ۇلى وتان سوعىسى ادامزات ءۇشىن وتە كوپ قاسىرەت اكەلگەن. بۇل تۋرالى تاريح كىتاپتارىنان وقىپ بىلدىك. فاشيستەرمەن بولعان سوعىستا ءبىزدىڭ اتالارىمىز دا مايدان دالاسىندا قازا تاپقان. ال كوپتەگەن مايدانگەرلەر جارالى بولىپ ەلگە ورالدى.
ميلليونداعان ادام قيان-كەسكى ۇرىستاردى وققا ۇشىراعان ۇلى وتان سوعىسىنا مەنىڭ دە اتالارىم قاتىسقان. اكەمنىڭ دە, انامنىڭ اتالارى سوعىستى باستان كەشكەن ەكەن. ارينە, مەن ول كىسىلەردى كورمەدىم. بىردە ۇيدەگى سۋرەتتەردى كورىپ وتىرعاندا اكەم ماعان: «مىناۋ سەنىڭ اتاڭ بولادى. سوعىستا بولعان. فاشيستەردى جەڭگەن. سەن شوبەرەسى بولاسىڭ. ەگەر بۇل اتالارىڭ بولماسا, مەن دە, سەن دە بۇل دۇنيەدە بولماس ەدىك, بالام» دەپ ايتقان ەدى. سوسىن مەن دە وسى مالىمەتكە قىزىعىپ, اتالارىمنىڭ قاي جەردە شايقاسقاندارى, سوعىستان كەيىن نە ىستەگەندەرى جونىندە سۇراستىرا باستادىم.
ۇلى وتان سوعىسىنا اقمولا قالاسىنان اتتانعان اكەم مەن انامنىڭ اتالارى جاباي دوششين مەن ابدىكەي بالجانوۆ بەيبىت ومىردە دە ونەگەلى ەڭبەك ەتكەن. مەن بۇگىن لەنينگراد مايدانىنداعى ۆولحوۆسك اسكەري توبى قۇرامىندا ۇرىستارعا قاتىسقان جاباي اتام تۋرالى جازىپ وتىرمىن. اجەمنىڭ ايتۋىنشا, سوعىستىڭ باسىنان كىرىسكەن اتام 1942 جىلى فاشيستەردىڭ كەزەكتى ءبىر شابۋىلىنا تويتارىس بەرىپ جاتقان كەزىندە يىعىنان قاتتى جارالانىپتى. سودان گوسپيتالعا ءتۇسىپ, بىرنەشە اي بويى ەمدەلىپتى. جاراسىنان ەپتەپ جازىلعان اتامدى دارىگەرلەر ەلگە قايتارۋ جونىندە ۇيعارىم شىعارىپتى. ونى ەستىگەن اتام «مەنى قايتادان سوعىسقا جىبەرىڭدەرشى, مايدانداس دوستارىممەن بىرگە بولىپ, فاشيستەردەن ءوش العىم كەلەدى» دەپ تاعى دا سوعىسقا سۇرانىپتى. بىراق كومانديرلەر زاپاسقا شىعارۋعا بۇيرىق بەرىپتى.
وسىلايشا جاۋ قولىنان جارالانىپ, ەلگە ورالعان اتام اقمولا وبلىسىنىڭ جالمانقۇلاق اۋىلىندا, كالينين اتىنداعى سوۆحوزدىڭ مال شارۋاشىلىعىندا ۇزاق جىلدار ەڭبەك ەتىپتى. اتامنىڭ سوعىستاعى ەرلىگى مەن بەيبىت ومىردەگى قاجىرلى ەڭبەگىنە بەرىلگەن وردەن-مەدالدارى ءالى دە ساقتاۋلى تۇر.
بۇگىنگى تاڭدا مايدانگەر اتامنىڭ ۇرپاقتارى, ياعني, بىزدەر ەلوردامىز استانادا تۇرامىز. ءبىزدىڭ اۋلەت ءۇشىن ۇلى وتان سوعىسىنىڭ مايدانگەرلەرى ءاردايىم قۇرمەتتى بولىپ سانالادى. ويتكەنى, ءبىز سول سۇراپىل سوعىستىڭ قاسىرەتىن تارتقان مايدانگەرلەردىڭ ۇرپاعىمىز. سوندىقتان جىل سايىن جەڭىس كۇنى مەرەكەسىندە قياش اجەم باستاپ اتالارىمىزدى ەسكە الۋعا داستارقان جايىلادى. استانادا جەڭىس كۇنىنە ارنالعان شارالارعا ۇلكەن ىقىلاسپەن قاتىسامىز.
ءبىزدىڭ پرەزيدەنتىمىز نۇرسۇلتان نازارباەۆ ۇلى وتان سوعىسى جەڭىسىنىڭ 70 جىلدىعىنا وراي ارداگەرلەرگە قۇرمەت كورسەتۋدى وتكەن جىلدىڭ سوڭىندا-اق باستاپ جىبەردى. بۇل ەرلىكتى قاستەرلەي بىلەتىن ەلدىكتىڭ بەلگىسى دەپ ويلايمىن. مايدانگەر اتانىڭ شوبەرەسى بولعانىمدى ماقتان تۇتامىن. بيىل ەلوردامىز استانادا جەڭىستىڭ 70 جىلدىعىنا ارنالعان شەرۋ وتەدى. ءبىز مىندەتتى تۇردە سول شەرۋدى كورەتىن بولامىز.
«مەنىڭ اتام – مايدانگەر!» اتتى كونكۋرسقا جولداپ وتىرعان وسى ماقالام ارقىلى ۇلى وتان سوعىسىنا قاتىسقان بارلىق ارداگەر اتالار مەن اجەلەردى جەڭىستىڭ 70 جىلدىعىمەن قۇتتىقتايمىن. ماڭگىلىك ەلىمىزدە ماڭگىلىك بەيبىتشىلىك بولعانىن تىلەيمىن.
ديلناز قوسىمجان,
№ 54 مەكتەپ-ليتسەيدىڭ وقۋشىسى
