مەملەكەت ساياساتىن, قر پرەزيدەنتىنىڭ 2050 جىلعا دەيىنگى ۇزاق مەرزىمدى ستراتەگياسىن ءتۇسىندىرۋ. ازاماتتارعا قۇقىقتىق جانە كونسۋلتاتيۆتىك كومەك كورسەتۋ. قۇقىق قورعاۋ ورگاندارى بەدەلىن, حالىقتىڭ جول پوليتسياسى قىزمەتكەرلەرىنە دەگەن سەنىمىن ارتتىرۋ. وسىنداي ماقساتپەن كەشە استانا قالاسى جول پوليتسياسى باسقارماسى «جولدا قابىلداۋ» اكتسياسىن وتكىزدى.
جول ساقشىلارىمەن بىرگە «نۇر وتان» حدپ وكىلدەرى قاتىسقان شارا باسقارما عيماراتىنان باستاۋ الدى. وسى جەردە اكتسياعا قاتىسۋشىلاردىڭ ءبىر توبى قالىپ, وزگەلەر حالىقتىڭ كوپ جينالاتىن ورىندارىنا شىقتى. سونداي ورىنداردىڭ ءبىرى «گرين» گيپەرماركەتى بولدى.
ساۋدا نۇكتەسىنىڭ جانىندا, جالعا الىنعان ارنايى اۆتوبۋستا جولداعى تارتىپكە نەمقۇرايلى قارامايتىن ادامداردى قابىلداپ, قالا تۇرعىندارىن مازالاپ جۇرگەن سۇراقتارعا جاۋاپتار بەرىلدى. ودان بولەك جول قاۋىپسىزدىگىن قامتاماسىز ەتۋ بويىنشا ناسيحات ماتەريالدارى تاراتىلىپ, ازاماتتاردىڭ اراسىندا پوليتسيا قىزمەتى مەن حالىقتىڭ پوليتسياعا سەنىمى جونىندە ساۋالناما جۇرگىزىلدى.
سونداي-اق, ءدال وسىنداي شارالار استانا – قاراعاندى تاس جولى بويىنداعى «قىزىلجار» بەكەتىندە, «رامستور» ساۋدا ءۇيى, ورتالىق بازار, ۆوكزال ماڭىنداعى الاڭ, سول جاعالاۋداعى ءىرى ساۋدا ۇيلەرى قاسىندا دا ۇيىمداستىرىلدى.
جول اپاتتارىن الدىن الۋ ماقساتىندا قالانىڭ ورتالىق كوشەلەرىمەن جول-كولىك وقيعالارىنا ۇشىراعان كولىكتەردىڭ اۆتوكەرۋەنى وتكىزىلدى.
ا.شميتۇلى
