شىنى كەرەك, بۇل كۇندەرى گەنانىڭ جەڭىسىنە تاڭدانبايتىنداي كۇيگە جەتتىك. قارسىلاسىن مەرزىمىنەن بۇرىن سۇلاتاتىنىنا بويىمىز ابدەن ۇيرەنىپ العان. اۋەلگىدەي ەمەس, «ءارى كەتسە, 3-4 راۋندقا سوزىلار, وعان بولا ۇيقىمدى قيمايمىن» دەپ سەنىم بىلدىرۋشىلەردىڭ دە سانى ارتۋدا. وسىنداي جاعدايعا قازاقستاندىق بوكسشىنىڭ سوڭعى جەكپە-جەگىندە تاعى كۋا بولدىق.
ماركو انتونيو رۋبيو. مەكسيكالىق شەبەر. بىراق, ونىڭ دارمەنى گەنانىڭ پارمەنىنە توزە المادى. ەكى-اق راۋندقا شىداعان ول ەسەڭگىرەگەن كۇيدە اۋزىنا كەلگەنىن ايتىپ ۇلگەرىپتى.
«گەننادي – ناعىز كاسىپقوي, مىقتى بوكسشى. ءوز باسىم جەكپە-جەكتى اياعىنا دەيىن سوزاتىنداي حالدە ەدىم. الايدا باس تورەشىنىڭ شەشىمى باسقاشا بولدى دا, مەنىڭ ءوز مۇمكىندىگىمدى كورسەتۋىمە كەنەتتەن توسقاۋىل قويىلدى» دەگەن ماركو رۋبيو جەڭىلگەن سەبەبىن تورەشىلەرگە اۋدارا سالدى. دەگەنمەن «جىعىلعان كۇرەسكە تويمايدى» دەپ قادىم زاماندا ايتقان قازاق ءۇشىن ونىڭ سوزدەرى كوك تيىنعا پارا-پار ەكەنى داۋسىز.
اقش-تىڭ كارسون قالاسىنداعى «StubHub Center» ارەناسىندا وتكەن سوڭعى جۇدىرىقتاسۋىندا گەننادي گولوۆكين قارسىلاسىنان WBC چەمپيوندىق بەلدىگىن تارتىپ العان بولاتىن. بۇدان بولەك, ءبىزدىڭ بوكسشىنىڭ ەنشىسىندە WBA, IBO دارەجەلەرىنىڭ چەمپيونى دەگەن اتاق بار.
ون مىڭعا جۋىق جانكۇيەردىڭ الدىندا وتكەن كەزدەسۋ گەنا ءۇشىن كاسىپقوي بوكستاعى 31-ءىنشى جەكپە-جەك جانە 31-ءىنشى جەڭىس بولاتىن. ونىڭ 28-ءىن نوكاۋتپەن اياقتاعان ەدى. بۇدان كەيىن گەننادي جەڭىستەرىنىڭ 90 پايىزىن مەزگىلىنەن بۇرىن اياقتاپ, ءدال قازىرگى ۋاقىتتاعى كاسىپقوي بوكستىڭ باسقا چەمپيوندارىنان وق بويى الدا كەلەدى.
نۇريسلام قۇسپانعالي
