جەتىسۋدان جەتكەن ءدام
استانادا قازاقستان وڭىرلەرىنىڭ اۋىل شارۋاشىلىعى ونىمدەرىنىڭ ءداستۇرلى جارمەڭكەسى باستالدى. قىمباتشىلىق قىسقان زاماندا قالتاسى جۇقالاۋ حالىقتىڭ ازىق-تۇلىك قورجىنىن تولتىرۋعا مۇمكىندىك بەرەتىن وسىنداي جارمەڭكە ەلوردادا بەسىنشى جىل قاتارىنان وتكىزىلىپ وتىر.
وتكەن سەنبى كۇنى الماتى وبلىسىنىڭ شارۋاقور جۇرتى باستاپ بەرگەن كۇز مەزگىلىنىڭ مولشىلىق پەن ىرىس مەرەكەسى قاراشانىڭ قارا سۋىعى تۇسكەنشە جالعاسادى. وندا كەلگەن حالىق ءوز قالتاسىنا ساي اۋىلدان جەتكەن ءدامدى ساتىپ الا الادى. جارمەڭكەنىڭ قاراپايىم تۇتىنۋشىعا بەرەر پايداسى دا سول, ياعني وڭىرلەردەن جەتكىزىلگەن ازىق-تۇلىك قالاداعى بازار باعاسىنان 10-20 پايىز تومەن ساۋدالانادى. قالالىقتار مۇنداي مۇمكىندىكتى قالت جىبەرسىن بە, جارمەڭكە وتەتىن ورىننان تابىلۋعا تىرىسادى.
بيىلعى العاشقى جارمەڭكە وتكەندە دە قالا اكىمدىگىنىڭ الدىنداعى الاڭدا جينالعان حالىقتىڭ قاراسى مول بولدى. جەتىسۋ ءوڭىرىنەن ەلورداعا جەتكەن 450 توننا ازىق-تۇلىكتى ساتىپ الام دەگەندەر قاز-قاتار تىزىلگەن سورەلەردىڭ ماڭىنا شوعىرلانىپ, قاپ-قاپپەن, دوربا-دوربامەن اكەتىپ جاتتى. الماتىلىقتار دا بىلتىرعىعا قاراعاندا بيىل 50 تونناعا ارتىق ءونىم اكەلىپ, ەت پەن ءسۇت ونىمدەرىن, كوكونىس پەن جەمىس-جيدەكتى سورەلەرگە سىقاستىرا قويىپتى.
الاڭ ورتاسىندا قۇرىلعان ساحنادان وبلىس ونەرپازدارى ءان-كۇيدى توگىلتىپ جاتتى. اسىرەسە, «ءسۇيىنباي سازى» فولكلورلىق-ەتنوگرافيالىق ءانسامبلى بازارشىلاعان جۇرتتىڭ قۇلاق قۇرىشىن قاندىردى.
استانا قالاسىنىڭ اكىمى يمانعالي تاسماعامبەتوۆ پەن الماتى وبلىسىنىڭ باسشىسى اماندىق باتالوۆ جارمەڭكەنى ارالاپ, حالىقتىڭ مەرەكەلىك كوڭىل-كۇيىنە كۋا بولدى.
– استانا سەكىلدى ۇلكەن قالاعا الماتى وبلىسىنان جەتكىزىلگەن 450 توننا ءونىمدى كوپ دەپ ايتا المايمىن. بىراق, ماسەلە ءۇيىپ-توگىپ تاستاۋدا ەمەس. باستىسى – ەل مەن ەلدى, ءوڭىر مەن ءوڭىردى جالعاستىرۋ. ارادا قانشاما شاقىرىمدار بار. الايدا, سوعان قاراماي, الماتىلىقتار ۇلكەن ۇيىمشىلدىقپەن, زور جاۋاپكەرشىلىكپەن ەلورداعا كەلىپ جاتىر, – دەگەن يمانعالي نۇرعاليۇلى الماتى وبلىسىنىڭ اكىمىنە العىسىن ءبىلدىردى.
از-كەم انىقتاما
جارمەڭكەدە 15 توننا قوي ەتى, 16 توننا سيىر ەتى, 14 توننا جىلقى ەتى, 4,2 توننا شوشقا ەتى, 6 توننا قۇس ەتى, 12 توننا بالىق, 18,2 توننا ءسۇت ونىمدەرى, 52 توننا كارتوپ, 194 توننا كوكونىس, 12 توننا جەمىس-جيدەك, 70 توننا ت.ب. تاۋارلار ۇسىنىلدى.
