جۇمىس ىزدەسەڭ جارمەڭكەگە كەل!
ەرتەڭ ەلوردانىڭ «جاستار» سارايىندا ساعات 10.00-13.00 ارالىعىندا بوس جۇمىس ورىندارىن ۇسىناتىن جارمەڭكە وتەدى.
جاستاردى جۇمىسپەن قامتۋ – مەملەكەتتىك ساياساتتىڭ باسىم باعىتتارىنىڭ ءبىرى. قالا اكىمدىگىنە قاراستى «استانا جاستارى» ۇيىمى قولعا العان شارا بارىسىندا جوعارعى وقۋ ورنىن بىتىرگەن تۇلەكتەرگە ساۋدا جانە ەكونوميكا سالاسىنداعى جۇمىس ورىندارى ۇسىنىلادى.
جۇمىسسىزدىق دەڭگەيىن ازايتۋعا جانە ماماندارعا كاسىبي باعدار بەرۋگە باعىتتالعان ءجارمەڭكەگە 40-تان اسا جۇمىس بەرۋشى كومپانيا قاتىسادى. ولاردىڭ قاتارىندا «Trending Retail Group», «12 مەسياتسەۆ-استانا», «كار-تەل» تم Beeline, «Vita Clean» جانە تاعى باسقا كاسىپورىندار بار. جۇمىس بەرۋشى ءاربىر كومپانيا كەمىندە 3 ادامعا جۇمىس تاۋىپ بەرۋگە نيەت ءبىلدىرىپ وتىر.
– جارمەڭكەگە 40-تان استام جۇمىس بەرۋشى قاتىسادى. بۇل شارا جوعارى ءبىلىمى بار تۇلەكتەرگە قىزمەت سالاسىن زەرتتەۋگە جانە لايىقتى جۇمىس تابۋعا مۇمكىندىك بەرەدى. ءاربىر ازامات بۇگىندە قانداي جۇمىس ورىندارى بار, قالاعا قانداي ماماندار قاجەت, جۇمىسقا تەز ورنالاسۋ ءۇشىن نە ىستەۋ كەرەك سەكىلدى ساۋالدارعا كاسىبي مامانداردان جاۋاپ الا الادى. بۇدان بولەك تەگىن قۇقىقتىق كومەك كورسەتۋ, اۋلا كلۋبتارىن دامىتۋ, ەرىكتىلەر قوزعالىسىن جانداندىرۋ, جۇمىسقا تۇرعىزۋعا جاردەمدەسۋ جانە كاسىبي باعىت-باعدار بەرۋدى جۇزەگە اسىرىپ كەلەمىز, – دەيدى مەكەمەنىڭ جۇمىسپەن قامتۋ جانە كاسىبي باعدار بەرۋ ءبولىمىنىڭ باسشىسى ايدانا مۇساتاەۆا.