قر مادەنيەت مينيسترلىگىنىڭ ءتىل كوميتەتى «مەملەكەتتىك ءتىل جانە باق» اتتى رەسپۋبليكالىق بايقاۋ وتكىزدى. جۋرناليستەر مەرەكەسىنە ورايلاستىرىلعان شارانىڭ ماقساتى – مەملەكەتتىك ءتىل ساياساتىن ناسيحاتتاپ جۇرگەن جەكەلەگەن اۆتورلاردىڭ جۇمىسىنا وڭ باعا بەرۋ.
بايقاۋ ماتەريالدارىن «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ, جازۋشى, اۋدارماشى كەڭەس يۋسۋپ, قر پارلامەنت ءماجىلىسى اپپاراتى رەداكتسيالاۋ جانە اۋدارما ءبولىمىنىڭ مەڭگەرۋشىسى ءداۋىتالى وماشۇلى, «قازاقستان» تەلەراديو كورپوراتسياسىنىڭ باسقارما ءتورايىمى نۇرجان مۇحامەدجانوۆا سىندى قالامگەرلەر سارالاپ, ءوز قورىتىندىلارىن جاسادى.
قازىلار القاسىنىڭ توراعاسى ساۋىتبەك ابدراحمانوۆ «بۇل بايقاۋدىڭ اياسى جىلدان-جىلعا كەڭەيۋدە. ءبىزدىڭ ءتىلىمىزدى تەك انا تىلىندە عانا ەمەس, ورىس باسىلىمدارىندا, ءورىستىلدى حابارلاردا ناسيحاتتاۋ جاعى جاقسارىپ كەلەدى. باق سىناۋعا ءوتىنىش بىلدىرگەن ۇمىتكەرلەر سانى دا كوپ. ولاردىڭ اراسىنان ۇزدىكتەردى انىقتاۋ وڭاي بولعان جوق. ەڭ الدىمەن ايتار ويىنا, جۋرناليستىك شەبەرلىكتەرىنە ءمان بەرىپ, كوتەرگەن ماسەلەسىنىڭ وزەكتىلىگىنە قاراۋعا تىرىستىق» دەپ اتاپ ءوتتى.
سونىمەن, «ۇزدىك ماقالا» اتالىمى بويىنشا «ەگەمەن قازاقستان» گازەتىنىڭ ءتىلشىسى ءنازيرا جارىمبەتوۆا مەن «تۇركىستان» گازەتىنىڭ ءتىلشىسى دينارا مىڭجاساروۆا, «ۇزدىك تەلەارنا باعدارلاماسى» نوميناتسياسىندا «حابار» اگەنتتىگىنىڭ ءجۋرناليسى گۇلۆيرا بيعاليەۆا, «ۇزدىك راديو باعدارلاماسى» اتالىمى بويىنشا «قازاق راديوسىنىڭ» قىزمەتكەرى نۇرجامال يانگيباەۆا, «ۇزدىك سايت ماقالاسى» اتالىمىندا www.kasym.kz سايتىنىڭ قىزمەتكەرى ايان ازاماتۇلى جۇزدەن جۇيرىك دەپ تانىلدى. قاتىسۋشىلاردىڭ بارلىعىنا ارنايى العىسحاتتار مەن قارجىلاي سىيلىقتار تاپسىرىلدى.
ەركەجان ساتىمبەك