اماندىق باتالوۆ ءوز تاراپىنان وبلىس پوتەنتسيالى جوعارى ەكەنىن اتاپ ءوتتى. ونىڭ ءسوزىن ورىنباسارى تىنىشباي دوسىمبەكوۆ راستاي ءتۇستى. «بيىل 447 مىڭ گەكتار جەرگە ءداندى داقىلدار سەپتىك. سودان 1 ملن 34 مىڭ توننا استىق جينايمىز دەپ جوسپارلاپ وتىرمىز. كوكونىستەرىمىز سۋارمالى جەردە وسەدى. وسى جىلى قىرىققابات, كارتوپ, پياز, قىزاناق, تاعى باسقا كوكونىستەردەن بىلتىرعىمەن سالىستىرعاندا جوعارى ءونىم كۇتۋدەمىز. جالپى الار بولساق, بيىل 660 مىڭ توننانىڭ توڭىرەگىندە ءسۇت ساۋىلادى, 315 مىڭ تونناداي ەت بولادى, 840 مىڭ توننا شاماسىندا كوكونىس جينالادى. بارلىعىن ەسەپتەگەندە 429 ملرد تەڭگەنىڭ ءونىمىن ءوندىرۋدى جوسپارلاپ وتىرمىز» دەدى ول.
ءار ءوڭىردىڭ ءوزىنىڭ برەند ونىمدەرى بولادى. ماسەلەن, ەلىمىزدىڭ شىعىسى – بالىمەن, باتىسى – بالىعىمەن, ءوڭتۇستىگى – جەمىس-جيدەگىمەن, سىر بويى كۇرىشىمەن ايگىلى. الماتى دەگەندە ەسكە ەڭ الدىمەن اپورت الماسى ءتۇسەدى. جارمەڭكەگە كەلگەندەر ونى دا سورەلەردەن ىزدەپ تاپتى. جەتىسۋ دەپ بەكەر اتالماعاندىقتان, ءوڭىردىڭ وزەن-كولدەرىن مەكەندەيتىن جايىن, تابان, كوكسەركە, تۇقى سەكىلدى بالىق تۇرلەرى دە ساۋداعا شىعارىلدى. استانالىقتار, اسىرەسە, كوكونىستى مولىنان الىپ جاتتى.
«جارمەڭكەگە جىلدا كەلەمىن. راسىندا دا مۇندا ازىق-تۇلىك جەرگىلىكتى بازارلارمەن سالىستىرعاندا كوپ ارزان. مىسالى, ءسابىز بەن كارتوپتىڭ كەلىسىن 39 تەڭگەدەن ساتىپ الدىم. استانانىڭ بازارلارىنا بارساڭ, 60-80 تەڭگەدەن تۇر» دەيدى ەلورداعا تورعاي وڭىرىنەن قونىس اۋدارعان كۇلپارا اپبازوۆا.
ءوزىمىز دە ماقالاعا ماتەريال جيناپ بولعان سوڭ ۇيگە كەرەكتى ازىق-تۇلىك الايىق دەپ شەشتىك. ول كەزدە ءتۇس ۋاقىتى جاقىنداپ قالعان. كەرەگىمىزدى «جەتىسۋ» الەۋمەتتىك-وندىرىستىك كووپەراتيۆى بەلگىسى تۇرعان جەردەن تاپتىق. بايقاعانىمىزداي, باسقالارعا قاراعاندا وسى ۇجىم مول ءونىم اكەلىپتى.
ۇزىن-سونار كەزەكتە ءبىراز تۇرىپ, شىداماي كەتىپ قالىپ جاتقاندار دا بولدى. الار زات جەتپەي قالىپ, قىنجىلىس بىلدىرگەندەر دە تابىلدى. ولارعا ايتارىمىز, ءبىر اپتا عانا كۇتىڭىزدەر. الداعى سەنبى كۇنى وتەتىن جامبىل جانە پاۆلودار وبلىستارىنىڭ اۋىل شارۋاشىلىعى ونىمدەرىنىڭ جارمەڭكەسىندە ەسەلەرىڭىزدى قايتاراسىزدار.
وڭىرلەردىڭ قاتىسۋىمەن وتەتىن اۋىلشارۋاشىلىق جارمەڭكەلەرىنىڭ كەستەسى
جامبىل جانە پاۆلودار وبلىستارى | 27-28 قىركۇيەك |
قاراعاندى جانە اقتوبە وبلىستارى | 4-5 قازان |
قوستاناي جانە شىعىس قازاقستان وبلىستارى | 11-12 قازان |
باتىس جانە قازاقستان اتىراۋ وبلىستارى | 18-19 قازان |
سولتۇستىك جانە قازاقستان قىزىلوردا وبلىستارى | 25-26 قازان |
اقمولا وبلىسى | 1-2 قاراشا |
امانعالي قالجانوۆ