جۇپارىمەن جەر-جاھاندى جاۋلاعان
جۇپارىمەن جاھاندى جاۋلاعان گۇلدەر. سەندەرسىز ەشبىر مەرەكەنى ەلەستەتۋ مۇمكىن ەمەس. ەرىنە تومسىرايعان تالاي ايەلدىڭ اشۋىن تارقاتتىڭدار, جىگىتىنە بۇرتيعان ارۋ كوڭىلىندەگى كىربىڭنىڭ كىلتىن تاپتىڭدار. گۇلدەردىڭ تىلسىم قۇدىرەتى دەگەن وسى بولار؟.. كەيدە ارۋلاردىڭ سىيلاعان گۇل شوعىنىڭ وزىنەن ءمىن تاۋىپ, ارتىنان سىناپ تۇراتىنى راس (بەتكە ۇشقاندارى قانشاما). ويتكەنى, ينتەرنەت جەلىسىنەن نەشە ءتۇرلىنى وقىپ الامىز. ماسەلەن, گۇلدەردىڭ تۇستەرىنە بايلانىستى نەبىر پىكىرلەر بار… مۇلدەم گۇل سىيلاماسا قايتەر ەدىك؟! سوندىقتان, قۇربىلارىمىزعا ءارى ساباق, ءارى پايدالى كەڭەس بولسىن دەگەن نيەتپەن
«گۇلدەر ۇيىنە» ارنايى بارىپ, گۇلزار ماماندارىنان كەڭەس الدىق.
قالامىز ستۋدەنتتەر ايماعىنا اينالعاندىقتان, كوپشىلىك «ۆسترەچا» دەپ اتاپ كەتكەن اۋداندا ءجۇرمىز. مۇندا گۇلدەر ءۇيى بار.
كوركەم بەزەندىرىلگەن دەكوراتيۆتى كورىنىسىمەن كوز اربايتىن عيماراتقا باس سۇقپاي ءوتۋ مۇمكىن ەمەس. ءبىزدى ءبىرىنشى قاباتتا كۇلىمسىرەي قارسى العان بۇلبۇل ەسىمدى گۇل مامانى بىردەن راۋشانداردىڭ قۇپياسىمەن تانىستىرا كەتۋدى ءجون كوردى. سەبەبى, مەرەكەنىڭ باستى نىشانى – راۋشان. الدىمەن القىزىل راۋشانداردىڭ تاريحىمەن تانىستىردى.
ءبىزدىڭ داۋىرىمىزگە دەيىنگى ءىىى مىڭجىلدىقتا ەجەلگى قىتايدا, يانتسزى جانە حۋانحە ارالدارىنان تابىلعان راۋشانداردىڭ نەگىزگى وتانى – ەجەلگى ءۇندىستان مەن ورتا ازيا. «گۇل حانشايىمى» اتالىپ كەتكەن راۋشانداردىڭ مەكەنى – ەجەلگى پارسى ەلى دەگەن دە دەرەكتەر بار. نەگىزىنەن, «روزا» اتاۋىنىڭ شىعۋ توركىنى پارسىنىڭ «wrodon» سوزىنەن باستاۋ الىپ, ەجەلگى گرەك تىلىندە «rbodon» دەپ وزگەرىسكە ءتۇسىپ, لاتىن ءتىلىندە «rosa» سوزىنە اينالعان. پارسى حالقى روزانى – «اللانىڭ گۇلى جانە ونىڭ قۇدىرەتتى سىيى» دەپ قادىرلەسە, حريستياندىقتار «جۇماق گۇلى» دەپ اسپەتتەيدى. وسى دەرەكتەردىڭ بارلىعى گۇلدىڭ وتانى ەۋروپا ەمەس, ورتا ازيا ەكەنىن تولىقتاي راستايدى.
راۋشاندار مۇندا 20є گرادۋس تەمپەراتۋراداعى توڭازىتقىشتا ساقتالادى.
گۇلدەردىڭ اتاۋى, شىعۋ تاريحى, تابيعاتى, ءتىپتى مىنەز-قۇلقىنا دەيىن بولەك بولادى دەيدى مامانىمىز.
