كەشە استانا اكىمى ادىلبەك جاقسىبەكوۆ كەزەكتى اپپارات ماجىلىسىندە «ءبىز تازا قالانى قولدايمىز!» ەكولوگيالىق ايلىعىن وتكىزۋ مەن الداعى ماڭىزدى وقيعالارعا دايىندىقتىڭ بارىسىن قارادى دەپ حابارلادى قالا اكىمىنىڭ ءباسپاسوز قىزمەتى.
ءماجىلىس بارىسىندا اكىم شاعىن جانە ورتا بيزنەستى دامىتۋ ءۇشىن جەر تەلىمدەرىن ۇسىنۋدى ۇيىمداستىرۋ جانە بۇل جۇمىستىڭ اشىق جۇرگىزىلۋى ماسەلەسىنە توقتالىپ ءوتتى.
– ءبىز باسساۋداعا قويىلاتىن العاشقى 88 جەر تەلىمىن انىقتاپ قويدىق. ولاردىڭ سيپاتتاماسى, ورنى جانە ساتىلىمعا قاتىسۋ ەرەجەلەرىمەن قالالىق ساۋلەت جانە قالا قۇرىلىسى باسقارماسىنىڭ سايتىندا تانىسۋعا بولادى, – دەدى اكىم. قالا تۇرعىندارىنا بۇل اقپاراتتى بارىنشا تۇسىنىكتى ەتىپ جەتكىزۋ كەرەك. سونىمەن قاتار, ءارتۇرلى بۇرمالاۋشىلىقتارعا جول بەرىلمەۋ جاعى ەسكەرىلۋى قاجەت.
وسى ايتىلعان جاعدايلارعا جول بەرمەۋ ماقساتىندا جەر تەلىمدەرى ۇزاق ۋاقىتقا جالعا بەرىلەتىن بولادى, ال, ەگەر ولار يگەرىلمەيتىن بولسا, مەملەكەت ونى قايتارىپ الىپ, قايتا باسساۋداعا قويۋعا قۇقىلى. ساتىلىمدار ءار اپتا سايىن وتكىزىلەدى.
سۋ تاسقىنىنا قارسى شارالاردى ايتا كەلە, اكىم كەشەندى جوسپار اياسىندا اتقارىلىپ جاتقان جۇمىستار باقىلاۋدا ەكەنىن اتاپ ءوتتى. قالالىق قۇرىلىمداردىڭ جۇيەلى جۇرگىزىلگەن جۇمىستارىنىڭ ارقاسىندا يلينكا كەنتى سۋ تاسقىنىنان امان قالدى. قالانى سۋ باسۋ قاۋپى مەن توتەنشە جاعدايلاردىڭ الدىن الۋ ءۇشىن بارلىق شارالار قولدانىلۋدا.
ەلوردا اكىمىنىڭ تاپسىرماسىمەن, قالا تۇرعىندارىنىڭ شاعىمدارىنا بايلانىستى قالا جولدارىن شۇعىل جوندەۋدەن وتكىزۋ جۇمىستارى جۇزەگە اسىرىلۋدا. بۇگىنگى كۇنى 116 مەكەن-جاي بويىنشا جۇمىستار اتقارىلدى, قالعان جولداردى ءجوندەۋ بەلگىلەنگەن جوسپارعا سايكەس جۇرگىزىلەدى.
وتكىزىلگەن جالپى قالالىق سەنبىلىك قورىتىندىسىن شىعارا كەلە اكىم «ءبىز تازا قالانى قولدايمىز!» اتتى ەكولوگيالىق ايلىعى جالعاساتىنىن ايتىپ, ونىڭ اياسىندا ودان ءارى اتقارىلۋى ءتيىس جۇمىستاردى بەلگىلەپ بەردى.
– ايلىق بارىسىندا قالانىڭ بارلىق لاستانعان جەرلەرىن تازالاپ, كۇل-قوقىستاردان ارىلتۋ كەرەك, – دەدى قالا باسشىسى.
سونىمەن بىرگە, اكىم كوپىرلەر مەن جاياۋ جۇرگىنشىلەر جولدارىنىڭ تازالىعىنا, عيماراتتاردى قاپتايتىن ماتەريالدار مەن ماڭدايشالاردى اۋىستىرۋ جانە باسقا دا جۇمىستارعا نازار اۋداردى.
سونداي-اق, اكىم الداعى ماڭىزدى وقيعالار – قر پرەزيدەنتىنىڭ سايلاۋى, قازاقستان حالقى بىرلىگى كۇنىن مەرەكەلەۋ, جەڭىستىڭ 70 جىلدىعى سەكىلدى اتاۋلى كۇندەرگە بايلانىستى قالانىڭ دايىندىق جۇمىستارىنا ەرەكشە توقتالىپ ءوتتى.
– استانا باس قالا رەتىندە بارلىق جاعىنان ۇلگى بولۋى ءتيىس. الدا جوعارى دەڭگەيدە وتكىزىلۋى ءتيىس بىرقاتار شارالار تۇر. جاۋاپتى ورگاندارعا وسى شارالاردىڭ ءتيىستى دەڭگەيدە ءوتۋىن ۇيىمداستىرۋدى تاپسىرامىن, – دەدى اكىم.
