ۇبت تاپسىرىپ, جوعارى بالمەن گرانتقا جەتپەگەندەردىڭ تالاپ-تىلەكتەرى بيىل ەسكەرىلدى دەسە دە بولادى. سەبەبى جاڭا زاڭعا سايكەس, «التىن بەلگى» يەگەرلەرى, ءتۇرلى بايقاۋلار مەن عىلىمي جوبالاردىڭ جەڭىمپازدارىنا مەملەكەتتىك گرانتتى تاعايىنداۋدا ەشقانداي باسىمدىلىق بەرىلمەيدى.
ءبىلىم جانە عىلىم مينيسترلىگى جاڭا زاڭناماسىندا تالاپ بارىنە ورتاق دەپ شەشتى. مينيستر ەرلان ساعاديەۆ بۇل جايتقا قاتىستى «ەندى مەملەكەتتىك گرانتتاردى تەك ۇبت ناتيجەلەرىنە قاراپ بەرەمىز. الەمنىڭ كوپتەگەن ەلدەرىندەگى سياقتى ءبىز دە دارىندى جاستاردى ۋنيۆەرسيتەتتىڭ ءوزى ىزدەيتىندەي جۇيەگە كوشەمىز. ول ءۇشىن ۋنيۆەرسيتەت باسشىلىعىنا باسقارۋدا قارجىلىق, اكادەميالىق ەركىندىك بەرىلدى» دەگەن از-ماز تۇسىنىكتەمە بەردى.
ءمينيستردىڭ ايتۋىنشا, ستۋدەنتتەر ءتۇرلى دەڭگەيدە وتەتىن بايقاۋلاردا ءوز وقۋ ورىندارىنىڭ بەدەلىن ارتتىرۋعا ۇلەس قوسۋى ءتيىس. ال سپورتشى ستۋدەنتكە جەڭىلدىك بەرۋ-بەرمەۋ تۋرالى شەشىمدى رەكتور قابىلدايدى. بىلىمىمەن, دارىنىمەن كوزگە تۇسكەن تۇلەكتەر باسقالارمەن بىردەي بالل جيناعان كەزدە عانا باسىمدىلىققا يە بولادى. سونداي-اق, مينيستر مەكتەپتەردە دەنە شىنىقتىرۋ ساباقتارىنان بولەك جارىستارعا دايىندالۋعا سپورت ساعاتتارى 1-2 ساعاتقا كوبەيتىلگەنىن ايتتى.
بۇل ماسەلەگە بىرجاقتى قاراۋعا بولمايدى. كۇنى كەشە عانا الماتىدا جۇزدەگەن سپورتشى تۇلەكتەر مەن ولاردىڭ اكە-شەشەلەرى وقۋعا تەگىن تۇسە الماعاندارىن ايتىپ, نارازىلىق ءبىلدىردى. ەلىمىزدىڭ چەمپيوندارى مەن حالىقارالىق دودا جەڭىمپازدارىنىڭ كوپشىلىگى پاندىك ەمتيحاننان از بالل جيناعان. ونىڭ ەسەسىنە مەكتەپ قابىرعاسىندا سپورتپەن اينالىسپاعان وقۋشىلار ۇپايمەن وزىپ, گرانتقا ىلىككەن دەلىنگەن كتك جاڭالىقتار قىزمەتىندە.
مينيسترلىك ەلىمىزدە داڭقتى سپورتشى اتانۋ ءۇشىن سپورتقا بەرىلىپ, ىنتا-شىنتامەن دايىندالۋ كەرەكتىگىن ەسكەرمەگەن سىڭايلى. بالاسى بەس دۇركىن چەمپيون اتانعان قاناعات ءابدىراسىلۇلى ەسىمدى اتا-انا ءدال وسىلاي دەيدى. «بالام قر سپورت شەبەرىنىڭ كانديداتى, حالىقارالىق ءتۋرنيردى جەڭىپ العان. سپورت دەپ جۇگىرىپ, جيىنعا كەتەدى. وندا ءبىر اي جاتادى, جارىس كۇندەرى 15-20 كۇن ساباقتان قالادى» دەيدى كوپ بالالى اكە. ەندى قيىن بولسا دا, اقىلى بولىمگە وقىتۋعا بەل بۋىپ وتىر.
جاڭا ەرەجە بويىنشا, ۇبت تاپسىرىپ, كونكۋرسقا قاتىسقان تۇلەكتەردىڭ ۇپايى بىردەي بولعان جاعدايدا, ءبىلىم بەرۋ گرانتتارى اتتەستاتتىڭ, كۋالىكتىڭ نەمەسە ديپلومنىڭ ورتاشا بالى جوعارى ادامدارعا بەرىلەدى. ەگەر ول دا بىردەي بولعان جاعدايدا بەيىندىك پاندەر نەمەسە شىعارماشىلىق ەمتيحاندار بويىنشا العان بالدارى ەسكەرىلەدى.
