ەلوردالىق جەكە كاسىپكەر امانگەلدى احاتوۆ بيىل كۇزدە بۇيىرتسا, الپىستىڭ اسقارىنا شىعادى. ونىڭ وسى جاسقا كەلگەنگە دەيىنگى ءومىر جولىنا ۇڭىلسەك, ءبىراز لاۋازىمدى قىزمەتتەردى اتقارعانىن كورەمىز. ءوزىنىڭ تاڭداعان ماماندىعىنا سايكەس جيىرما جىلدان استام ۋاقىت قارجى سالاسىندا ەڭبەكتەنىپ, بانك ديرەكتورى دارەجەسىنە دەيىن كوتەرىلدى. امانگەلدى اعامىزدىڭ ەسىمى قازاقستان رەسپۋبليكاسى پارلامەنتى سەناتىنىڭ تاريحىنا ويىپ تۇرىپ جازىلدى. سەناتتىڭ ءبىرىنشى شاقىرىلىم دەپۋتاتى بولعانىن مەڭزەپ وتىرمىز. الايدا, قانداي بيىكتە جۇرسە دە, قاراپايىم قالپىنان اينىعان ەمەس. ادامداردى قىزمەتىنە, الەۋمەتتىك جاعدايىنا قاراپ بولمەيدى. بارلىعىنا جۇرەگى اشىق, پەيىلى كەڭ. مۇنى رەداكتسيا تاپسىرماسىمەن حابارلاسقانىمىزدا بايقادىق.
حابارلاسۋىمىزدىڭ ءمان-جايىن تۇسىندىرە كەتەيىك. امانگەلدى احاتوۆتىڭ بەرەكەلى شاڭىراعى بيىلعى «مەرەيلى وتباسى» بايقاۋىنا قاتىسۋشىلاردىڭ قاتارىنا كىردى. وزدەرىن كورسەتۋدى ماقسات ەتپەگەن ەدى. امانگەلدى اعانىڭ جيەن نەمەرەسى مۇسانىڭ مەكتەپتەگى مۇعالىمى وتباسى مۇشەلەرىنىڭ ءبىرىنىڭ-بىرىنە دەگەن جىلى قارىم-قاتىناسىن, اتاسىنىڭ جيەنىنىڭ تاربيەسىنە دەگەن ءجىتى نازارىن كورىپ, قولقا سالدى.
«سەگىز ۇلىم ءبىر توبە, ەرتوستىگىم ءبىر توبە» دەمەكشى, امانگەلدى قاپەنۇلى ءۇشىن شىنىمەن دە مۇسانىڭ ءجونى بولەك. ەل اعاسى «جيەن ەل بولماس, جەلكە اس بولماس» دەيتىندەردىڭ قاتارىنان ەمەس. مۇسا حالقىمىزدىڭ ەجەلدەن باستاۋ العان داستۇرىنە سايكەس اتاسى مەن اجەسىنىڭ قولىندا تۇرىپ جاتىر. ءوزى سپورتپەن, سونىڭ ىشىندە فۋتبولمەن شىنداپ اينالىسادى. رەسپۋبليكا كولەمىندە وتەتىن سپورتتىق جارىستارعا ۇزبەي قاتىسادى. وسى ىستە قولداۋشىسى دا, قورعاۋشىسى دا اتاسى. ءتىپتى, امانگەلدى اعا باسقا قالالاردا وتەتىن كەيبىر جارىستارعا مۇسامەن بىرگە بارىپ جۇرەدى. جيەنىنىڭ تاربيەسىنە قاتىستى ون ءۇش تارماقتان تۇراتىن تۇتاس باعدارلامانى دا جاساپ شىعارعانى بار. سوڭعى تارماعىندا استانانىڭ تۇرعىندارى باس قالا مارتەبەسىنە ساي بيىك مادەنيەت يەسى بولۋى كەرەك دەيدى. مۇسانىڭ قۇلاعىنا دا ۇنەمى وسىنى قۇيىپ وتىرادى.
امانگەلدى اعانىڭ ءوزى دە جاسىندا سپورتقا بەيىم بولدى. الايدا, بىرقاتار جارىستاردا توپ جارسا دا, ول جونىندە شەشىلىپ ايتا قويمادى. «جاس كەزدە ادامنىڭ باسىنان نە وتپەيدى؟ سپورتقا قازىر دە بەيجاي قارامايتىنىمدى عانا ايتايىن» دەيدى ول بۇل تۋرالى.
از-كەم مۇسانىڭ اناسى گۇلزادا ءجونىندە دە حابار بەرەيىك. ول مەكتەپتە وقىعان جىلدارى بيمەن كاسىبي تۇردە اينالىستى. حالىقارالىق بايقاۋدىڭ جۇلدەگەرى دە اتانعان. امانگەلدى اعا مەن شاكيرا جەڭگەيدە گۇلزادادان باسقا اباي, ءاليا, جانار ەسىمدى بالالارى بار. كەيىپكەرلەرىمىز ولاردان دا نەمەرە-جيەندەردى ءسۇيىپ وتىر.
امانگەلدى اعانىڭ وزىنە ورالساق, ول ەكونوميكا تاقىرىبىنا بىرنەشە كىتاپ جانە سوزدىكتەردى جازىپ شىعارعان. جالپى, قالامگەرلەرگە دەگەن قۇرمەتى ەرەكشە. ولاردىڭ اراسىندا دوستارى دا كەزدەسەدى. ماسەلەن, «مەن ءوز باسىم امانگەلدى قاپەنۇلىنىڭ وتباسىن تاۋەلسىز ەلىمىزدەگى ماقتاۋعا لايىق وتباسىلاردىڭ ءبىرى دەر ەدىم» دەدى جۋرناليست سايلاۋ بايبوسىن ودان امانگەلدى اعا جونىندە سۇراعانىمىزدا.
ال, احاتوۆتار وتباسىنىڭ بارلىق مۇشەلەرى تۋرالى ءسوز ساباقتاساق, ولار دەمالىس كۇندەرى بارلىعى ءبىر كىسىدەي كەڭ داستارقان باسىنا جينالۋدى, تابيعات اياسىنا شىعۋدى داستۇرگە اينالدىرعان. وتباسىنىڭ ءبىر مۇشەسى كينوعا نەمەسە تسيرككە, الدە بەلگىلى ءبىر كونتسەرتكە بارۋدى جوسپارلاسا, مىندەتتى تۇردە وزگەلەرىنە حابارلاپ, رەتى كەلسە ەرتىپ اكەتەدى. ءبىر سوزبەن ايتقاندا, بەرەكەسى مەن بىرلىگى ۇيىپ وتىرعان شاڭىراق.
امانعالي قالجانوۆ
