كەشە استانادا مەملەكەت باسشىسى نۇرسۇلتان نازارباەۆتىڭ قاتىسۋىمەن V شاقىرىلىمداعى پارلامەنتتىڭ ەكىنشى سەسسياسى ءوتتى. سەنات پەن ءماجىلىستىڭ بىرلەسكەن وتىرىسىندا ەلباسى دەپۋتاتتار الدىندا تۇرعان مىندەتتەردى ايقىنداپ, بىرقاتار تاپسىرمالار جۇكتەدى.
قر پارلامەنتىنىڭ قۇرامى بيىلعى جىلدىڭ قاڭتار ايىندا قايتا جاڭارتىلعانى بەلگىلى. بۇگىندە سەناتتا – 47, ال ماجىلىستە – 107 دەپۋتات بار. پارلامەنتتىڭ تومەنگى پالاتاسى قۇرامىنداعى حالىق قالاۋلىلارىنىڭ 83-ءى – «نۇر وتان» پارياسىنان بولسا, 8-ءى «اقجول» پارتياسىنان, ال 7-ەۋى قازاقستاننىڭ حالىقتىق كوممۋنيستىك پارتياسىنان سايلانعان. بۇدان وزگە, قازاقستان حالقى اسسامبلەياسى ۇسىنعان 9 دەپۋتات جۇمىس ىستەيدى.
پارلامەنتتىڭ وسى سەسسياسى ءوزىنىڭ جۇمىسىن جاڭا الەۋمەتتىك-ساياسي جاعدايدا باستاعالى وتىرعانىن العا تارتقان ەلباسى قازاقستان بارىنشا قارقىندى دامىپ كەلە جاتقانىن, ىشكى جالپى ءونىمنىڭ ءوسىمى 5,6 پايىزعا جەتكەنىن, مەملەكەتتىك بيۋدجەتتىڭ ءتۇسىمى 25 پايىزعا جۋىق وسكەنىن, ەلىمىزدىڭ حالىقارالىق قورى 15 پايىزعا ارتىپ, 83 ميلليارد دوللاردان اسقانىن اتاپ ايتتى.
ءسوز كەزەگىندە پرەزيدەنت نۇرسۇلتان نازارباەۆ ءۇشپارتيالى پارلامەنتتىڭ جۇمىسىن جاقسى باعالاپ, ونىڭ جۇمىسى كەزىندە 36 زاڭ قابىلداعانىن اتاپ ءوتتى.
پارلامەنت دەپۋتاتتارىنىڭ الدىندا تۇرعان مىندەتتەردى جىكتەگەن مەملەكەت باسشىسى قازىرگىدەي جاھاندىق ەكونوميكانىڭ كۇردەلى جاعدايىندا بيۋدجەتتىك شىعىستاردىڭ ۇنەمدىلىگى مەن ولاردىڭ ءتيىمدى جۇمسالۋىنا باستى نازار اۋدارۋ قاجەتتىگىن ايتتى.
– وسى سەسسيا بارىسىندا جاڭا ءۇش جىلدىق بيۋدجەتتى ازىرلەۋ مىندەتى تۇر. ۇكىمەت بيىلعى جىلدىڭ بيۋدجەتىن ناقتىلاعاندا, مەنىڭ تاپسىرمام بويىنشا بيۋدجەت شىعىستارىن 57 ميلليارد تەڭگەگە قىسقارتتى. سونىمەن قاتار مەن ءالى دە قىسقارتۋ مەن بيۋدجەتتىك ۇنەمدىك رەزەرۆتەرى بار دەپ سانايمىن. ەكونوميكالىق ءوسىم مەن حالىقتى ەڭبەكپەن قامتۋدى قامتاماسىز ەتپەيتىن شىعىستار قاراستىرىلماۋعا ءتيىس, – دەدى ن. نازارباەۆ.
سونداي-اق, ەلباسى ەكونوميكالىق ءوسىمنىڭ قۇقىقتىق بازاسىن جاقسارتۋ, تاياۋداعى جىلداردا زاڭدىق قۇجاتتاردى رەتتەپ, ولاردىڭ ەل ازاماتتارىنا تۇسىنىكتى ءارى قاراپايىم تىلدە بولۋىن قامتاماسىز ەتۋ جانە مەملەكەتتىك باسقارۋ مەن مەملەكەتتىك قىزمەت جۇيەسىن جاڭعىرتۋدىڭ ءتيىمدى جولدارىن قاراستىرۋ ماسەلەلەرىنە ءمان بەرۋدى تاپسىردى.
– ءبىزدىڭ بۇگىنگى تابىستارىمىز وزدىگىنەن كەلە سالعان جوق, دەدى ەلباسى ءوز سوزىندە. – بۇل بارشا حالقىمىزدىڭ 20 جىلدىق قاجىرلى ەڭبەگىنىڭ ناتيجەسى. ءاربىر قازاقستاندىقتىڭ جوعارى دەڭگەيدەگى قۇقىقتىق مادەنيەتىن تىرەك ەتكەندە عانا ءبىز XXI عاسىردا ەلىمىزدى وركەندەتۋ ماقساتىنا قول جەتكىزە الامىز. جوعارى دەڭگەيدەگى قۇقىقتىق مادەنيەتسىز ءتيىمدى ەكونوميكا دا, ەل يگىلىگىنە جۇمىس ىستەيتىن زاڭدار دا, العا قارىشتى قادام باسۋ دا بولمايدى. وركەنيەتتى ەكونوميكا مەن قۇقىقتىق مەملەكەتتى تەك زاڭعا ءسوزسىز باعىناتىن, ەلىنىڭ زاڭىن سىيلايتىن ازاماتتار عانا دامىتا الادى.
ەندەشە, مىندەت – ايقىن, تەك جۇمىسقا بەلدى بۋىپ, بىلەك سىبانا كىرىسۋ عانا قالدى.
