استانادا جەر تەلىمىن بەرۋدىڭ جاڭا تاسىلدەرى بەلگىلەندى. ول ەكى كەزەڭنەن تۇرادى. ەڭ اۋەلى, جەر تەلىمىن تەكسەرۋ, ىزدەستىرۋ جۇمىستارىنا جانە جوبالاۋعا رۇقسات الۋ قاجەت.
استانا قالاسى اكىمدىگىنىڭ «جەر تەلىمدەرىندە جوبالاۋعا رۇقسات ەتۋ تۋرالى» قاۋلىسى شىققاننان كەيىن بارلىق ساناتتاعى قۇرىلىس سالۋشىلار (جەكە جانە زاڭدى تۇلعالار) تەكسەرۋ, ىزدەستىرۋ جانە جوبالاۋ جۇمىستارىن جۇرگىزۋ تۋرالى ساۋلەت جانە قالا قۇرىلىسى باسقارماسىمەن كەلىسىمشارت جاساسادى. بۇل قۇجاتتا جۇمىستاردى جۇرگىزۋ ۋاقىتى ناقتى كورسەتىلەدى جانە بۇل مەرزىم سالۋشى تاراپىنان دا, ساۋلەت جانە قالا قۇرىلىسى باسقارماسى تاراپىنان دا مىندەتتى تۇردە ساقتالۋعا ءتيىس.
كەيىنگى كەزدە رۇقسات قاعازدارىن الۋ تارتىبىندەگى اكىمشىلىك كەدەرگىلەردى ازايتۋ جانە الۋ ۋاقىتىن قىسقارتۋ بويىنشا ءتيىستى جۇمىستار اتقارىلۋدا. ماسەلەن, جەر تەلىمىندە تەكسەرۋ, ىزدەستىرۋ جۇمىستارىنا جانە جوبالاۋعا رۇقسات بەرۋ مەرزىمى 15 كۇنگە دەيىن قىسقاردى.
تاعى ءبىر جاڭالىق, قۇرىلىس سالۋعا ۇمىتكەر تەكسەرۋ, ىزدەستىرۋ جۇمىستارىنا جانە جوبالاۋعا رۇقسات الۋ شارالارى كەزەڭىندە ءۇشىنشى تۇلعالاردىڭ (ۇلەسكەرلەردىڭ) قارجىسىن تارتۋعا قۇقى جوق. بۇل جوبالاۋ كەزەڭىندە جەر تەلىمى سالۋشىنىڭ مەنشىگىنە بەرىلمەيدى, تەك جوعارىدا اتالعان جۇمىستاردى جۇرگىزۋ ءۇشىن عانا ۇسىنىلادى دەگەن ءسوز. وسىنداي شارالار جاۋاپسىز قۇرىلىس سالۋشىلاردى قۇرىلىستىڭ باستاپقى كەزەڭىندە-اق انىقتاۋعا مۇمكىندىك بەرەدى.
كەلەسى كەزەڭ – ساۋلەت عيماراتىن سالۋ ءۇشىن جەر تەلىمىن بەرۋ. قۇرىلىس جۇرگىزۋگە جەر تەلىمىن بەرۋ ماسەلەسى دە 15 كۇندە قارالادى. جەر تەلىمدەرى تەگىن بەرىلەدى, ال ۋچاسكە ءۇشىن جالعا بەرۋ اقىسى تەك ەكىنشى كەزەڭدە عانا تولەنەدى. قۇجاتتاردى راسىمدەۋ ەكى كەزەڭدە دە مەملەكەت ەسەبىنەن جۇرگىزىلەدى.
