باس قالاداعى جول-قۇرىلىس جۇمىستارىنىڭ بارىسى تۋرالى استانا قالاسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باستىعى راشيد امانجولوۆ پىكىر ءبىلدىردى.
– راشيد ءماجيتۇلى, بيىل باس قالادا قانشا شاقىرىم جول سالىندى جانە قايتا جاڭارتىلدى؟
– مۋنيتسيپالدى جوبالاردى, سونىڭ ىشىندە جول قۇرىلىسى سالاسىنداعى جوبالاردى جۇزەگە اسىرۋ بارىسىندا ءبىزدىڭ مۇمكىندىكتەرىمىز شەكتەۋلى ەكەنى بەلگىلى. دەگەنمەن, استانا قالاسىندا كوشە-جول جەلىسى مەن جول ينفراقۇرىلىمىنىڭ وبەكتىلەرىن سالۋ, قايتا جاڭارتۋ جانە جوندەۋدى ۇيىمداستىرۋ بويىنشا ءبىرشاما جۇمىستار اتقارىلۋدا. تومەندەگى ساندار سوزىمىزگە ناقتى ايعاق بولا الادى. ماسەلەن, 2010-2011جىلدارى استانا قالاسىندا 190,7 شاقىرىم جول سالىندى, ونىڭ 24 شاقىرىمى قايتا جاڭارتىلدى.
– مۇنداي جۇمىستار قالانىڭ باستى كوشەلەرى مەن ورتالىقتارىندا عانا ەمەس, سونىمەن بىرگە شەت ايماقتاردى دا قامتىعان بولار؟
– ارينە, جوندەۋ جۇمىستارى قالاعا قوسىلىپ كەتكەن تۇرعىن الاپتاردى دامىتۋ تۇجىرىمداماسىنىڭ شەڭبەرىندە دە جۇرگىزىلىپ جاتىر. اتاپ ايتار بولساق, ەلوردادان شەتكەرىرەك ورنالاسقان ينتەرناتسيونالنىي كەنتىندە, قازاقاۋىل , كوكتال تۇرعىن الاپتارى مەن تىلەنديەۆ داڭعىلىنىڭ سولتۇستىگىندە بۇرىن مۇلدە تاس جول بولماعان. ۇستىمىزدەگى جىلى وسى الاپتاردا 2011 جىلى باستالعان جول-قۇرىلىس جۇمىستارىن اياقتاماقشىمىز. وسىلايشا مۇندا 36,45 شاقىرىم جول سالۋدى جانە 37,6 شاقىرىم جولدى قايتا جوندەۋدەن وتكىزىپ, 5 شاقىرىم جولدى جوندەۋدى جوسپارلاپ وتىرمىز. سونداي-اق, بۇرىن جولدارى ايقىش-ۇيقىش بولعان ءوندىرىس تۇرعىن الابىندا, وڭتۇستىك-شىعىس شاعىن اۋدانىنىڭ وڭ جاعالاۋىندا, كوكتال تۇرعىن الابى مەن تىلەنديەۆ داڭعىلىنىڭ سولتۇستىگىندە 39,5 شاقىرىم جول سالىناتىن بولادى.
– دەگەنمەن, استانادا ءالى دە بولسا كۇردەلى جوندەۋدى قاجەت ەتىپ وتىرعان كوشەلەر از ەمەس قوي. ماسەلەنىڭ بۇل جاعى قالاي شەشىلەدى؟
– راس ايتاسىز, باس قالادا مۇنداي كوشەلەر ءالى دە بولسا بار. ءبىز ولاردى جوسپارلى تۇردە, بىرتىندەپ كۇردەلى جوندەۋدەن وتكىزىپ كەلەمىز.
بۇگىنگى تاڭدا جولاۋشىلار كولىگى جانە اۆتوموبيل جولدارى باسقارماسى سارىارقا, كەنەسارى, كۇمىسبەكوۆ كوشەلەرى مەن بوگەنباي باتىر داڭعىلىنىڭ كۆارتالىشىلىك جولدارىنىڭ قۇرىلىسى مەن جوندەۋ جۇمىستارىنىڭ جوباسىن جەتىلدىرۋ ۇستىندە. قالالىق بيۋدجەتتەن قاراجات بولىنگەن جاعدايدا 2013 جىلى وسى جوبانى جۇزەگە اسىرامىز. ال, بيىل اباي كوشەسىنەن جانگەلدين كوشەسىنە دەيىنگى جانە سارىارقا داڭعىلىنان كۇمىسبەكوۆ كوشەسىنە دەيىنگى ارالىقتىڭ جولىن قايتا جوندەۋ كوزدەلىپ وتىر.
گۇلبارشىن وكەشقىزى
