقوي بوكستان ورتا سالماق دارەجەسىندەگى الەم چەمپيونى گەننادي گولوۆكين, وليمپيادا ويىندارىنىڭ جانە الەم چەمپيونى الەكساندر ۆينوكۋروۆ, «قازاقستان بارىسى» ءتۋرنيرىنىڭ جەڭىمپازى, قازاق كۇرەسىنەن ەكى دۇركىن الەم چەمپيونى ايبەك نۇعىماروۆ, دزيۋدو كۇرەسىنەن ازيا ويىندارىنىڭ كۇمىس جۇلدەگەرى داستان ىقىباەۆ, دزيۋدو كۇرەسىنەن الەم كۋبوگىنىڭ قولا جۇلدەگەرى باقداۋلەت ءسابيتوۆ وسى ۋنيۆەرسيتەتتە ءبىلىم مەن ءتالىم العانىن ماقتانىشپەن ايتۋعا بولادى. سونداي-اق, ازيا پاراوليمپيادا ويىندارىنىڭ 5 دۇركىن جەڭىمپازى ءانۋار احمەتوۆ, شاڭعى سپورتىنان الەم چەمپيوناتىنىڭ قولا جۇلدەگەرى مارك ستاروستين جانە باسقا دا سپورتشىلار ەلىمىزدىڭ نامىسىن ابىرويمەن قورعاي ءبىلدى.
بۇگىندە دەنە شىنىقتىرۋ جانە سپورت ماماندىعى بويىنشا ءبىلىم الاتىن ستۋدەنتتەر ءوز بولاشاعىن كاسىبي سپورتتىق جولمەن بايلانىستىرىپ, ءوز شەبەرلىكتەرىن ارتتىرۋدا. فاكۋلتەتتە سپورتتىڭ ءار تۇرىنەن حالىقارالىق, رەسپۋبليكالىق دەڭگەيدەگى سايىستاردا الدىڭعى قاتارلاردان كورىنىپ جۇرگەن ستۋدەنتتەر بار. ماسەلەن, سامبودان جاستار اراسىنداعى الەم چەمپيوناتىنىڭ جەڭىمپازى, الەم چەمپيونى, بۇكىلالەمدىك جازعى ۋنيۆەرسيادانىڭ قولا جۇلدەگەرى اجار كەڭبەيىل, دزيۋدودان قر ۇلتتىق قۇراما كومانداسىنىڭ مۇشەسى, ازيا چەمپيونى ايگەرىم ابىلقادىروۆا, بوكستان سپورت شەبەرى, قر قۇراما كومانداسىنىڭ مۇشەسى, الەم چەمپيوناتىنىڭ قاتىسۋشىسى اياۋلىم بورانباەۆا, سينحروندى ءجۇزۋ سپورتىنان حالىقارالىق دارەجەدەگى سپورت شەبەرلەرى, الەم چەمپيوناتىنىڭ قولا جۇلدەگەرلەرى اپالى-ءسىڭلى الەكساندرا جانە ەكاتەرينا نەميچتەر جانە ستول تەننيسىنەن قر سپورت شەبەرى, ۇلتتىق قۇراما كومانداسىنىڭ مۇشەسى, قر بىرنەشە دۇركىن چەمپيونى اناستاسيا لاۆروۆا ۋنيۆەرسيتەتتىڭ عانا ەمەس, قازاقستاننىڭ اتىن الەمگە ءماشھۇر ەتىپ ءجۇر. سونداي-اق, قۇزعا ورمەلەۋدەن سپورت شەبەرى, قر قۇراما كومانداسىنىڭ مۇشەسى اسەل مارلەنوۆا, كىر تاسىن كوتەرۋدەن سپورت شەبەرى, ەل چەمپيوناتىنىڭ بەس دۇركىن جەڭىمپازى, الەم چەمپيوناتىنىڭ كۇمىس جۇلدەگەرى الىبەك ناۋرىزبايۇلى, قول كۇرەسىنەن جاسوسپىرىمدەر اراسىندا الەم چەمپيونى, ازيا چەمپيوناتىنىڭ كۇمىس جۇلدەگەرى بالجان زەرەنحانوۆا, سۋدا جۇزۋدەن ازيا پاراويىندارىنىڭ قولا جۇلدەگەرى, حالىقارالىق دارەجەدەگى سپورت شەبەرى بەكجان ەسىركەپوۆ, سپورتتىق گيمناستيكادان قر سپورت شەبەرى, قازاقستان جاستار قۇراماسىنىڭ مۇشەسى, ەل چەمپيونى, الەم جانە ازيا چەمپيوناتتارىنا قاتىسۋشى ايدا باۋىرجانوۆا سىندى تاجىريبەلى سپورتشىلار ءبىلىم الۋدا.
قازىرگى ۋاقىتتا ۋنيۆەرسيتەت قابىرعاسىندا ۇلتتىق سپورت تۇرلەرىن دامىتۋ قولعا الىنىپ, ۇلتتىق سپورت تۇرلەرى قاۋىمداستىعىمەن بايلانىس ورناتىلىپ جاتىر. دەمەك, ءبىلىم ورداسى ۇلتتىق سپورت تۇرلەرىن دامىتۋعا دا مۇددەلى. وسى باعىتتا عىلىمي تۇرعىدان شارالار قاراستىرىلىپ, جاستاردىڭ ۇلتتىق سپورتقا دەگەن قىزىعۋشىلىعىن ارتتىرۋ جۇمىستارى قولعا الىنۋدا.
بۇقارالىق سپورت جايىندا ايتار بولساق, ۋنيۆەرسيتەت ستۋدەنتتەرى مەن وقىتۋشىلارى استانا قالاسىندا ءوتىپ تۇراتىن سپورتتىق شارالارعا بەلسەندى قاتىساتىنىن اتاپ ايتۋعا بولادى.
تۇيىندەپ ايتقاندا, ۋنيۆەرسيتەت تاريحىنداعى سپورتتىق جەتىستىكتەر ءداستۇرى الداعى ۋاقىتتا دا جالعاسا بەرەتىنىنە سەنىممەن قارايمىز.
عالىم قوجابەكوۆ
