ۇلى جەڭىستىڭ 71 جىلدىعىنا وراي بۇگىن «ەلوردا جاستارى زورلىق-زومبىلىققا قارسى» ۇرانىمەن جەڭىل اتلەتيكادان ەستافەتالىق جارىس ءوتتى. استانا قالاسى اكىمدىگىنە قاراستى دەنە شىنىقتىرۋ جانە سپورت باسقارماسىنىڭ ۇيىتقىسىمەن ۇيىمداستىرىلعان شاراعا 500-دەن اسا ادام قاتىستى.
ەستافەتا 280-670 مەترلىك 14 كەزەڭنەن تۇردى. جالپى اراقاشىقتىقتى قوسقاندا 6225 مەتردى قۇرايتىن جارىس جەڭىس داڭعىلىنان باستالىپ, ءاليا مولداعۇلوۆا كوشەسىنە ۇلاستى. جاس جەلاياقتار ءارى قاراي بەيبىتشىلىككە بۇرىلىپ, كەنەسارى كوشەسىنەن بىراق شىقتى. جول پاترۋلدىك پوليتسيانىڭ قاداعالاۋىمەن بۇل جەرلەردە كولىك قوزعالىسى ۋاقىتشا شەكتەلدى.
سپورتشىلار ق.مۇڭايتپاسوۆ اتىنداعى ورتالىق ستاديون الدىنداعى مارەنى كەسىپ ءوتتى. قاتىسۋشىلار اتالمىش ديستانتسيانى 15 مينۋت ىشىندە ەڭسەردى. بايگەنىڭ كوش باسىنان گۋمانيتارلىق كوللەدج ستۋدەنتتەرى كورىندى. اتالمىش وقۋ ورنىنىڭ شاكىرتى, ەستافەتانىڭ تۇراقتى قاتىسۋشىسى گۋزەل نۇرمانوۆا ء«بىرىنشى كەزەڭنەن-اق جۇگىرۋشىلەردىڭ توپ باسىندا بولدىق. كەيىن 32 مەكتەپ وقۋشىسىمەن يىق تىرەسە كەلدىك تە, مارەگە جاقىنداعاندا ءبارىن ەداۋىر ارتقا قالدىرىپ, ءابسوليۋتتى چەمپيوندىققا جەتتىك. ءبىزدىڭ كوماندا جىل سايىن باس جۇلدەنى قانجىعاعا بايلاپ ۇيرەنگەن. سەبەبى, دەنەشىنىقتىرۋ ۇستازدارى ەستافەتانىڭ قىر-سىرىنا ءاردايىم باۋليدى» دەيدى.
«بۇل – ءداستۇرلى جارىس. ەستافەتا 1952 جىلدان بەرى ءار مامىردىڭ توعىزىندا ءوتىپ كەلەدى. اۋا-رايى كەدەرگى بولعان ەمەس. قار جاۋسا دا, جاڭبىر قۇيىپ تۇرسا دا, كۇرەسكەرلىك جىگەرىمىز جاسىماعان. كىم جۇگىرەدى دەمەيمىز, بالالاردىڭ دايىندىعى, سپورتتىق شارالارعا دەگەن ىنتاسى قۋانتارلىق» دەيدى جارىستىڭ باس تورەشىسى, قازاقستاننىڭ ەڭبەك سىڭىرگەن جاتتىقتىرۋشىسى يۋري ستاروستين. وقۋشىلار اراسىنان 25 مەكتەپ توپ جارسا, جالپى ەستافەتانىڭ بارلىق كەزەڭى بويىنشا گۋمانيتارلىق كوللەدج كومانداسى جەڭىمپاز اتاندى. جۇلدەگەرلەر ۇيىمداستىرۋشىلار تاراپىنان مەدالدەرمەن ماراپاتتالىپ, ەستەلىك سىيلىقتارعا كەنەلدى.
سونداي-اق بۇگىن كيوكۋشينكاي-كان كاراتە فەدەراتسياسىنىڭ تاربيەلەنۋشىلەرى اق كيمونومەن 2900 مەتردى جۇگىرىپ ءوتتى. بۇقارالىق جۇگىرىسكە 500 دەن اسا كاراتەشى قاتىستى. ولار سالتانات سارايى, قورعالجىن تاس جولى بويىمەن تۇران داڭعىلىنا ءوتىپ, ق.مۇڭايتپاسوۆ اتىنداعى ورتالىق ستاديوندا جينالدى. شارا سوڭىندا قالا تۇرعىندارى كاراتەشىلەردىڭ ونەرىن تاماشالادى.
ءمادينا جاقىپ
