جۇمىسشىلاردىڭ جاعدايى – باستى نازاردا
«ينفراقۇرىلىمدى دامىتۋدىڭ 2015-2019 جىلدارعا ارنالعان «نۇرلى جول» مەملەكەتتىك باعدارلاماسىن جۇزەگە اسىرۋ ماقساتىندا قر ۇلتتىق قورىنان بولىنگەن قاراجات قايدا جۇمسالۋدا؟ ۇكىمەت اقشاسىن ماقساتتى پايدالانۋ ماسەلەسىن قوزعاعان استانا قالاسى ءماسليحاتىنىڭ دەپۋتاتتارى مەن «نۇر وتان» پارتياسىنىڭ مۇشەلەرى رەيدكە شىعىپ, مەملەكەتتىك نەسيە العان كاسىپورىنداردى ارالادى.
كوميسسيا وكىلدەرى اۋەلى «نۇر-سابا» جشس-نە تابان تىرەدى. 2008 جىلدان بەرى اعاش جانە مەتالل بۇيىمدارى وندىرىسىمەن اينالىساتىن كومپانيا ءۇش جىل بۇرىن كەرەكتى قۇرىلعىلاردى ساتىپ الىپ, كاسىپورىن عيماراتىن جوندەۋدەن وتكىزۋ ءۇشىن 24 ميلليون تەڭگە كولەمىندە نەسيە العان.
اتالمىش كومپانيا ديرەكتورى قايرات يسيمبەكوۆتىڭ ايتۋىنشا, بيزنەستى قولداۋ مەن دامىتۋعا باعىتتالعان «بيزنەستىڭ جول كارتاسى – 2020» باعدارلاماسىنىڭ ارقاسىندا ءوندىرىس كولەمى 30 پايىزعا ارتقان. ويتكەنى نەسيە العانعا دەيىن مۇندا 6 ادام عانا جۇمىس ىستەسە, بۇگىندە جۇمىسشىلار سانى ەكى ەسە كوبەيىپتى. قازىرگى كۇنى اۋدانى 906 شارشى مەتردى قۇرايتىن تسەح اۋماعى تۇگەلدەي يگەرىلىپ جاتىر.
– نەسيە جۇمىس ونىمدىلىگىن ارتتىرۋ ءۇشىن عانا بەرىلمەيدى. قىزمەتكەرلەردىڭ ەڭبەك جاعدايىن دا جاقسارتۋ كەرەك. وكىنىشكە قاراي, بۇل جەرگە قاۋىپسىزدىك تەحنيكاسىن جانە تۇرمىس جاعدايىن ءالى دە جەتىلدىرۋ كەرەك, – دەدى استانا قالاسى ءماسليحاتىنىڭ دەپۋتاتى امان ايۋپوۆ.
اتاپ ايتقاندا, عيماراتتىڭ ءۇشىنشى قاباتىندا جاتاقحانا بوي كوتەرگەن. ول جەردە باسقا قالادان كەلگەن جۇمىسشىلار تۇرادى. ايلىق جۇمىسشىنىڭ وندىرگەن ەڭبەك كولەمىنە بايلانىستى تولەنەدى. جالاقى ورتاشا ەسەپپەن 150 مىڭ تەڭگەگە جەتەدى ەكەن.
دەپۋتاتتار باس سۇققان كەلەسى نىسان – «پروەكت مونتاج» جشس. كاسىپورىن ۆەنتيلياتسيالىق جۇيەگە ارنالعان جەلدەتكىش اۋا وتكىزگىشتەرى وندىرىسىمەن اينالىسادى.
مەملەكەتتەن 129 ملن 800 مىڭ تەڭگەگە نەسيە العان بۇل ءوندىرىس ورنى اۆتوماتتاندىرىلعان جۇيەلەر مەن تاسىمال قۇرالدارىن ساتىپ الدى. «جاڭا قۇرال-جابدىقتار جۇمىس ونىمدىلىگىن ون ەسەگە ۇلعايتتى» دەيدى كاسىپورىن جەتەكشىسى ۇلان ارىنبەكوۆ. ەڭبەك نارىعىندا 10 جىل جۇمىس ىستەپ كەلە جاتقان ولار كوپتەگەن قۇرىلىس كومپانيالارمەن تىعىز بايلانىس ورناتقان. كاسىپورىننىڭ نەگىزگى تۇتىنۋشىلارى – استانا قۇرىلىسى.
فيرما ديرەكتورىنىڭ ايتۋىنشا, ەڭبەكاقى كولەمى دە وسكەن. ورتاشا العاندا ايلىق 160 مىڭ تەڭگەنى قۇرايدى. ال, تسەحتا قىزمەت ەتەتىن بىلىكتى ماماندار ايىنا 300 مىڭ تەڭگەگە دەيىن تابىس تابادى.
– بۇگىن شاعىن جانە ورتا بيزنەستى دامىتۋ باعدارلاماسى اياسىندا «دامۋ» قورىنان نەسيە العان ەكى نىساندا بولدىق. قاراجاتتىڭ قانشالىقتى ءتيىمدى جۇمسالىپ جاتقانىن ءوز كوزىمىزبەن كوردىك. كاسىپورىندار بەلگىلى ءبىر جەتىستىكتەرگە قول جەتكىزگەنىن بايقاۋعا بولادى. باستىسى, قىزمەتكەرلەردىڭ الەۋمەتتىك جاعدايىن ءجىتى باقىلاپ, نازاردا ۇستاۋ قاجەت, – دەپ ەسكەرتتى كوميسسيا توراعاسى, قالالىق ءماسليحاتتىڭ دەپۋتاتى سايات باتپەنوۆ.
رەيد قورىتىندىسى بويىنشا كوميسسيا مۇشەلەرى انىقتالعان ماسەلەلەردى شەشۋ ءۇشىن ءوز ۇسىنىستارىن جاسادى.
ايتا كەتەيىك, مۇنداي رەيد اي سايىن وتكىزىلىپ تۇرادى.
گۇلدانا تالعاتقىزى