ناعىز ماحاببات سيمۆولىنا اينالعان قىزىل راۋشانداردىڭ ءوزى ىشتەي ءۇش توپقا جىكتەلەتىنىن ايتتى. ياعني, قويۋ قىزىل راۋشاندار – «فورەۆا يانگ», اقشىل قىزىل – «فريدوم», قاۋىزى قىزىل رەڭكتەنىپ تۇراتىنداردى «افريكا» دەپ اتايدى. كىرشىكسىز ادال دوستىقتىڭ بەلگىسىندەي سانامىزدا ساقتالعان اپپاق راۋشانداردى «مونديال», «ۆەندەللا» دەپ توپتاستىرادى ماماندار. وتباسىلىق ماحابباتتىڭ, ءنازىكتىكتىڭ بەلگىسىن تانىتاتىن كۇلگىن راۋشاندار – «بلاج», «سۆيتنەس», «ەنگەيدجمەنت», «پينكفلويد», «توپاز» دەپ اتالادى. بەيتانىس ادامدارعا ءىسكەرلىك ماقساتتا جۇمىس بابىمەن سىيلاناتىنى – قىزعىلت سارى راۋشاندار. ولاردىڭ «star2000» دەگەن ءتۇرى ەلىمىزگە گوللانديادان جۇماسىنا ءبىر رەت تاپسىرىسپەن جەتكىزىلەدى. ءساتتىلىك گۇلى سانالاتىن سارى راۋشاندار
دا – «حاممەر», «حوتمەرەنگۋەي», «حاي ورانج مەدجيك» دەپ بولىنەدى.
بويالماعان جانە بويالعان راۋشانداردى اجىراتۋ ءۇشىن ولاردىڭ تۇرلەرىن جاقسى ءبىلۋ ابزال. دۇنيە جۇزىلىك ستاندارتقا سايكەس تەك كوك راۋشاندار عانا بويالادى, ال, قالعان گۇلدەردى بوياۋعا قاتاڭ تىيىم سالىنعان. قازاقستاندا ەشبىر گۇلدى بوياپ ساتۋعا رۇقسات ەتىلمەيدى. الايدا, ەلىمىزدىڭ گۇل دۇڭگىرشىكتەرىندە ءارتۇرلى تۇستەرگە بويالعان, ءتىپتى «جىلتىراتقىش» سەبىلگەن «مۋلتيكولور» گۇلدەردى ءجيى بايقايمىز. |
ەكىنشى قاباتتا كىشىگىرىم جىلىجايلارى بار. ءۇي گۇلدەرىن ءوسىرىپ باپتايتىن مامانداردىڭ ايتۋىنشا, مەرەكە كۇندەرى «گيبۋسكۋس», «چاينايا روزا», «ازاليا» (الپيسكايا روزا) سىندى ىدىستاعى راۋشاندار جوعارى سۇرانىسقا يە. ەگەر, ولاردى جىلى ءۇي تەمپەراتۋراسىندا, كۇنىنە ءبىر رەت سۋارىپ باپتاسا, جىلدىڭ جەتى ايى گۇلدەپ, بەس جىلعا دەيىن وسەدى.
مەرەكە قارساڭىندا 80%-عا قىمباتتايتىن گۇلدەردىڭ اتالمىش دۇكەندەگى باعاسى كوڭىلگە قونىمدى. ياعني, ءار گۇلدىڭ باعاسى ونىڭ ۇزىندىعىنا بايلانىستى. ەڭ ارزانى – 60 سم راۋشاندار 600 تەڭگەدەن باستالىپ, ءبىر جارىم مەترلىك, كىسى بويىمەن شامالاس, قىزداردىڭ ارمانىنا اينالعان ۇزىن راۋشاندار 1500 تەڭگە تۇرادى ەكەن. ال, ەگەر گۇلدەر ءۇيىنىڭ تۇراقتى تۇتىنۋشىسى بولساڭىز جانە وسى ۋاقىتقا دەيىن 20 000 مىڭ تەڭگە مولشەرىندە ساۋدا جاساپ ۇلگەرسەڭىز, سىزگە مىندەتتى تۇردە جەڭىلدىكتەر جاسالادى.
P.S: گۇلزار مامانىنىڭ تاعى ءبىر تاماشا كەڭەسى – قالىڭدىققا ارنالعان گۇل تۇرلەرى تۋرالى بولدى. ونىڭ ايتۋىنشا, ءاربىر بولاشاق قالىڭدىق گۇلگە تاپسىرىس بەرىپ اۋرەگە تۇسپەي-اق, «ستەفانوتيس», «اماريليس», «ورحيدەيا» گۇلدەرىن توي مەرزىمىنەن 5-6 اي بۇرىن ۇيدە ءوسىرىپ, كوزدىڭ قاراشىعىنداي كۇتە الادى. ال, ۇيدە گۇل وسىرۋگە ۋاقىتى جوق ىسكەر ايەلدەرگە, «گۋزمانيا» گۇلىن سىيلاعان ابزال. ول ەرەكشە كۇتىمدى قاجەت ەتپەيدى. ەڭ باستىسى, كوكتەم مەرەكەسىندە ارداقتى انالارىمىزعا «ايەل باقىتى» گۇلىن سىيلاۋدى ۇمىتپاعان ءجون. انالاردىڭ سۇيىكتى گۇلىن بيولوگيالىق تىلمەن «سپاتيفيللۋم» دەسە, «ەرلەر باقىتى» گۇلىن «انتۋريۋم» دەيدى.
نۇرگۇل مالتىك