استانانىڭ ون بەس جىلدىق مەرەيتويىنا «نازارباەۆ ورتالىعى» كوپ فۋنكتسيالى عىلىمي-تالدامالىق جانە گۋمانيتارلىق-اعارتۋشىلىق مەكەمەسى دە لايىقتى تارتۋ جاسادى. ەلباسى نۇرسۇلتان نازارباەۆتىڭ ءار جىلداردا جارىق كورگەن كىتاپتارىنان, ماقالالارى مەن سويلەگەن سوزدەرىنەن ءسۇزىپ, ۇلاعاتتى ويلارى مەن قاناتتى سوزدەرىن تەرىپ, «جىلدار مەن ويلار», «ۆرەمەنا ي دۋمى» اتتى كىتاپتار قۇراستىرىپتى. ورتالىقتا وسى كىتاپتاردىڭ تۇساۋكەسەر ءراسىمى سالتاناتتى جاعدايدا ۇيىمداستىرىلدى.
تۇساۋكەسەر راسىمىندە ءسوز سويلەگەن پرەزيدەنت كەڭسەسىنىڭ باسشىسى, مەكەمە ديرەكتورىنىڭ مىندەتىن اتقارۋشى ماحمۇد قاسىمبەكوۆ جاقىندا ورتالىقتا باسپا ءۇيى اشىلعانىن, اتالعان كىتاپتار سول باسپا ءۇيىنىڭ العاشقى جەمىسى ەكەنىن اڭگىمەلەدى. بۇعان دەيىن پرەزيدەنتتىڭ «تۋعان ەلىم – تىرەگىم», «وزەكجاردى ويلار», «وي ءبولىستىم حالقىممەن» اتتى جيناقتارى جارىق كورگەنىن ايتتى. «جىلدار مەن ويلار» سولاردىڭ زاڭدى جالعاسى ىسپەتتەس. بۇل كىتاپتى ەلباسى تۋىندىلارىنىڭ مەيلىنشە تولىقتىرىلعان نۇسقاسى دەۋگە بولادى» دەدى ماحمۇد بازارقۇلۇلى.
كىتاپ پرەزيدەنتىمىزدىڭ قاتارداعى ەل باسشىسى ەمەس, تۇڭعيىق تەرەڭ ويلى, الداعىنى اداسپاي بولجايتىن كورەگەن, وتكىر ءتىلدى شەشەن, ونىڭ ۇستىنە پاراساتتى جانە مادەنيەتتى اقىل يەسى ەكەنىن تانىتا تۇسكەن. كىتاپ ون بەس تاراۋعا ءبولىنىپ, تاقىرىپتارعا جىكتەلگەن. سونىڭ ىشىندە وتان, جەر تاعدىرى, تاۋەلسىزدىك, تۇراقتىلىق, ۇلتتىق سانا, ەل بىرلىگى, ۇلتتىق نامىس جانە تاعى باسقا تاقىرىپتارعا بىرىكتىرىلگەن سوزدەردىڭ ارقايسىسى اسىل قازىنا دەۋگە بولادى. كەز كەلگەن ويشىل ازامات جازاتىن تاقىرىبىنا ەلباسىنىڭ وسىناۋ سوزدەرىن تەمىرقازىق ەتىپ ۇستاسا, اداسپاسى كورىنىپ تۇر.
باسقاسىنا بارماي-اق, مەرەيتويىن اتاپ وتكەلى وتىرعان استانا تاقىرىبىنا ارنالعان سوزدەرىنەن بىرەر مىسال كەلتىرسەك: «استانا – قازاقستان حالقىنىڭ جۇزەگە اسقان ءۇمىت-ارمانىنىڭ بەينەسى», «الماتى – تاۋەلسىزدىگىمىزدىڭ بەسىگى, استانا – بولاشاعىمىزدىڭ ەسىگى», «استانا – وتانىمىزدىڭ جۇرەگى, تاۋەلسىزدىگىمىزدىڭ تىرەگى», «استانا كەلبەتى – ۇلت كەلبەتى…»
تۇساۋكەسەر راسىمىندە سويلەگەن مىرزاتاي جولداسبەكوۆ, قۋانىش سۇلتانوۆ, الدان سمايىل, جابال ەرعاليەۆ, نەسىپبەك ايتۇلى, دۇكەنباي دوسجانوۆ, الىبەك اسقاروۆ سىندى مەملەكەت جانە قوعام قايراتكەرلەرى, اقىندار مەن جازۋشىلار وسى ويلاردى بارىنشا ءوربىتىپ, كوكەيلەرىندەگى پىكىرلەرىن ورتاعا سالدى.
كىتاپتىڭ تارالىمى سەگىز مىڭ دانا, باسپانىڭ سوڭعى جەتىستىگىمەن اسەم بەزەندىرىلگەن. ول ەلىمىزدىڭ بارلىق كىتاپحانالارىمەن قاتار, ساۋدا ورىندارىنا دا تۇسەدى.
اسەل مۇراتبەكقىزى
